ខេត្តមណ្ឌលគិរី ៖ សម្រាប់ពុកម៉ែបងប្អូនប្រជាពលរដ្ឋ ដែលមិនទាន់មានការងារធ្វើ ជាពិសេស បងប្អូនពលករនៅប្រទេសថៃ មានបំណងវិលត្រលប់មករស់នៅស្រុកខ្មែរវិញ ព្រោះសហគ្រាសគ្រឹះស្ថាននៅខេត្តមណ្ឌលគិរី កំពុងមានតម្រូវការកម្មករនិយោជិកជាង៧ពាន់នាក់ ដើម្បីបំពេញការងារ…
ខេត្តមណ្ឌលគិរី ៖ សម្រាប់ពុកម៉ែបងប្អូនប្រជាពលរដ្ឋ ដែលមិនទាន់មានការងារធ្វើ ជាពិសេស បងប្អូនពលករនៅប្រទេសថៃ មានបំណងវិលត្រលប់មករស់នៅស្រុកខ្មែរវិញ ព្រោះសហគ្រាសគ្រឹះស្ថាននៅខេត្តមណ្ឌលគិរី កំពុងមានតម្រូវការកម្មករនិយោជិកជាង៧ពាន់នាក់ ដើម្បីបំពេញការងារ ។
លោក ណយ ច័ន្ទតារា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តមណ្ឌលគិរី បានឲ្យដឹងថា បច្ចុប្បន្ន ដោយមានការអភិវឌ្ឍហេដ្ឋារចនាសម្ពន្ឋផ្លូវថ្នល់បានប្រសើរ ខេត្តមណ្ឌលគិរី មានក្រុមហ៊ុន រោងចក្រ សហគ្រាស ចំនួន២២២សហគ្រាស គិតត្រឹមថ្ងៃទី១៣ ខែមិថុនា ឆ្នាំ២០២៥ ។
ប្រធានមន្ទីរការងារបន្តថា ដោយទំហំការងារមានច្រើន តែកម្លាំងពលកម្មក្នុងខេត្តមិនគ្រប់គ្រាន់ បណ្តាសហគ្រាសទាំងអស់ បានស្នើសុំសហការជាមួយមន្ទីរការងារ ដើម្បីជ្រើសរើសកម្លាំងកម្មករនិយោជិកបម្រើការតាមជំនាញនានា ចំនួន៧៤៨៧នាក់ ដែលជាមធ្យមទទួលប្រាក់ខែគោល ចាប់ពី ៩២០ ០០០ ម៉ឺនរៀល(តែបើករណីធ្វើគ្រប់ផែនការ តាមការប្រឹងប្រែង ប្រាក់ខែអាចលើសនេះទៅតាមជំនាញ) និងមានកន្លែងស្នាក់នៅ មានរបបអង្ករ ហើយនឹងប្រាក់លើកទឹកចិត្ត រួមនិងផ្ដល់ប័ណ្ណ ប ស ស ធានាបានការព្យាបាលជំងឺ ។
ជាមួយគ្នានេះ ក៏មានលក្ខខណ្ឌ ដោយកម្មករនិយោជិកទាំងពីរភេទ តម្រូវមានអាយុចាប់ពី១៨ឆ្នាំ ទៅ៤៥ ឆ្នាំ តម្រូវឲ្យមានអត្តសញ្ញាណបណ្ណមានសុពលភាព និងកាយសម្បទាល្អ ។
លោក ណយ ច័ន្ទតារា បានបន្តថា ក្នុងនាមជាប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តមណ្ឌលគិរី ក៏ដូចជាប្រជាពលរដ្ឋដែលរស់នៅនៅក្នុងខេត្តមណ្ឌលគិរីផងដែរ សូមគាំទ្រយ៉ាងពេញទំហឹងចំពោះចំណាត់ការ របស់រាជរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត ហើយក្នុងនោះក៏មាន ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ គឺលោកតែងតែយកចិត្តទុកដាក់ខ្លាំង ចំពោះសុខទុក្ខរបស់បងប្អូនប្រជាកសិករ នៅក្នុងស្រុកនិងក្រៅស្រុក។
ក្នុងចន្លោះពេលនេះ ដែលយើងកំពុងតែមានបញ្ហា ផ្នែកនយោបាយជាមួយនឹងប្រទេសជិតខាង សូមពុកម៉ែបងប្អូនជឿជាក់ លើរាជរដ្ឋាភិបាលហើយវិលត្រឡប់មករស់នៅលើទឹកដី នៃប្រទេសកម្ពុជារបស់យើងវិញ ហើយម៉ោងនេះ រាជរដ្ឋាភិបាលកម្ពុជា កំពុងតែគិតគូរនិងផ្ដល់ឱកាសការងារជូនបងប្អូននៅក្នុងប្រទេស។
លោក ណយ ច័ន្ទតារា បានបញ្ជាក់ថា គ្មានកន្លែងណា ដែលផ្តល់ភាពកក់ក្តៅជាងនៅក្នុងប្រទេសរបស់យើងទេ គ្មានគ្រួសារណាដែលកក់ក្តៅជាងគ្រួសាររបស់យើងទេ ដូច្នេះសូមពុកម៉ែបងប្អូន ត្រឡប់មកកាន់ប្រទេសកម្ពុជាវិញ ដោយមានការជឿជាក់លើរាជរដ្ឋាភិបាល និយាយដាច់ដោយឡែកមួយទៀត នៅក្នុងខេត្តមណ្ឌលគិរីយើង ឯកឧត្ដម ថង សាវុន ក៏ដូចជាអង្គភាព ស្ថាប័នពាក់ព័ន្ធនានាផ្សេងទៀត កំពុងតែស្វែងរកក៏ដូចជាផ្តល់ឱកាសការងារជូនប្អូនពុកម៉ែបន្ថែមគ្រប់ពេលវេលា ៕
ចែករំលែកព័តមាននេះ