រដ្ឋមន្ត្រីក្រសួងរ៉ែ និងថាមពល ៖ កម្ពុជាមានអគ្គិសនីគ្រប់គ្រាន់ មិនមានការផ្គត់ផ្គង់អគ្គិសនីពីថៃនោះទេ
រាជធានីភ្នំពេញ ៖ ឯកឧត្ដម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់នៅល្ងាចថ្ងៃទី១១ ខែមិថុនា ឆ្នាំ២០២៥នេះថា…
រាជធានីភ្នំពេញ ៖ ឯកឧត្ដម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់នៅល្ងាចថ្ងៃទី១១ ខែមិថុនា ឆ្នាំ២០២៥នេះថា បណ្ដាញអគ្គិសនីជាតិរបស់កម្ពុជា បច្ចុប្បន្ន មិនមានការនាំចូលអគ្គិសនីពីប្រទេសថៃ មកផ្គត់ផ្គង់នោះទេ ។
ការបញ្ជាក់នេះ ធ្វើឡើងដើម្បីឆ្លើយតបទៅនឹងព័ត៌មានមិនពិតមួយចំនួន ដែលបានផ្សព្វផ្សាយលើបណ្ដាញសង្គមថា ភាគីថៃ នឹងផ្ដាច់អគ្គិសនីពីកម្ពុជា ប្រសិនបើកម្ពុជា មិនព្រមទទួលយកសំណើរបស់ថៃ ក្នុងកិច្ចចរចា ថ្ងៃទី១៤ មិថុនា ២០២៥ ខាងមុខ ។
ឯកឧត្តមរដ្ឋមន្ត្រី បានសង្កត់ធ្ងន់ថា ៖ «អគ្គិសនីរបស់ព្រះរាជាណាចក្រកម្ពុជា នាពេលបច្ចុប្បន្ននេះ មិនបានយកអគ្គិសនីពីប្រទេសថៃមកផ្គត់ផ្គង់នោះទេ ព្រោះយើងមានអគ្គិសនីដើម្បីផ្គត់ផ្គង់គ្រប់គ្រាន់ ។ ហើយបណ្ដាញអគ្គិសនីជាតិរបស់យើង មិនមានការយកភ្លើងពីថៃ ចូលបណ្ដាញអគ្គិសនីជាតិរបស់យើងនោះទេ» ។
នេះបង្ហាញថា កម្ពុជាមានលទ្ធភាពគ្រប់គ្រាន់ក្នុងការផ្គត់ផ្គង់តម្រូវការអគ្គិសនី ក្នុងស្រុកដោយខ្លួនឯង ដោយមិនពឹងផ្អែកលើការនាំចូលពីប្រទេសជិតខាងឡើយ ៕
ចែករំលែកព័តមាននេះ