ខេត្តបាត់ដំបង ៖ លំនៅឋានមួយខ្នងត្រូវអគ្គិភ័យដែលគេអះអាងថា ផ្ដើមចេញពីការទុស្សេចរន្តអគ្គិសនីបានលេបត្របាក់យកអស់ទាំងស្រុង កាលពីវេលាម៉ោង១រំលងអធ្រាត្រ ឈានចូលថ្ងៃទី១៧ មិថុនា នៅចំណុចភូមិអង់ត្បូង ឃុំតាពូង ស្រុកថ្មគោល…
ខេត្តបាត់ដំបង ៖ លំនៅឋានមួយខ្នងត្រូវអគ្គិភ័យដែលគេអះអាងថា ផ្ដើមចេញពីការទុស្សេចរន្តអគ្គិសនីបានលេបត្របាក់យកអស់ទាំងស្រុង កាលពីវេលាម៉ោង១រំលងអធ្រាត្រ ឈានចូលថ្ងៃទី១៧ មិថុនា នៅចំណុចភូមិអង់ត្បូង ឃុំតាពូង ស្រុកថ្មគោល ដែលម្ចាស់មិនបានស្នាក់នៅក្នុងយប់កើតហេតុនោះ ។
នៅពេលអគ្គិភ័យនេះបានកើតឡើង កុំថាឡើយសមត្ថកិច្ចមូលដ្ឋាន សូម្បីតែម្ចាស់ផ្ទះខ្លួនឯងក៏មិនបានដឹងភ្លាមៗដែរ រហូតដល់ភ្លើងឆេះផ្ទះហ្មត់ ទើបម្ចាស់ផ្ទះដឹង តាមរយៈអ្នកភូមិផ្ដល់ព័ត៏មាន ព្រោះពេលនោះម្ចាស់ផ្ទះបិទទ្វារទុកចោល រួចចេញទៅដេកនៅផ្ទះបងប្អូន ។ នេះបើតាមសមត្ថកិច្ចបាននិយាយប្រាប់ ។
យោងតាមរបាយការណ៍បានឲ្យដឹងថា លំនៅឋានដែលត្រូវភ្លើងឆេះហ្មត់នោះ ធ្វើពីឈើ ដំបូងនិងជញ្ជាំង ប្រក់និងប៉័ងសីមានទំហំ៥ម៉x៧ម៉ ដែលមានម្ចាស់ឈ្មោះ វ៉ង់ ផា ប្រុសអាយុ៤៥ឆ្នាំ ។ សមត្ថកិច្ចដែលបានស្រង់សម្ដីម្ចាស់ផ្ទះបានឲ្យដឹងថា នៅយប់នោះ គាត់មិនបានស្នាក់នៅក្នុងផ្ទះទេ ។ គាត់បានបិទទ្វារចាក់សោរ រួចចេញទៅហូបបាយនៅផ្ទះបងប្អូន ហើយក៏ដេកនៅទៅនោះតែម្ដង ។ ប៉ុន្តែម្ចាស់ផ្ទះរូបនេះ បានទទួលដាក់ការសង្ស័យថា អគ្គិភ័យនេះ ទំនងផ្ដើមចេញពីការទុស្សេខ្សែភ្លើង ។
គាត់បានប្រាប់សមត្ថកិច្ចថា មុនពេលចេញពីផ្ទះ គាត់បានបើកភ្លើងចោលក្នុងផ្ទះ ថែមទាំងភ្លេចបិទកង្ហារទៀតផង ។ ដូច្នេះ គាត់សង្ស័យទុស្សេខ្សែភ្លើង ទើបបង្កជាអគ្គិភ័យឆេះផ្ទះអស់គ្មានសល់បែបនេះ ។
ជុំវិញករណីនេះ អធិការស្រុកថ្មគោល លោក សេង លុច បាននិយាយថា ករណីអគ្គិភ័យនេះ សមត្ថកិច្ចរបស់លោកមិនបានដឹងទេ រហូតដល់ព្រឹកឡើង ទើបបានអ្នកភូមិផ្ដល់ព័ត៌មាន ។ លោកបានប្រាប់ថា កុំថាឡើយសមត្ថកិច្ចបានដឹង សូម្បីម្ចាស់ផ្ទះខ្លួនឯង និង អ្នកភូមិខ្លះទៀតក៏មិនបានដឹងដែរ ព្រោះផ្ទះនៅដាច់ឆ្ងាយពីគេឯងបន្តិច និងពុំមានអ្នកផ្ដល់ព័ត៌មាន ពេលកើតហេតុភ្លាមៗ ។
ម្ចាស់ផ្ទះបានដឹងថា មានភ្លើងឆេះផ្ទះខ្លួន នៅពេលអ្នកក្បែរខាងទូរស័ព្ទប្រាប់ តែផ្ទះបានក្លាយជាផេះអស់ទៅហើយ ។ ដូច្នេះ រថយន្តពន្លត់អគ្គិភ័យរបស់សមត្ថកិច្ចមិនបានចេញជួយអន្តរាគមន៍ទេ ។
លោក សេង លុច បានបញ្ជាក់ដែរថា ជនរងគ្រោះបានបាត់បង់ទ្រព្យសម្បត្តិអស់ទាំងស្រុង ក្នុងនោះ មានសម្លៀកបំពាក់ សម្ភារប្រើប្រាស ចានឆ្នាំង អង្ករ និងទ្រព្យសម្បត្តិជាច្រើនទៀត ដែលមាននៅក្នុងផ្ទះ តែយើងមិនទាន់ប៉ាន់ប្រមាណពីការខាតបង់នេះបាននៅឡើយទេ ព្រោះមន្ត្រីជំនាញ បាននិងកំពុងសួរនាំម្ចាស់ផ្ទះនៅឡើយ ៕
ចែករំលែកព័តមាននេះ