រឿងទុរេនកំពុងតែផ្ទុះខ្លាំងរហូតមានបងប្អូនខ្លះលើកឡើងថា «បើគេស្រលាញ់យើង គេនឹងទិញទុរេនឱ្យយើងញ៉ាំហើយ» ។ ប្រាកដណាស់ ទុរេនឆ្ងាញ់ ហើយថែមទាំងមានអត្ថប្រយោជន៍ច្រើនយ៉ាងមិននឹកស្មានមិនដល់ ។ លោកអ្នកដឹងថា ទុរេនមិនត្រឹមតែឆ្ងាញ់ប៉ុណ្ណោះទេ…
រឿងទុរេនកំពុងតែផ្ទុះខ្លាំងរហូតមានបងប្អូនខ្លះលើកឡើងថា «បើគេស្រលាញ់យើង គេនឹងទិញទុរេនឱ្យយើងញ៉ាំហើយ» ។ ប្រាកដណាស់ ទុរេនឆ្ងាញ់ ហើយថែមទាំងមានអត្ថប្រយោជន៍ច្រើនយ៉ាងមិននឹកស្មានមិនដល់ ។
លោកអ្នកដឹងថា ទុរេនមិនត្រឹមតែឆ្ងាញ់ប៉ុណ្ណោះទេ ប៉ុន្តែការញ៉ាំទុរេន អាចជួយកាត់បន្ថយជំងឺបាក់ទឹកចិត្ត បង្កើនឱកាសនៃការមានកូន ជួយអោយសម្រស់ស្រស់ស្អាតក្មេងជាងវ័យ សម្រកគីឡូ ហើយក៏ជាថ្នាំសណ្តំធម្មជាតិដ៏ល្អជួយឱ្យគេងលក់ស្កប់ ជាពិសេស ជួយ ការពារជំងឺមហារីក និងជំងឺបេះដូងថែមទៀតផង ។ នេះបើយោងតាមការចុះផ្សាយរបស់សារព័ត៌មានវៀតណាម VN Express ក្រោយចំណងជើងថា «អត្ថប្រយោជន៍៧យ៉ាង ដែលមិននឹកស្មានដល់របស់ផ្លែទុរេន» ។
លោកវេជ្ជបណ្ឌិត Huynh Tan Vu មកពីសាកលវិទ្យាល័យវេជ្ជសាស្ត្រ និងឱសថសាស្ត្រនៅទីក្រុងហូជីមិញបានពន្យល់នៅក្នុងបទសម្ភាសន៍ផ្តាច់មុខដល់សារព័ត៌មានវៀតណាម VN Expressថា ផ្លែទុរេនសម្បូរទៅដោយវីតាមីនA, B6, និង C, អាស៊ីតហ្វូលិក, ជាតិ Thiamin, riboflavin និង niacin ។ ពួកគេក៏ផ្តល់សារធាតុរ៉ែសំខាន់ៗដូចជា ប៉ូតាស្យូម ជាតិដែក កាល់ស្យូម ម៉ាញ៉េស្យូម សូដ្យូម ស័ង្កសី និងផូស្វ័រ។ លោកវេជ្ជបណ្ឌិតបន្តថា សាច់ទុរេន សម្បូរទៅដោយសារធាតុចិញ្ចឹម ទឹក ប្រូតេអ៊ីន និងជាតិសរសៃដែលមានប្រយោជន៍ និងជួយពង្រឹងសុខភាពទូទៅយ៉ាងខ្លាំង។
ខាងក្រោមនេះ ជាអត្ថប្រយោជន៍សុខភាពពិសេសទាំង ៧ របស់ផ្លែទុរេន៖
១-កាត់បន្ថយភាពស្លេកស្លាំង និងពង្រឹងសុខភាពគភ៌សម្រាប់ស្ត្រីមានផ្ទៃពោះ៖ ទុរេនសម្បូរទៅដោយអាស៊ីតហ្វូលិក ដែលមានសារៈសំខាន់សម្រាប់ការផលិតអេម៉ូក្លូប៊ីន និងដើរតួយ៉ាងសំខាន់ក្នុងការមានផ្ទៃពោះ ដោយជំរុញការលូតលាស់ជាលិកា និងការពារខួរក្បាល និងឆ្អឹងខ្នងរបស់ទារក។
២-ពង្រឹងសុខភាពឆ្អឹង៖
ទុរេនមានផ្ទុកសារធាតុរ៉ែសំខាន់ៗ រួមទាំងកាល់ស្យូម និងប៉ូតាស្យូម។ ទោះបីជាមានកាល់ស្យូមតិចតួច ប៉ុន្តែការបរិភោគសាច់ទុរេននឹងអាចបំពេញសារធាតុប៉ូតាស្យូមប្រហែល ៩% នៃតម្រូវការប្រចាំថ្ងៃរបស់យើង។
៣-កាត់បន្ថយការធ្លាក់ទឹកចិត្ត និងបង្កើនគុណភាពនៃការគេង៖
ទុរេនមានផ្ទុកសារធាតុ tryptophan ដែលជាអាស៊ីតអាមីណូ ដើរតួនាទីសំខាន់សម្រាប់ជំរុញការគេង។ ពេលលោកអ្នកញ៉ាំទុរេន នឹងជួយបង្កើនអ័រម៉ូត serotonin និង melatonin ដែលជួយកាត់បន្ថយភាពតានតឹង គេងមិនលក់ ថប់បារម្ភ រវើររវាយ និងការធ្លាក់ទឹកចិត្តជាដើម។
៤-ការពារជំងឺមហារីក
ទុរេនសម្បូរទៅដោយសារធាតុប្រឆាំងអុកស៊ីតកម្ម និងពង្រឹងប្រព័ន្ធការពាររាងកាយ។ សារធាតុប្រឆាំងអុកស៊ីតកម្មទាំងនេះរួមមាន វីតាមីន C វីតាមីន B-complex និងវីតាមីន E ក៏ដូចជាសារធាតុពិសេសៗចាំបាច់ ដែលមានប្រសិទ្ធភាពប្រឆាំងនឹងកោសិកាមហារីក។
៥-សម្រួលដល់ប្រព័ន្ធរំលាយអាហារ៖
ទុរេនសម្បូរទៅដោយកាកសរសៃFiber ដែលមានសារៈសំខាន់សម្រាប់ការរក្សាសុខភាពផ្លូវរំលាយអាហារ និងកាត់បន្ថយជំងឺរាគរួស។
៦-ការពារភាពចាស់
ទុរេនមានលក្ខណៈសម្បត្តិប្រឆាំងអុកស៊ីតកម្មដ៏ខ្លាំងក្លាដែលទទួលបានពីវីតាមីន និងសមាសធាតុសរីរាង្គដែលជួយបន្សាបរ៉ាឌីកាល់សេរីនៅក្នុងរាងកាយ។ ដូច្នេះហើយ ការទទួលទានផ្លែធុរេនអាចកាត់បន្ថយហានិភ័យនៃភាពចាស់មុនអាយុ និងពន្យារការលេចចេញនូវស្នាមជ្រីវជ្រួញ តាមកន្ទុយភ្នែក ជួយអោយភ្នែកភ្លឺ កាត់បន្ថយការជ្រុះសក់ កាត់បន្ថយការពុកធ្មេញ កាត់បន្ថយការរលាកសន្លាក់ ជាពិសេសគឺជំងឈមហារីក និងបេះដូង។
៧-បង្កើនឱកាសនៃការមានកូន៖
ការស្រាវជ្រាវបង្ហាញថា ផ្លែធុរេនមានផ្ទុកអរម៉ូនអ៊ឹស្ត្រូសែនខ្ពស់ ដែលជាអរម៉ូនដ៏សំខាន់សម្រាប់ការបន្ទោរបង់ ដើរតួជាឱសថធម្មជាតិ។ ទុរេនក៏អាចបង្កើនចំណង់ផ្លូវភេទ និងភាពរឹងមាំ កាត់បន្ថយហានិភ័យនៃការគ្មានកូនក្នុងភេទទាំងពីរ និងធ្វើអោយមេជីវិតឈ្មោលមានចលនាប្រសើរឡើង។
ទោះជាល្អបែបនេះក៏ដោយ មិនខុសពីអារហារផ្លែឈើដទៃទៀតហើយ ការទទួលទានទុរេន គួរតែស្ថិតក្នុងបរិមាណសមល្មម បើហូបច្រើនពេក ក៏អាចនាំអោយមកនូវផលប៉ះពាល់ដល់សុខភាពដូចគ្នា ។ ទុរេន ជាប្រភេទផ្លែឈើដែលផ្តល់កម្ដៅដល់រាងកាយ ដូច្នោះហើយហូបទុរេនច្រើនពេក នឹងធ្វើឱ្យលោកស្ងួតក និងឈឺបំពង់ក។ ជាតិសរសៃដែលមិនងាយរលាយរបស់វាក៏អាចធ្វើឱ្យឈឺពោះ និងហើមពោះដែរ ប្រសិនបើញ៉ាំច្រើនពេក។
ទុរេនគ្មានកូលេស្តេរ៉ុល និងខ្លាញ់ដែលបង្កគ្រោះថ្នាក់ ប៉ុន្តែមានកាឡូរីដ៏ច្រើន ក៏អាចធ្វើឱ្យឡើងទម្ងន់បានយ៉ាងឆាប់រហ័សពេលទទួលទានវាច្រើនជាប់ជាប្រចាំ ជាពិសេស កម្រិតជាតិស្ករខ្ពស់របស់ទុរេន មិនស័ក្តិសមឡើយសម្រាប់មនុស្សដែលមានជំងឺទឹកនោមផ្អែម ជំងឺធាត់ ឬជំងឺលើសឈាម។
ស្ត្រីមានផ្ទៃពោះគួរចៀសវាងការញ៉ាំទុរេនច្រើនពេកដែរ ដើម្បីការពារកុំអោយហើមពោះ និងមិនរំលាយអាហារ។ មនុស្សចំណាស់ក៏ដូចគ្នា គួរតែទទួលទានទុរេនតិចតួចបានហើយ ដើម្បីជៀសវាងការស្ទះពោះវៀន និងទល់លាមកជាដើម៕
ចែករំលែកព័តមាននេះ