ខេត្តប៉ៃលិន ៖ បន្ទាប់ពីផ្ទៃមេឃ ចាប់ផ្តើមធ្លាក់ភ្លៀងខ្លាំងអស់រយៈពេលយូរ ពោលគឺចាប់តាំងពីម៉ោង១ និង៣០នាទីរសៀល រហូតដល់ម៉ោង៥ និង៣០នាទីល្ងាចនេះ ដែលធ្វើឱ្យទឹកផ្នែកខាងលើ នៃដងស្ទឹងប៉ៃលិន…
ខេត្តប៉ៃលិន ៖ បន្ទាប់ពីផ្ទៃមេឃ ចាប់ផ្តើមធ្លាក់ភ្លៀងខ្លាំងអស់រយៈពេលយូរ ពោលគឺចាប់តាំងពីម៉ោង១ និង៣០នាទីរសៀល រហូតដល់ម៉ោង៥ និង៣០នាទីល្ងាចនេះ ដែលធ្វើឱ្យទឹកផ្នែកខាងលើ នៃដងស្ទឹងប៉ៃលិន ហក់ឡើងខ្ពស់ គួរឱ្យកត់សម្គាល់ ដែលមានកំពស់រហូតដល់១.៨ម៉ែត្រ ជាកំពស់ទឹកមួយ ត្រូវបងប្អូនប្រជាពលរដ្ឋរស់នៅក្បែរមាត់ស្ទឹង សូមមានការប្រុងប្រយ័ត្នខ្ពស់ ។
ប្រភពព័ត៌មានបានឱ្យដឹងថា ស្ថានភាពជំនន់ទឹកភ្លៀងនេះ អាចនឹងធ្វើឱ្យតំបន់ទំនាបមួយចំនួន ដូចជាភូមិនានានៅក្នុងស្រុកសាលាក្រៅ ជាពិសេសប្រជាពលរដ្ឋ ដែលមានលំនៅឋានស្ថិតនៅជាប់នឹងដងស្ទឹងប៉ៃលិន អាចប្រឈមនឹងការលិចលង់ ដែលអាចធ្វើឱ្យរសាត់អណ្តែតរបស់របរសម្ភារៈប្រើប្រាស់ផងដែរ ។
ប្រភពបន្តទៀតថា ដើម្បីជៀសវាងទទួលរងនូវការខូចខាត និងផលប៉ះពាល់ជាយថាហេតុ ត្រូវឱ្យប្រជាពលរដ្ឋរស់នៅក្បែរៗមាត់ស្ទឹងប៉ៃលិន បង្កើនការយកចិត្តទុកដាក់ និងប្រុងប្រយ័ត្នខ្ពស់បំផុត ។
ប្រភពបញ្ជាក់ទៀតថា ដោយសារតែទឹកស្ទឹងហក់ឡើងខ្ពស់បែបនេះ ត្រូវឱ្យពុកម៉ែបងប្អូនយកចិត្តទុកដាក់ចំពោះកុមារ និងមនុស្សចាស់ជរាផងដែរ។ ចំណែកឯមន្ទីរធនធានទឹក និងឧត្តុនិយមខេត្តប៉ៃលិន នឹងបន្តតាមដានមើលស្ថានភាពទឹកស្ទឹងប៉ៃលិន ហើយនឹងផ្តល់ជូនដំណឹងជាបន្តបន្ទាប់ក្នុងករណីមានការប្រែប្រួលណាមួយកើតឡើង។
ចំណែកឯម្ចាស់រមណីយដ្ឋានម្លប់សាវម៉ាវលោក ញ៉ៅ សាគុន បានឱ្យដឹងថា ទឹកភ្លៀងធ្លាក់ខ្លាំង នៅផ្នែកខាងលើនៃតំបន់ជួរភ្នំខៀវ បានធ្វើឱ្យទឹកហូរធ្លាក់ចុះទៅក្នុងស្ទឹងយ៉ាងខ្មួលខ្មាញ់ បង្កការល្អក់កករ ហើយហូរបុកទៅក្រោមគួរឱ្យភ័យខ្លាច។ តែខាងលោក ក៏បានត្រៀមខ្លួនជាស្រេច ក្នុងការថែរក្សាសម្ភារៈផ្សេងៗ ដូចជារោងខ្យុស និងប្រដាប់ប្រដាលេងកម្សាន្តនៅក្នុងរមណីយដ្ឋាន មិនឱ្យទឹកទាញទៅតាមនោះឡើយ ។
លោកបន្តទៀតថា កាលពីឆ្នាំមុនៗ ជំនន់ទឹកភ្លៀងតែងតែអូសទាញយកនូវសម្ភារៈក្នុងខ្យុសរបស់ខ្លួន និងដួលរលំខ្យុសទៅតាមខ្សែទឹក បណ្តាលឱ្យខូចខាតអស់មួយចំនួន។ ទោះបីជាយ៉ាងណាក៏ដោយ រហូតមកដល់ពេលនេះ លោកនឹងខិតខំចងខ្សែរោងខ្យុសទាំងអស់ ដែលសង់នៅក្បែរមាត់ទឹកជាប់នឹងដើមឈើធំៗ មិនឱ្យរសាត់អណ្តែតបន្តទៀតនោះឡើយ ។
ចំណែកម្ចាស់រមណីយដ្ឋានចំការខ្នុរ អ្នកស្រី ទិត្យ ផល្លា ក៏បានឱ្យដឹងដែរថា កាលពីឆ្នាំមុនៗ ជំនន់ទឹកភ្លៀងបានទាញយកខ្យុសរបស់ខ្លួនអស់ជាច្រើនខ្នង បណ្តាលឱ្យខាតបង់ថវិកាជាច្រើន។ តែនៅពេលនេះ លោកស្រី ក៏ត្រូវតែប្រុងប្រយ័ត្នទាំងយប់ទាំងថ្ងៃ បើមានករណីជំនន់ទឹកភ្លៀងកើតឡើង គាត់នឹងប្រមូលប្រដាប់ប្រដានៅក្នុងរោងខ្យុសទុកឱ្យទាន់ពេលវេលា ជៀសវាងអណ្តែតទៅតាមទឹក ៕
ចែករំលែកព័តមាននេះ