បាងកក ៖ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ Paetongtarn Shinawatr ត្រៀមហោះហើរទៅកាន់តំបន់ព្រំដែនថៃ-កម្ពុជា ក្នុងខេត្តអ៊ូប៊ុនរ៉ាត់ថានី…
បាងកក ៖ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ Paetongtarn Shinawatr ត្រៀមហោះហើរទៅកាន់តំបន់ព្រំដែនថៃ-កម្ពុជា ក្នុងខេត្តអ៊ូប៊ុនរ៉ាត់ថានី ដើម្បីចែកជូនសម្ភារៈ និងផ្ដល់កម្លាំងចិត្តដល់នាយទាហានជួរមុខ ព្រមទាំងជួបជាមួយមេបញ្ជាការយោធាភូមិភាគទី២ គឺឧត្តមសេនីយ៍ទោ ប៊ុនស៊ីន ប៉ាដឃ្លាំង ដើម្បីបកស្រាយបំភ្លឺជុំវិញករណីសំឡេងលេចធ្លាយ មុននឹងពិភាក្សាវិធានការទប់ទល់ជាមួយកម្ពុជា នេះបើយោងតាមសារព័ត៌មានអនឡាញរបស់ថៃ Khaosod English ចេញផ្សាយនៅរសៀលថ្ងៃទី១៩ មិថុនា ២០២៥ ។
លោកស្រីនាយករដ្ឋមន្ត្រីថៃ គ្រោងនឹងចាកចេញពីទីក្រុងបាងកក នៅថ្ងៃស្អែកនេះ។ មុនពេលចាកចេញនោះ លោកស្រី នឹងដឹកនាំកិច្ចប្រជុំមួយនៅឯវិមានរដ្ឋាភិបាល ដើម្បីតាមដាន និងជួយប្រជាជននៅតាមបណ្ដាខេត្តជាប់ព្រំដែនថៃ ។
លោកស្រី ផែថងថាន នឹងទៅទស្សនកិច្ចតំបន់ព្រំដែន ចុងបូក (Chong Bok) ក្នុងស្រុកណាមយឿន (Nam Yuen) នៅខេត្តអ៊ូប៊ុនរ៉ាត់ថានី មុននឹងបន្តដំណើរតាមឧទ្ធម្ភាគចក្រ ទៅកាន់រដ្ឋបាលឃុំដុំប្រាឌិត ក្នុងស្រុកណាមយឿន ។
សារព័ត៌មានអនឡាញរបស់ថៃ Khaosod English ឲ្យដឹងទៀតថា បន្ទាប់មក នៅម៉ោង១រសៀលថ្ងៃស្អែក លោកស្រី នឹងធ្វើដំណើរតាមរថយន្តទៅកាន់”មូលដ្ឋានប្រតិបត្តិការ Emerald” ដើម្បីជួប និងចែកជូនសម្ភារៈលើកទឹកចិត្តដល់នាយទាហាន ដែលកំពុងបំពេញកាតព្វកិច្ចការពារអធិបតេយ្យភាពនៅតាមបណ្ដោយព្រំដែនថៃ-កម្ពុជា ។
ជាមួយគ្នានេះ ឧត្តមសេនីយ៍ទោ ប៊ុនស៊ីន ប៉ាដឃ្លាំង ក៏នឹងចូលរួមក្នុងកិច្ចប្រជុំសន្តិសុខមួយ ដើម្បីស្វែងរកវិធានការធានាសុវត្ថិភាពព្រំដែនថៃ-កម្ពុជា ផងដែរ ៕
ចែករំលែកព័តមាននេះ