ទីក្រុងម៉ូស្គូ៖ ប្រទេសរុស្ស៊ីប្រកាសថ្កោលទោសជាទម្ងន់ចំពោះករណីដែលអ៊ីស្រាអែលវាយប្រហារយ៉ាងចាស់ដៃទៅលើទីតាំងជាងមួយរយកន្លែងទូទាំងប្រទេសអ៊ីរ៉ង់បណ្ដាលឱ្យស្លាប់មេបញ្ជាការកំពូលនៃឆ្មាំបដិវត្ត និងអ្នកវិទ្យាសាស្ត្រអ៊ីរ៉ង់។ រុស្ស៊ីចាត់ទុកថាទង្វើរបស់អ៊ីស្រាអែលនោះធ្វើឡើងដោយឥតមាននរណាបង្កហេតុមុនទាល់តែសោះ។ ដូច្នេះជាការរំលោភធម្មនុញ្ញអង្គការសហប្រជាជាតិ។ រុស្ស៊ីចោទប្រកាន់ថាអ៊ីស្រាអែលមិនព្រមដោះស្រាយបញ្ហាតាមមធ្យោបាយការទូតទេ។
អ៊ីស្រាអែលអះអាងថាមូលហេតុដែលខ្លួនវាយអ៊ីរ៉ង់លើកនេះគឺវាយទាំងបង្ខំចិត្តដើម្បីការពារសន្តិសុខជាតិរបស់ខ្លួន។ អ៊ីស្រាអែលថាខ្លួនត្រូវតែវាយប្រហារទីតាំងនុយក្លេអ៊ែរ រោងចក្រផលិតមីស៊ីលផ្លោង និងបញ្ជាការដ្ឋានកងទ័ពដើម្បីទប់ស្កាត់មិនឱ្យអ៊ីរ៉ង់ផលិតអាវុធនុយក្លេអ៊ែរបានសម្រេច។ របាយការណ៍បឋមបង្ហាញថារោងចក្រផលិតអគ្គិសនីពីថាមពលនុយក្លេអ៊ែររបស់អ៊ីរ៉ង់នៅប៊ូសឺ (Bushehr) ដែលរុស្ស៊ីជាអ្នកជួយសាងសង់នោះនៅស្អាតល្អណាស់ ឥតមានរងការវាយប្រហារទេ។
អ្នកនាំពាក្យវិមានក្រឹមឡាំង លោកប៉េស្កូស ថ្លែងថារដ្ឋាភិបាលរបស់លោកខ្វាយខ្វល់ចំពោះបញ្ហានេះ និងសូមថ្កោលទោសទង្វើបង្កហេតុដែលនាំឱ្យសភាពការណ៍តានតឹងកាន់តែខ្លាំង។ លោកពូទីនទទួលបានព័ត៌មានជាបន្តបន្ទាប់ពាក់ព័ន្ធនឹងសភាពការណ៍វិវត្តថ្មីៗតាមរយៈភ្នាក់ងារសម្ងាត់អែហ្វអែសប៊ី (FSB) ផង និងពីក្រសួងការបរទេស និងក្រសួងការពារជាតិផង។
ក្រសួងការបរទេសរុស្ស៊ីប្រកាសថ្កោលទោសអ៊ីស្រាអែល និងរិះគន់ក្រុមបស្ចិមប្រទេសដែលបង្កើតគំនិតស្អប់ខ្ពើមចំពោះអ៊ីរ៉ង់។ ក្រសួងថ្លែងថាយើងសូមថ្កោលទោសជាទម្ងន់ចំពោះការប្រើប្រាស់កម្លាំងយោធារបស់អ៊ីស្រាអែលលើកនេះដែលរំលោភធម្មនុញ្ញអង្គការសហប្រជាជាតិ និងរំលោភច្បាប់អន្តរជាតិ។ ការវាយប្រហារដោយយោធាទៅលើរដ្ឋអធិបតេយ្យរបស់ UN រួមទាំងពលរដ្ឋរបស់គេ, ទីក្រុងដែលធ្លាប់តែរស់នៅដោយសុខសាន្ត និងទីតាំងនុយក្លេស៊ីវិលជាករណីមិនអាចទទួលយកបានទេ។
ក្រសួងយល់ថាសហគមន៍អន្តរជាតិមិនត្រូវរក្សាភាពស្ងៀមស្ងាត់ ធ្វើហាក់ដូចជាគ្មានអ្វីកើតឡើងនោះទេព្រោះនេះជាអំពើឃោរឃៅដែលបំផ្លិចបំផ្លាញសន្តិភាព និងសន្តិសុខនៅក្នុងតំបន់ និងអន្តរជាតិ។ ទីក្រុងម៉ូស្គូមានជំនឿថាបើទុកណាក្រុមបស្ចិមប្រទេសខ្លាចអ៊ីរ៉ង់ផលិតនុយក្លេអ៊ែរក៏ដោយ ក៏មិនគួរប្រើកម្លាំងយោធាដោះស្រាយបញ្ហាដែរ។ រុស្ស៊ីយល់ថាមធ្យោបាយដ៏ល្អបំផុតគឺប្រើប្រាស់នយោបាយការទូត។
រុស្ស៊ីសូមអំពាវនាវឱ្យគ្រប់ភាគីទាំងអស់ដែលជាប់ពាក់ព័ន្ធនឹងបញ្ហានុយក្លេអ៊ែរអ៊ីរ៉ង់សូមប្រើប្រាស់ការអត់ធ្មត់ជាអតិបរមាដើម្បីទប់ស្កាត់មិនឱ្យស្ថានការណ៍នេះជ្រួលច្របល់កាន់តែខ្លាំង។ បើមិនដូច្នេះទេអាចនឹងអូសទាញតំបន់មជ្ឈិមបូព៌ាទាំងមូលឱ្យធ្លាក់ចូលទៅក្នុងភ្នក់ភ្លើងសង្គ្រាមយ៉ាងពេញបន្ទុក។ ខាងលើនេះជាការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ