ខេត្តកំពង់ឆ្នាំង ៖ ថ្លែងនៅក្នុងពិធីបិទវគ្គហ្វឹកហ្វឺនមូលដ្ឋានគ្រឹះ និងអ្នកឯកទេសបញ្ជាសុន.ខ ប្រតិបត្តិការហិតគ្រឿងញៀន និងការប្រគល់ទទួលសុនខ ជំនាញគ្រឿងញៀនចំនួន១០ក្បាល ជូនអគ្គស្នងការនគរជាតិ នៅវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់…
ខេត្តកំពង់ឆ្នាំង ៖ ថ្លែងនៅក្នុងពិធីបិទវគ្គហ្វឹកហ្វឺនមូលដ្ឋានគ្រឹះ និងអ្នកឯកទេសបញ្ជាសុន.ខ ប្រតិបត្តិការហិតគ្រឿងញៀន និងការប្រគល់ទទួលសុនខ ជំនាញគ្រឿងញៀនចំនួន១០ក្បាល ជូនអគ្គស្នងការនគរជាតិ នៅវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់ ខេត្តកំពង់ឆ្នាំង នៅព្រឹកថ្ងៃទី១១ ខែមិថុនា ឆ្នាំ២០២៥ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា មានប្រសាសន៍ថា នេះជាលើកទីមួយហើយដែលវិទ្យាស្ថានបច្ចេកទេសសកម្មភាពកំចាត់មានស៊ីម៉ាក់បានប្រគល់ សុនខ ជំនាញហិតមីន ជូនអគ្គស្នងការនគរបាលជាតិ ។
ពិធីនេះ ក៏មានការអញ្ជើញជាអធិបតីពីឯកឧត្តម ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ តំណាងដ៍ខ្ពង់ខ្ពស់ ឯកឧត្តម ស សុខា អគ្គស្នងការនគរបាលជាតិ ព្រមទាំងមានការចូលរួមពីមន្ត្រីស៊ីម៉ាក់ និងសិក្ខាកាមជាច្រើនរូបទៀត។ ឯកឧត្តមបានបន្តថា សុនខ ឯកទេសប្រតិបត្តិការហិតគ្រឿងញៀនចំនួន១០ក្បាល ដែលប្រគល់ជូនអគ្គស្នងការនគរបាលជាតិ នាពេលនេះ ថ្វីបើមិនច្រើនពិតមែន ប៉ុន្តែនេះជាហានទីមួយ ដែលវិទ្យាស្ថានបច្ចេកទេសសកម្មភាពកំចាត់មីនបានប្រគល់ សុនខ ឯកទេសហិតគ្រឿងញៀន ទៅអគ្គស្នងការនគរបាលជាតិ ។
ជាមួយនឹងការប្រគល់ទទួលនូវសុនខ ជំនាញហិតគ្រឿងញៀន១០ក្បាល ជូនអគ្គស្នងការនគរបាលជាតិនាពេលនេះ ឯកឧត្តមក៏សូមផ្ដាំផ្ញើដល់ប្អូនៗជាសិក្ខាកាមដែលបានចូលមកហ្វឹកហាត់ជំនាញបញ្ជាសុនខហិតគ្រឿងញៀន សូមត្រឡប់ទៅវិញយកចិត្តទុកដាក់ថែរក្សា សុនខ ដែលខ្លួនមានតួនាទីគ្រប់គ្រងនិងត្រូវបង្វឹកហាត់បន្ថែមទៀត ដើម្បីក្រើនរំលឹកមេរៀនដល់សត្វសុនខឲ្យកាន់តែស្ទាត់ជំនាញព្រោះបើយើងមិនបង្ហាត់វាទៀងទាត់ទេ វាងាយនឹងភ្លេចវិញដែរ ។
សង្ឃឹមថា ប្អូនៗជាសិក្ខាកាមពេលត្រឡប់ទៅអង្គភាពវិញនឹងចងចាំនូវរាល់វិធីសាស្ត្រ នីតិវិធីនិងបច្ចេកទេសបញ្ជាសុនខប្រតិបត្តិការហិតរកគ្រឿងញៀនដែលហ្វឹកហ្វឺនកន្លងមក ដោយសមត្ថភាពពេញលេញក្នុងការអនុវត្តន៍អំពីបច្ចេកទេសបញ្ជា ។ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមជ្ឈមណ្ឌលសកម្មភាព កំចាត់មីនកម្ពុជា បានរំលឹកពីអតីតកាលដែលកន្លងមកយើងទទួលទិញសត្វសុនខ ពីបរទេស ជួបការលំបាកនិងមានតម្លៃថ្លៃ ។ ប៉ុន្តែបច្ចុប្បន្ននេះ យើងមានសុនខ ដែលបានបង្កាត់ដោយខ្លួនឯង ព្រមទាំងមានជំនាញហិតមីន ហិតគ្រឿងញៀន ដើម្បីចូលរូមក្នុងការបង្ក្រាបបទល្មើសនានាផងដែរ។
យោងតាមរបាយការណ៍របស់លោកឧត្តមសេនីយ៍ទោ ឈិន ប៊ុនរ៉ាន នាយកវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់ ខេត្តកំពង់ឆ្នាំង បានឱ្យដឹងថា៖ វគ្គហ្វឹកហ្វឺនមូលដ្ឋានគ្រឹះនិងអ្នកឯកទេសបញ្ជាសុនខប្រតិបត្តិការហិតគ្រឿងញៀន ជំនាន់ទី០១ មានសិក្ខាកាមសរុបចំនួន២៥នាក់ (នគរបាល២០នាក់ និងបុគ្គលិកស៊ីម៉ាក់៥នាក់) ដោយបានចាប់ផ្តើមដំណើរការសិក្សាពីថ្ងៃទី០៣ ខែកុម្ភៈ ដល់ថ្ងៃទី០៩ ខែឧសភា ឆ្នាំ២០២៥ មាន រយះពេលចំនួន៩៦ថ្ងៃ។
ជាលទ្ធផល វគ្គសិក្សាទទួលបានគួរជាទីពេញចិត្ត ចំណាត់ថ្នាក់ និទ្ទេសល្អប្រសើរចំនួន០៣នាក់ និទ្ទេសល្អចំនួន០៥នាក់ និទ្ទេសល្អបង្គួរចំនួន១៤នាក់ និងនិទ្ទេសមធ្យមចំនួន០៣នាក់។
ចែករំលែកព័តមាននេះ