រាជធានីភ្នំពេញ ៖ សម្ដេចតេជោហ៊ុន សែន បានថ្លែងឆ្លើយតបទៅជនជ្រុលនិយមថៃដែលទាមទារឱ្យមានការផ្តាច់ការផ្គត់ផ្គង់ប្រេង ទើបកម្ពុជាចុះចាញ់ ។ សម្តេចថាបើថៃផ្ដាច់ប្រេងមកកម្ពុជា បើសិនចង់ធ្វើ សូមធ្វើតាមចិត្តចុះ…
រាជធានីភ្នំពេញ ៖ សម្ដេចតេជោហ៊ុន សែន បានថ្លែងឆ្លើយតបទៅជនជ្រុលនិយមថៃដែលទាមទារឱ្យមានការផ្តាច់ការផ្គត់ផ្គង់ប្រេង ទើបកម្ពុជាចុះចាញ់ ។ សម្តេចថាបើថៃផ្ដាច់ប្រេងមកកម្ពុជា បើសិនចង់ធ្វើ សូមធ្វើតាមចិត្តចុះ ក្រុមហ៊ុនដែលងាប់មុនគេ គឺក្រុមហ៊ុនសាំងPTT ដែលកំពុងមានវត្តមាននៅកម្ពុជា ។ សម្ដេចតេជោ ហ៊ុន សែន ប្រធានព្រឹទ្ធសភាបានបង្ហោះសារនៅលើបណ្ដាញ ទំនាក់ទំនងសង្គមផ្ទាល់របស់សម្ដេច នារាត្រីថ្ងៃទី២០ ខែមិថុនា ឆ្នាំ២០២៥ ឆ្លើយតបនឹងការគំរាមការផ្តាច់ប្រេងរបស់ជនជ្រុលនិយមថៃ ។
សម្ដេចតេជោ ហ៊ុន សែន បានគូសបញ្ជាក់ធ្ងន់ៗថា កម្ពុជាមិនងាប់ដោយសារថៃផ្តាច់ប្រេងនោះទេ ហើយប្រសិនបើចង់ធ្វើ សូមធ្វើតាមចិត្តចុះ ។ល្បែងគំរាមដែលនាំដល់ការខាតបង់ខ្លួនឯង ថ្ងៃនេះឃើញបក្សប្រឆាំងថៃមួយ ជូនយោបល់ទៅរាជរដ្ឋាភិបាលថៃថាឲ្យឈប់លក់ប្រេងឲ្យកម្ពុជាដែលនឹងធ្វើឲ្យកម្ពុជាចុះចាញ់ ។យើងសូមបញ្ជាក់ទៅអ្នកវិញថា យើងមិនស្លាប់ដោយសារមិនមានការនាំប្រេងពីថៃមកនោះទេ ប៉ុន្តែអ្នកដែលស្លាប់គឺក្រុមហ៊ុន PTT របស់ថៃទៅវិញទេ ។ តើអ្នកចង់ឲ្យក្រុមហ៊ុនថៃ PTT ស្លាប់មែនទេ ? បើចង់សូមឲ្យអ្នកធ្វើតាមបំណងចុះ ។
សម្រាប់កម្ពុជាបានត្រៀមខ្លួនរួចរាល់ដើម្បីដោះស្រាយស្ថានភាពដែលពួកអ្នកគំរាមរួចហើយ អុីនធើរណេត អគ្គិសនី ពលករ និងពេលនេះល្បែងប្រេងធ្វើជាអាវុធប្រឆាំងយើងទៀត ។ បញ្ហាពលករពេលមុន ពួកអ្នកមើលងាយ និងរើសអើងពលករខ្មែរ និងយកពលករធ្វើជាចំណាប់ខ្មាំងផង និងគំរាមយើងផង តែពេលដែលយើងប្រកាសទទួលយកពលករពេលនេះពួកអ្នកបែរជាចេះយកចិត្ត និងលួងលោមពលករ ព្រោះបើពលករខ្មែរចាកចេញ រោងចក្រ កសិដ្ឋាន ក្រុមហ៊ុន ការដ្ឋានសំណង់មួយចំនួន អាចត្រូវបិទទ្វារ ព្រោះខ្វះកម្លាំងពលកម្ម ។
បើពួកអ្នកក្លាហាន សូមពួកអ្នកបណ្តេញពលករខ្មែរសាកល្បងមើល តើវាប៉ះពាល់សេដ្ឋកិច្ចថៃខ្លះទេ ? ប្រេងក៏ដូចគ្នាសូមសាកល្បងមើលចុះ តែគួរសួរក្រុមហ៊ុនថៃ PTT ជាមុនសិន ព្រោះក្រែងវាងាប់ក្រុមហ៊ុនថៃ ដែលកំពុងមានស្ថានីយលក់ប្រេងនៅកម្ពុជា ឬក៏ត្រូវឲ្យក្រុមហ៊ុនប្រេងរបស់ថៃ ទៅទិញប្រេងពីប្រទេសផ្សេងមកលក់នៅកម្ពុជា ។
ក្នុងនាមជាប្រធានគណបក្ស ខ្ញុំសូមផ្តល់យោបល់ជូនរាជរដ្ឋាភិបាលពិចារណា និងម្ចាស់ការជាមុន ដោយបង្វែរការទិញទំនិញពីប្រទេសថៃ ដើម្បីកុំឲ្យគេមានហេតុផលគំរាមយើងតទៅទៀត និងចំពោះមុខប្រសិនច្រកទ្វារព្រំដែនមិនទាន់កែសម្រួលឲ្យដូចដើមវិញ កម្ពុជាគួរផ្អាកការនាំចូលគ្រឿងកំប៉ុងគ្រប់ប្រភេទ តាំងពីគ្រឿងស្រវឹង ភេសជ្ជៈប៉ូវកម្លាំងគ្រប់ប្រភេទរហូតដល់ត្រីខកំប៉ុង ឬសាច់កំប៉ុងគ្រប់ប្រភេទ ជំនួសដោយប្រើផលិតផលក្នុងស្រុក ឬផលិតផលនាំចូលពីប្រទេសផ្សេងៗក្រៅពីប្រទេសថៃ ។ ប្រជាជនកម្ពុជាយើងគួរសម្លឹងមើលឲ្យឆ្ងាយ លើសពីព្រំដែនកម្ពុជា និងលើសពីឆ្នាំ២០៣០ ។
ឆ្លើយតបការផ្សព្វផ្សាយមិនពិតរបស់កាសែតBangkok Postរបស់ថៃ
កាលពីថ្ងៃទី២១ ខែមិថុនា ឆ្នាំ២០២៥ សារព័ត៌មានថៃមួយចំនួន រួមទាំងកាសែតល្បីរបស់ថៃ Bangkok Post ផងនោះ បានចុះផ្សាយព័ត៌មានបំពុលថា ជនជាតិខ្មែរបានសម្រុកទៅចាក់សាំងនៅថៃ ពីព្រោះសាំងនៅខ្មែរថ្លៃ និងក្រោយការព្រមានហាមឃាត់នាំចូលសាំងពីថៃ ដែលជាការឆ្លើយតបនឹងសម្តីរបស់មន្ត្រីបក្សប្រឆាំងថៃម្នាក់ដែលនិយាយថា «បើថៃបិទនាំចូលប្រេងមកកម្ពុជាតែមួយខែ នោះកម្ពុជានឹងចុះចាញ់» ។
ភ្លាមៗបន្ទាប់ពីការចុះផ្សាយមិនពិតនេះ លោក អ៊ុំ រាត្រី អភិបាលខេត្តបន្ទាយមានជ័យ តាមរយៈបណ្តាញព័ត៌មានក្នុងស្រុកនៅរសៀលថ្ងៃទី២១ ខែមិថុនា ឆ្នាំ២០២៥ បានច្រានចោលការចុះផ្សាយនេះ និងថាមិនមានរឿងបែបនេះកើតឡើងឡើយ ។អភិបាលខេត្តបន្ទាយមានជ័យបានបញ្ជាក់ថា «រូបភាពរថយន្តដែលកាសែតថៃចុះផ្សាយនេះ គឺជារថយន្តដែលបងប្អូនខ្មែរយើងធ្វើដំណើរឆ្លងកាត់ច្រកទ្វារអន្តរជាតិប៉ោយប៉ែត ដែលពេលបើកចូលដំបូង គឺមានការកកស្ទះបែបនេះហើយ» ។
ជាក់ស្តែង នៅព្រឹកថ្ងៃទី២២ ខែមិថុនា ឆ្នាំ២០២៥ បងប្អូនខ្មែរដែលជាថៅកែ និងអាជីវករបោះដុំលក់ដូរទំនិញនៅផ្សាររុងក្លឿ ដែលមានម៉ូតូ រថយន្តជាច្រើនគ្រឿងបានឆ្លងចូលតាមច្រកទ្វារអន្តរជាតិប៉ោយប៉ែតដែលកម្ពុជាបើកនៅម៉ោង៩ព្រឹក ថៃបើកនៅម៉ោង៨ព្រឹក ពោលមិនមែនចូលទៅចាក់សាំងដូចកាសែត និងជនជាតិថៃមួយក្តាប់តូចផ្សាយនោះឡើយ ។
ក្នុងកិច្ចសម្ភាសន៍ក្រុមអាជីវករខ្មែរបញ្ជាក់ថា «សាំងនៅខ្មែរខ្វះអី មិនចាំបាច់ទៅចាក់សាំងនៅថៃនោះឡើយ» ។អាជ្ញាធរខេត្តបន្ទាយមានជ័យបានបដិសេធថាគ្មានរថយន្តពលរដ្ឋខ្មែរសូម្បីតែ១គ្រឿងចូលទៅចាក់សាំងក្នុងទឹកដីថៃឡើយ ព្រោះកម្ពុជាមានសាំងប្រើប្រាស់គ្រប់គ្រាន់ ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានបដិសេធការចុះផ្សាយរបស់កាសែតថៃថាមានរថយន្តកម្ពុជាចូលទៅចាក់សាំងក្នុងដីថៃ គឺគ្មានការពិតឡើយ ព្រោះកម្ពុជាសាំងប្រើប្រាស់គ្រប់គ្រាន់ អ្វីដែលកាសែតថៃបានចុះផ្សាយនោះ ជារថយន្តពលរដ្ឋខ្មែរ ជាអាជីវករខ្មែរចូលទៅទឹកដីថៃ តាមច្រកទ្វារព្រំដែនអន្តរជាតិប៉ោយប៉ែតដែលឈមច្រកខ្លងលឹកប្រទេសថៃ ជារថយន្តអាជីវករខ្មែរ ចូលទៅលក់នៅផ្សាររុងក្លឿជារៀងរាល់ថ្ងៃ គឺគ្មានទេរថយន្តពលរដ្ឋខ្មែរចូលទៅចាក់សាំងក្នុងទឹកដីថៃ ។
ឯកឧត្តមបានបញ្ជាក់ថា រាល់ថ្ងៃពលរដ្ឋខ្មែរដែលចូលទៅលក់ដូរនៅផ្សាររុងក្លឿប្រទេសថៃ ១ថ្ងៃមានរាប់ពាន់នាក់ ហើយមានរថយន្តរាប់រយគ្រឿងដែលមានឯកសារចេញ-ចូលទៅប្រទេសថៃព្រឹកវិលល្ងាច ក្រោយភាគីថៃបានបិទច្រកដោយ(ឯកតោភាគី) ហើយសម្រួលការចេញ-ចូល ដោយកម្ពុជាបើកចេញ-ចូលម៉ោង៩ព្រឹក បិទម៉ោង៤រសៀល ។
ឯកឧត្តម ប៉ាន់ខែម ប៊ុនថន នាយរងខុទ្ទការល័យនាយករដ្ឋមន្ត្រី និងជាប្រធានក្រុមការងារចុះជួយមូលដ្ឋានក្រុងប៉ោយប៉ែត បានបញ្ជាក់ថា កាសែតថៃដែលផ្សព្វផ្សាយរថយន្តពលរដ្ឋខ្មែរចូលចាក់សាំងក្នុងទឹកដីថៃ គឺគ្មានការពិតឡើយ ព្រោះសាំងកម្ពុជាមានប្រើប្រាស់គ្រប់គ្រាន់ដោយមិនចាំបាច់ពឹងដង្ហើមថៃដកទៀតឡើយ ទាំងសាំង អគ្គិសនី អុីនធើរណេត និងបន្លែ ផ្លែឈើ ត្រូវបានកាត់ផ្តាច់ពីប្រទេសថៃ ៕
ចែករំលែកព័តមាននេះ