អន្តរជាតិ ៖ តម្លៃប្រេងឆៅបានហក់ឡើងដល់កម្រិតខ្ពស់បំផុតក្នុងរយៈពេល៥ខែ នៅថ្ងៃទី២៣ ខែមិថុនា ឆ្នាំ២០២៥ ខណៈដែលសហរដ្ឋអាមេរិកបានចូលរួមជាមួយអ៊ីស្រាអែលក្នុងការវាយប្រហារទីតាំងនុយក្លេអ៊ែររបស់ប្រទេសអ៊ីរ៉ង់ បង្កើតឱ្យមានការព្រួយបារម្ភអំពីការផ្គត់ផ្គង់សកល ហើយអ្នកវិនិយោគកំពុងរង់ចាំយ៉ាងអន្ទះសាដើម្បីមើលថា តើអ៊ីរ៉ង់នឹងសងសឹកនឹងការវាយប្រហាររបស់អាមេរិកលើទីតាំងនុយក្លេអ៊ែររបស់ខ្លួន ឬយ៉ាងណា? នេះបើតាមប្រភពពីទីភ្នាក់សារព័ត៌មាន Reuters ចេញផ្សាយនៅរសៀលថ្ងៃទី២៣ ខែមិថុនា ឆ្នាំ២០២៥។
តម្លៃប្រេងឆៅ Brent ដែលជាប្រេងស្តង់ដារពិភពលោកបានកើនឡើងដល់ ៨១,៤០ដុល្លារក្នុង១បារ៉ែល។ ស្របពេលប្រេងឆៅអាមេរិក West Texas Intermediate (WIT) ឡើងដល់ ៧៨,៤០ដុល្លារក្នុង១បារ៉ែល។ មុនពេលធ្លាក់ចុះបន្តិចមកត្រឹមតម្លៃ ៧៧,៥១ដុល្លារក្នុង១បារ៉ែល គិតត្រឹមម៉ោង០៣:០០នាទីរសៀល ម៉ោងនៅកម្ពុជា សម្រាប់ប្រេងឆៅ Brent និង ៧៤,៣០ដុល្លារក្នុង១បារ៉ែល សម្រាប់ប្រេងឆៅអាមេរិក WIT។
ការកើនឡើងតម្លៃកើតឡើងក្រោយប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកបានបំផ្លាញទីតាំងនុយក្លេអ៊ែរសំខាន់ៗរបស់អ៊ីរ៉ង់នៅក្នុងការវាយប្រហារកាលពីថ្ងៃទី២២ ខែមិថុនា កន្លងទៅ ដោយបន្ថែមកម្តៅលើជម្លោះនៅតំបន់មជ្ឈិមបូព៌ា ខណៈដែលអឺរ៉ុងបានប្តេជ្ញាចិត្តដើម្បីការពារខ្លួន។
អ៊ីរ៉ង់ គឺជាប្រទេសផលិតប្រេងឆៅធំទីបីរបស់អង្គការ OPEC។ អ្នកជំនាញទីផ្សាររំពឹងថា តម្លៃប្រេងឆៅនឹងកើនឡើងខ្លាំងបន្ថែមទៀត ចំពេលមានការភ័យខ្លាចកាន់តែខ្លាំងថា ការសងសឹករបស់អ៊ីរ៉ង់អាចរួមបញ្ចូលទាំងការបិទច្រកសមុទ្រ Hormuz ដោយការដឹកជញ្ជូនតាមរយៈច្រកសមុទ្រមួយនេះមានប្រហែលមួយភាគប្រាំនៃលំហូរផ្គត់ផ្គង់ប្រេងសកល។
តម្លៃប្រេងឆៅ Brent បានកើនឡើង ១៣% ចាប់តាំងពីជម្លោះរវាងអ៊ីស្រាអែល និងអ៊ីរ៉ង់បានចាប់ផ្តើមនៅថ្ងៃទី១៣ ខែមិថុនា ខណៈពេលដែលប្រេងឆៅអាមេរិក WTI បានកើនឡើងប្រហែល ១០% ។ អ្នកជំនាញបានលើកឡើងថា ដោយសារច្រកសមុទ្រ Hormuz មិនអាចខ្វះបានសម្រាប់ការនាំចេញប្រេងឆៅផ្ទាល់របស់អ៊ីរ៉ង់ ដែលជាប្រភពសំខាន់នៃប្រាក់ចំណូលជាតិរបស់ខ្លួននោះ ការបិទច្រកសមុទ្រនេះ នឹងធ្វើឱ្យខូចខាតសេដ្ឋកិច្ចយ៉ាងធ្ងន់ធ្ងរលើអ៊ីរ៉ង់ខ្លួនឯង ដែលធ្វើឱ្យវាក្លាយជាអាវុធមុខពីរ៕
ចែករំលែកព័តមាននេះ