រាជធានីភ្នំពេញ ៖ កន្លងមក ក្រុមជ្រុលនិយមថៃមួយចំនួន ដែលមានការគាំទ្រពីពួកយោធានិយមសង្គ្រាម បានគំរាមកំហែងមកលើកម្ពុជា ហើយថៃបានបិទព្រំដែន ជាឯកតោភាគី បន្ថយចំនួនថ្ងៃស្នាក់នៅ ជាឯកតោភាគី…
រាជធានីភ្នំពេញ ៖ កន្លងមក ក្រុមជ្រុលនិយមថៃមួយចំនួន ដែលមានការគាំទ្រពីពួកយោធានិយមសង្គ្រាម បានគំរាមកំហែងមកលើកម្ពុជា ហើយថៃបានបិទព្រំដែន ជាឯកតោភាគី បន្ថយចំនួនថ្ងៃស្នាក់នៅ ជាឯកតោភាគី និងការគំរាមកាត់ភ្លើង កាត់អ៊ីនធើណែត ការរាយលួសបន្លា តាមច្រកព្រំដែនខ្លះ ដោយធ្វើតាមទំនើងចិត្ត រួចទៅហើយ បើបានជាជ្រុលរបៀបនេះទៅហើយ សម្ដេចតេជោ ហ៊ុន សែន បានជូនយោបល់ទៅរាជរដ្ឋាភិបាល ថា ក្រៅពីបញ្ហាប្តឹងទៅតុលាការយុត្តិធម៌អន្តរជាតិ (ICJ) កម្ពុជាគួរពិចារណាបញ្ឈប់ការចាក់ផ្សាយខ្សែភាពយន្តថៃលើកញ្ចក់ទូរទស្សន៍កម្ពុជាទាំងអស់ និងអាចឈានទៅបញ្ឈប់ការនាំទំនិញថៃមកប្រើក្នុងកម្ពុជា ។
សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានសរសេរនៅលើបណ្ដាញសង្គមហ្វេសប៊ុកផ្លូវការរបស់សម្ដេច នាយប់ថ្ងៃទី១២ ខែមិថុនា ឆ្នាំ២០២៥នេះថា ៖ «កន្លងមកក្រុមជ្រុលនិយមថៃ ដោយមានការគាំទ្រពីពួកយោធា ដែលនិយមសង្គ្រាម បានគំរាមមកកម្ពុជាថា នឹងកាត់ភ្លើងកាត់អ៊ីនធើណែត។ កាត់ភ្លើងអី បើកម្ពុជា មិនប្រើភ្លើងថៃផង។ កាត់អ៊ីនធើណែតអី បើកម្ពុជាមានអ៊ីនធើណែតប្រើគ្រប់គ្រាន់ហើយនោះ ។
សម្តេចតេជោ ហ៊ុន សែន បានអំពាវនាវ កុំឲ្យបញ្ហារីករាលដាលពីបញ្ហាជម្លោះយោធា នៅតំបន់មួយ រីករាលដាលដល់កន្លែងផ្សេងទៀត និងកុំរីករាលដាលដល់វិស័យផ្សេងទៀត។ ប៉ុន្តែពេលនេះវាបានរីករួចស្រេចទៅហើយ ដូចជា ការបិទព្រំដែនជាឯកតោភាគី បន្ថយចំនួនថ្ងៃស្នាក់នៅ ជាឯកតោភាគី និងការគំរាមកាត់ភ្លើង កាត់អ៊ីនធើណែត ការរាយលួសបន្លា តាមច្រកព្រំដែនខ្លះ ដោយធ្វើតាមទំនើងចិត្ត ។
បើបានជាជ្រុលរបៀបនេះទៅហើយ សម្តេចតេជោ ហ៊ុន សែន សូមជូនយោបល់ទៅរាជរដ្ឋាភិបាលកម្ពុជាថា ក្រៅពីបញ្ហាប្តឹងទៅតុលាការយុត្តិធម៌អន្តរជាតិ (ICJ) កម្ពុជា គួរពិចារណាបញ្ឈប់ការចាក់ផ្សាយខ្សែភាពយន្តថៃលើកញ្ចក់ទូរទស្សន៍កម្ពុជាទាំងអស់ និងអាចឈានទៅបញ្ឈប់ការនាំទំនិញថៃ មកប្រើក្នុងកម្ពុជា ផងដែរ ។
កម្ពុជាមិនគួរខ្លាចថៃ បណ្តេញពលករខ្មែរ ឲ្យត្រឡប់មកប្រទេសវិញ នោះទេ ព្រោះរឿងនេះ យើងក៏លំបាក ថៃខ្លួនឯងក៏លំបាក ដោយសារក្រុមហ៊ុនថៃ ខ្វះកម្លាំងពលកម្ម ដែលធ្វើឲ្យសេដ្ឋកិច្ចថៃ រងផលប៉ះពាល់មួយផ្នែកផងដែរ។ រឿងទាំងនេះ សុទ្ធតែជាផ្តល់មតិសម្រាប់ការពិចារណា តែរឿងគួរធ្វើភ្លាម គឺបញ្ឈប់ការចាក់បញ្ចាំងខ្សែភាពយន្តថៃ លើកញ្ចក់ទូរទស្សន៍កម្ពុជា» ។
ការប្រកាសរបស់ប្រមុខរាជរដ្ឋាភិបាលកម្ពុជា បែបនេះ ដោយសារ ថ្មីៗនេះ មានការចែកចាយព័ត៌មានតាមបណ្ដាញសង្គមជាច្រើន ពាក់ព័ន្ធនឹងការគំរាមរបស់ក្រុមជ្រុលនិយមថៃមួយចំនួន ឲ្យកាត់ផ្តាច់ការផ្គត់ផ្គង់អគ្គិសនី និងអ៊ីនធឺណិត មកកម្ពុជា ។
ឆ្លើយតបទៅនឹងបញ្ហានេះ សម្តេចមហាបវរធិបតី ហ៊ុន ម៉ាណែត ប្រកាសច្បាស់ថា ដើម្បីកុំឲ្យវែងឆ្ងាយ ឬបង្កការលំបាកសម្រាប់ភាគីថៃ ក្នុងការសម្រេចចិត្តកាត់ ឬមិនកាត់ ឬកាត់ពេលណានោះ កម្ពុជាបានសម្រេចចិត្តធានាការផ្គត់ផ្គង់អគ្គិសនី និងអ៊ីនធឺណិត ដោយខ្លួនឯង ដោយមិនចាំបាច់ពឹងផ្អែកការទិញពីប្រទេសថៃ ទៀតទេ ។
សម្តេចបវរធិបតី ហ៊ុន ម៉ាណែត បានបញ្ជាក់ថា ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ទើបរាយការណ៍មកសម្តេចថា ចាប់ពីម៉ោង ១២យប់ថ្ងៃនេះ ក្រុមហ៊ុនបណ្ដាញខ្សែកាបអុបទិក ឬប្រតិបត្តិករអ៊ីនធឺណិតទាំងអស់នៅកម្ពុជា និងបញ្ចប់ការទិញអ៊ីនធឺណិត (Internet Bandwidth) ពីប្រទេសថៃ ដោយសារ កម្ពុជាមានលទ្ធភាពផ្គត់ផ្គង់សេវាអ៊ីនធឺណិតគ្រប់គ្រាន់ ដោយខ្លួនឯង ។
ជាមួយគ្នានេះដែរ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ក៏បានបញ្ជាក់រួចហើយ អំពីសមត្ថភាពរបស់កម្ពុជា ក្នុងការផ្គត់ផ្គង់អគ្គិសនីនៅកម្ពុជាគ្រប់គ្រាន់ដោយខ្លួនឯង ។
បន្ថែមលើក្រសួងពីរខាងលើ សម្តេចបវរធិបតី បានបញ្ជាឲ្យក្រសួងស្ថាប័នរបស់កម្ពុជា ពិនិត្យ និងត្រៀមលក្ខណៈជាយថាហេតុ ដើម្បីដាក់ចេញ នូវវិធានការផ្សេងៗបន្ថែមទៀត ប្រសិនបើអ្នកមានការគំរាមកំហែងកាត់ផ្ដាច់អ្វីផ្សេងទៀត មកកម្ពុជាផងដែរ ៕
ចែករំលែកព័តមាននេះ