បិទព្រំដែនប៉ុន្មានថ្ងៃ ក្រុមអ្នកជំនួញថៃចាប់ផ្តើមត្អូញត្អែរថា ពួកគេខាតបង់រាប់រយលានបាត
ថៃ ៖ សហព័ន្ធឧស្សាហកម្មថៃ ហៅកាត់ថា (FTI) បានព្រមាននៅថ្ងៃអង្គារ ទី១០ ខែមិថុនា ឆ្នាំ២០២៥ថា វិធានការបិទព្រំដែនថៃ-កម្ពុជា…
ថៃ ៖ សហព័ន្ធឧស្សាហកម្មថៃ ហៅកាត់ថា (FTI) បានព្រមាននៅថ្ងៃអង្គារ ទី១០ ខែមិថុនា ឆ្នាំ២០២៥ថា វិធានការបិទព្រំដែនថៃ-កម្ពុជា អាចប៉ះពាល់ដល់ពាណិជ្ជកម្មព្រំដែន ដែលមានតម្លៃ១៧០ពាន់លានបាត ។
ប្រធាន FTI លោក Kriengkrai Thiennukul បានថ្លែងថា វិធានការដែលពាក់ព័ន្ធនឹងការបើក និងបិទច្រកព្រំដែន តាមកាលវិភាគរបស់យោធានឹងធ្វើឱ្យមានការរំខានដល់ការដឹកជញ្ជូនទំនិញឆ្លងកាត់ព្រំដែន ។ ប្រធាន FTI បានកត់សម្គាល់ថា សមាជិក FTI មួយចំនួន បានចាប់ផ្តើមទទួលបានផលប៉ះពាល់ជាអវិជ្ជមានរួចទៅហើយ បើទោះបីជាបច្ចុប្បន្ននៅមិនទាន់អាចវាយតម្លៃពីទំហំនៃការខូចខាតក៏ដោយចុះ ។
លោក Kriengkrai Thiennukul បានពន្យល់ថា ពាណិជ្ជកម្មតាមព្រំដែនរបស់ប្រទេសថៃជាមួយកម្ពុជា មានតម្លៃប្រមាណ១៧០ពាន់លានបាត ក្នុងមួយឆ្នាំ ដោយច្រកអន្តរជាតិ Aranyaprathet នៃខេត្តស្រះកែវ គឺផ្តាច់មុខគេក្នុងការជួញដូរពាណិជ្ជកម្មដែលមានទំហំច្រើនបំផុត ដែលស្មើនឹងប្រមាណ១១០ពាន់លានបាត ឬប្រហែល៦៤% នៃតម្លៃសរុប ។
លោកKriengkraiបានបន្តថា៖ «នៅពេលនេះ វាពិបាកក្នុងការវាយតម្លៃផលប៉ះពាល់ទាំងស្រុង ប៉ុន្តែប្រសិនបើយើងគណនាដោយផ្អែកលើតម្លៃនាំចេញសរុបប្រចាំថ្ងៃ វានឹងមានប្រមាណ៥០០លានបាតក្នុងមួយថ្ងៃ» ។ «ទោះជាយ៉ាងណាក៏ដោយ វាគួរតែត្រូវបានយល់ថា មិនមែនទាំងអស់នៃ៥០០លានបាតនេះ ត្រូវបានប៉ះពាល់ទាំងអស់នោះទេ ។ មានតែផ្នែកមួយប៉ុណ្ណោះ ដែលត្រូវបានប៉ះពាល់ ដូច្នេះយើងអាចនិយាយបានថាវាប៉ះពាល់ខ្លះៗ» ។
យ៉ាងណាក៏ដោយ លោក Kriengkrai សង្ឃឹមថា ស្ថានការណ៍នឹងមិនអូសបន្លាយយូរពេកទេ ព្រោះការពន្យារពេលកាន់តែយូរ ជះឥទ្ធិពលអាក្រក់កាន់តែខ្លាំង ។ លោកទទួលស្គាល់ថា វិធានការវិសាមញ្ញបែបនេះនឹងបង្កការរំខានដោយជៀសមិនរួច ប៉ុន្តែលោកយល់ថា វិធានការទាំងនេះចាំបាច់ ដើម្បីសម្រួលដល់ការចរចាដោយសន្តិវិធី ។
ជាការពិតណាស់ ជម្លោះនឹងធ្វើឱ្យទាំងថៃ និងកម្ពុជារងគ្រោះ ។ ប្រទេសថៃមានអតិរេកពាណិជ្ជកម្មពីការនាំចេញទំនិញប្រើប្រាស់ ប្រេងឥន្ធនៈ គ្រឿងចក្រ និងម៉ាស៊ីន ដែលនឹងត្រូវរងផលប៉ះពាល់ ។ ប៉ុន្តែគ្មាននរណាម្នាក់ចង់ឱ្យរឿងនេះកើតឡើងទេ ។ «យើងសង្ឃឹមថា កិច្ចចរចានឹងផ្តល់លទ្ធផលល្អ ដោយមានការយោគយល់គ្នាទៅវិញទៅមក ដែលអនុញ្ញាតឱ្យច្រកទ្វារអន្តរជាតិអាចវិលមករកភាពប្រក្រតីឡើងវិញ ដូច្នេះភាគីទាំងពីរអាចបន្តពាណិជ្ជកម្មឡើងវិញដោយគ្មានការរំខានបន្ថែមទៀត» ។
លោក Kriengkrai បញ្ជាក់ថា មិនមានវិធានការគាំទ្រនៅពេលនេះទេ ដោយសារ FTI កំពុងរង់ចាំលទ្ធផលនៃការចរចាដែលកំពុងបន្ត ។ លោកបានកត់សម្គាល់ថា រហូតមកដល់ពេលនេះការចរចាមានដំណើរការជាវិជ្ជមាន ហើយជាសំណាងល្អដែលមិនមានការប្រយុទ្ធគ្នា ឬសង្គ្រាម ។
លោកបានពន្យល់បន្ថែមថា ភាគីទាំងពីរបានដោះស្រាយស្ថានការណ៍មុនពេលវាឈានដល់ការប្រឈមមុខដាក់គ្នា ។ លោកបានបន្ថែមថា ការផ្ទុះសង្គ្រាមនឹងបង្កការខូចខាតយ៉ាងសំខាន់ដល់ភាគីទាំងសងខាង និងរំខានយ៉ាងខ្លាំងដល់ជីវភាពរស់នៅប្រចាំថ្ងៃ និងពាណិជ្ជកម្មដែលនឹងធ្វើឱ្យខូចដល់ភាគីពាក់ព័ន្ធទាំងអស់៕
ចែករំលែកព័តមាននេះ