រាជធានីភ្នំពេញ ៖ កម្លាំងនគរបាលប៉ុស្តិ៍ដង្កោ និងប៉ុស្តិ៍ព្រៃវែង នៃអធិការដ្ឋាននគរបាលខណ្ឌដង្កោ បានសហការជាមួយជនរងគ្រោះ ធ្វើការឃាត់ខ្លួនជនសង្ស័យ២នាក់ ដែលបានប្រព្រឹត្តនូវអំពើចោរកម្ម ២ករណីផ្សេងគ្នា ក្នុងនោះរួមមានសកម្មភាពលួចយកស្លាកលេខរថយន្ត…
រាជធានីភ្នំពេញ ៖ កម្លាំងនគរបាលប៉ុស្តិ៍ដង្កោ និងប៉ុស្តិ៍ព្រៃវែង នៃអធិការដ្ឋាននគរបាលខណ្ឌដង្កោ បានសហការជាមួយជនរងគ្រោះ ធ្វើការឃាត់ខ្លួនជនសង្ស័យ២នាក់ ដែលបានប្រព្រឹត្តនូវអំពើចោរកម្ម ២ករណីផ្សេងគ្នា ក្នុងនោះរួមមានសកម្មភាពលួចយកស្លាកលេខរថយន្ត និងសកម្មភាពគាស់ទម្លុះទម្លាយ និងឆ្កឹះសោឃ្លាំង លួចយកសម្ភារៈផ្សេងៗ ។
ករណីទី១ ៖ លួចស្លាកលេខរថយន្ត កាលពីវេលាម៉ោង១ រសៀលថ្ងៃទី១៣ ខែមិថុនា ឆ្នាំ២០២៥ ត្រង់ចំណុចដីឡូតិ៍គ្មានលេខ ស្ថិតនៅតាមផ្លូវលេខ២១៧ ភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យឈ្មោះ ពៅ សែប ភេទប្រុស អាយុ២៤ឆ្នាំ មុខរបរ មិនពិតប្រាកដ ស្នាក់នៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ (មានផ្ទុកសារធាតុញៀនក្នុងខ្លួន) ។
ចំណែកជនរងគ្រោះឈ្មោះ ភុន រិទ្ធី ភេទប្រុស អាយុ៣២ឆ្នាំ មុខរបរ លក់ដូរ មានទីលំនៅភូមិជើងឯក សង្កាត់ជើងឯក ខណ្ឌដង្កោ ជាម្ចាស់រថយន្តម៉ាក HYUNDAI ពណ៌ស ពាក់ស្លាកលេខ ភ្នំពេញ 3F-2042 ដែលត្រូវជនសង្ស័យលួចដោះស្លាកលេខនោះ ។
នគរបាលបានប្រាប់ថា កាលពីវេលាម៉ោង០៧និង៣០នាទីព្រឹកថ្ងៃទី១២ ខែមិថុនា ឆ្នាំ២០២៥ បុរសអ្នកបើកបររថយន្តដឹកអីវាន់ម្នាក់ឈ្មោះ វុទ្ធី ឡុង អាយុ២៦ឆ្នាំ បានបើករថយន្ត០១គ្រឿងខាងលើ ចេញពីឃ្លាំងការ៉ូយីហោ ធីអរ (TR) ស្ថិតនៅតាមផ្លូវលេខ២១៧ ភូមិជើងឯក សង្កាត់ជើងឯក ខណ្ឌដង្កោ យកទៅទុកនៅចំណុចកើតហេតុ។ លុះដល់វេលាម៉ោង១រសៀលថ្ងៃខែឆ្នាំដដែល ខណៈឈ្មោះ វុទ្ធី ឡុង កំពុងតែអង្គុយចុចទូរសព្ទលេង ចម្ងាយពីរថយន្តខាងលើប្រមាណ៣០ម៉ែត្រ ក៏ស្រាប់តែឃើញជនសង្ស័យឈ្មោះ ពៅ សែប ចូលទៅលួចដោះយកស្លាកលេខរថយន្តផ្នែកខាងក្រោយបានសម្រេច ហើយបម្រុងបន្តទៅលួចដោះយកស្លាកលេខខាងមុខថែមទៀត ប៉ុន្តែត្រូវបានអ្នកបើកបររថយន្តឈ្មោះ វុទ្ធី ឡុង ឃើញទាន់ ក៏បានស្រែកឆោឡោថា ចោរៗបង្កការភ្ញាក់ផ្អើល ។
នគរបាលបានប្រាប់បន្តថា ខណៈនោះជនសង្ស័យ បានយកស្លាកលេខរថយន្ត ដែលដោះបានរត់គេចខ្លួន ហើយអ្នកបើកបររថយន្ត ក៏បានជិះម៉ូតូ១គ្រឿង ដេញតាម ហើយទាន់ត្រង់ចំណុចផ្លូវបេតុងជាប់របងពេលនោះវិទ្យាល័យទួលអំពិល ស្ថិតនៅភូមិតាឡី សង្កាត់ដង្កោ ខណ្ឌដង្កោ ។ បន្ទាប់មក អ្នកបើកបររថយន្តរូបនោះ បានទូរសព្ទប្រាប់នគរបាលប៉ុស្តិ៍ដង្កោ ឲ្យជួយអន្តរាគមន៍ឃាត់ខ្លួនជនសង្ស័យ នាំយកទៅសាកសួរ និងកសាងសំណុំរឿងចាត់ការតាមច្បាប់ ។
ករណីទី២ ៖ លួចមានស្ថានទម្ងន់ទោសគាស់ទម្លុះទម្លាយដោយជនសង្ស័យម្នាក់ប្រើដង្កាប់គាបហែកជញ្ជាំងសង្ក័សី និងឆ្កឹះគន្លឹះបង្អួចឃ្លាំងគ្មានលេខ មួយកន្លែងលួចយកសម្ភារៈ ស្ថិតនៅតាមផ្លូវលំភូមិព្រៃវែងកើត សង្កាត់ព្រៃវែង ខណ្ឌដង្កោ រាជធានីភ្នំពេញ កាលពីវេលាម៉ោង១រសៀលថ្ងៃទី១២ ខែមិថុនា ឆ្នាំ២០២៥ ។
ជនសង្ស័យឈ្មោះ លី សារី ភេទប្រុស អាយុ៣០ឆ្នាំ ជនជាតិខ្មែរ មុខរបរកម្មករផលិតទឹកត្រី ស្នាក់នៅ ក្នុងភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ (មានសារធាតុញៀន) ។ រីឯបក្ខពួកចំនួន០២នាក់ទៀត កំពុងរត់គេចខ្លួនរួមមាន ៖ ១.ឈ្មោះ យ៉ែម ចិន្តា ភេទប្រុស អាយុប្រហែល៣៤ឆ្នាំ ។ ២.ឈ្មោះ យ៉ែម ពិសី ភេទប្រុស អាយុប្រហែល៤៦ឆ្នាំ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ ។
ដោយឡែក ជនរងគ្រោះម្ចាស់ឃ្លាំងឈ្មោះ ម៉ែន គឹមហេង ភេទស្រី អាយុ២៥ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិអន្លង់គងថ្មី សង្កាត់ព្រៃស ខណ្ឌដង្កោ ។
សម្ភារៈបាត់បង់មានដូចជាម៉ូទ័រកាត់ដែក១គ្រឿង, ខ្សែរភ្លើង០១ដុំ, ដែកកាយេ៣ដុំ, រទេះអូសដី១គ្រឿង, ដែកសម្រាប់គាបពុម្ពលូ ចំនួន៣០ដើម និងប៉ុស្តិ៍ផ្សា១គ្រឿង ។
ដោយឡែកវត្ថុតាង ដែលនគរបាលដកហូតបានមកវិញ រួមមានដង្កាប់ដែកដងស្រោបជ័រពណ៌ខ្មៅលាយលឿង១, រទេះអូស១គ្រឿង, ដែកសម្រាប់គាបពុម្ពលូ ចំនួន២៤ដើម ។
នគរបាល បានប្រាប់ឲ្យដឹងថា កាលពីវេលាម៉ោង១៩និង៣០នាទី យប់ថ្ងៃទី១១ ខែមិថុនា ឆ្នាំ២០២៥ ជនរងគ្រោះ បានរៀបចំទុកដាក់សម្ភារៈខាងលើ រួមនិងរបស់របរផ្សេងទៀត នៅក្នុងឃ្លាំងនោះ ដោយបានចាក់សោរទ្វាឃ្លាំងត្រឹមត្រូវ រួចក៏បានជិះម៉ូតូត្រឡប់ទៅសម្រាកនៅផ្ទះស្ថិតនៅក្នុងភូមិអន្លង់ថ្មី សង្កាត់ព្រៃស ខណ្ឌដង្កោ។ រហូតដល់វេលាម៉ោង១រសៀលថ្ងៃទី១២ ខែមិថុនា ឆ្នាំ២០២៥ ទើបត្រឡប់ទៅមើលឃ្លាំងខាងលើវិញ ស្រាប់តែបាត់សម្ភារៈនៅក្នុងឃ្លាំងខាងលើអស់ ហើយឃើញមានស្នាមគាស់ជញ្ជាំងសង្ក័សី និងបង្អូចខ្ទេចខ្ទី ។ បន្ទាប់មកនៅវេលាម៉ោង១៤និង៣០នាទីថ្ងៃខែឆ្នាំដដែល ជនរងគ្រោះបានជិះម៉ូតូដើររក ហើយបានឃើញសម្ភារៈខាងលើ និងជនសង្ស័យឈ្មោះលី សារី នៅផ្ទះរបស់បក្ខពួកឈ្មោះ យ៉ែម ពិសី ស្ថិតនៅភូមិទួលសំបូរ សង្កាត់ព្រៃវែង ខណ្ឌដង្កោ ។
នគរបាលបានបញ្ជាក់ប្រាប់ថា ខណៈនោះជនរងគ្រោះ ក៏បានសួរនាំ ទើបដឹងថា ជនសង្ស័យឈ្មោះ លី សារី ជាអ្នកធ្វើសកម្មភាពលួចយកសម្ភារៈទាំងនោះ រួចយកមកទុកនៅផ្ទះរបស់ឈ្មោះ យ៉ែម ពិសីខាងលើ ។ ជនរងគ្រោះ ក៏បានខលរាយការណ៍ប្រាប់នគរបាលប៉ុស្តិ៍ព្រៃវែង នៃអធិការដ្ឋាននគរបាល ខណ្ឌដង្កោ ឲ្យជួយអត្តរាគមន៍ឃាត់ខ្លួនជនសង្ស័យឈ្មោះ លី សារី រួមនិងវត្ថុតាងខាងលើ បន្ទាប់មកបាននាំយកទៅធ្វើការសាកសួរប៉ុស្តិ៍នគរបាលរដ្ឋបាលព្រៃវែង ។ ខណៈនោះជនសង្ស័យបានឆ្លើយសារភាពថា រូបគេរួមជាមួយឈ្មោះ យ៉ែម ចិន្តា និងឈ្មោះ យ៉ែម ពិសីដែលជាបក្ខពួក(កំពុងគេចខ្លួន) ពិតជាបានធ្វើសកម្មភាពលួចយកសម្ភារ:ក្នុងឃ្លាំងខាងលើ របស់ជនរងគ្រោះ រួចយកទៅលក់អេតចាយបានលុយចំនួន ៣២,០០០(បីម៉ឺនពីរពាន់រៀល) រួចយកទៅទិញថ្នាំញៀនជក់ជាមួយបកនិងស៊ីចាយអស់ហើយ ៕
ចែករំលែកព័តមាននេះ