រាជធានីភ្នំពេញ ៖ ទណ្ឌិតចំនួន១៩២នាក់ ត្រូវបានផ្ទេរពីពន្ធនាគារខេត្តកណ្តាលទៅកាន់មណ្ឌលអប់រំកែប្រែទី៤ ក្នុងខេត្តពោធិ៍សាត់ កាលពីថ្ងៃទី៧ ខែមិថុនា ២០២៥កន្លងទៅ ដើម្បីដោះស្រាយភាពចង្អៀតណែនក្នុងពន្ធនាគារ ។នេះបើយោងតាមការចេញផ្សាយរបស់អគ្គនាយកដ្ឋានពន្ធនាគារ…
រាជធានីភ្នំពេញ ៖ ទណ្ឌិតចំនួន១៩២នាក់ ត្រូវបានផ្ទេរពីពន្ធនាគារខេត្តកណ្តាលទៅកាន់មណ្ឌលអប់រំកែប្រែទី៤ ក្នុងខេត្តពោធិ៍សាត់ កាលពីថ្ងៃទី៧ ខែមិថុនា ២០២៥កន្លងទៅ ដើម្បីដោះស្រាយភាពចង្អៀតណែនក្នុងពន្ធនាគារ ។នេះបើយោងតាមការចេញផ្សាយរបស់អគ្គនាយកដ្ឋានពន្ធនាគារ ។
លោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារ បានបញ្ជាក់ប្រាប់ សារព័ត៌មានឌីជីថលកាលពីពេលថ្មីៗនេះថា បច្ចុប្បន្ន នៅពន្ធនាគារខេត្តកណ្ដាល មានអ្នកជាប់ឃុំប្រមាណ ៤ ០០០នាក់ ខណៈអ្នកជាប់ឃុំនៅមណ្ឌលកែប្រែទី៤ មានប្រមាណ ២ ០០០នាក់ប៉ុណ្ណោះ ។
ក្រៅពីដោះស្រាយបញ្ហាចង្អៀតណែន ការផ្ទេរទណ្ឌិតចំនួន ១៩២នាក់ គឺដើម្បីគិតគូរពីការអនុវត្តកម្មវិធីអប់រំ កែប្រែ និងបណ្ដុះបណ្ដាលវិជ្ជាជីវៈ ដល់ទណ្ឌិតផងដែរ ។ លោក ឃៀង សុណាឌីន បានប្រាប់ពីយន្តការនៃដោះស្រាយភាពចង្អៀតណែនក្នុងពន្ធនាគារបន្ថែមបែបនេះ «យើងខិតខំពង្រីកផ្ទៃក្រឡានៃកន្លែងឃុំខ្លួន តាមបណ្ដាពន្ធនាគារមួយចំនួន ។
ខាងក្រសួង និងមន្ទីរសង្គមកិច្ច អតីតយុទ្ធជន និងយុវនីតិសម្បទា ក៏មានមណ្ឌលស្ដារនីតិសម្បទាសម្រាប់ឃុំអនីតិជន ។ ហេតុនេះ យើងអាចផ្ទេរជនជាប់ឃុំមិនទាន់គ្រប់អាយុទៅទីនោះបានខ្លះ» ។
ដើម្បីដោះស្រាយការកកស្ទះក្នុងពន្ធនាគារ ក្រសួងយុត្តិធម៌ក៏មានយន្តការបន្ធូរបន្ថយ និងលើកលែងទោសដល់ទណ្ឌិត រាល់ពេលមានបុណ្យជាតិធំៗ ។ ក្រៅពីនេះ ក្រសួងក៏កំពុងជំរុញការអនុវត្តទោសសហគមន៍ដែរ ។ នេះបើតាមការបញ្ជាក់បន្ថែមរបស់លោក ឃៀង សុណាឌីន ៕
ចែករំលែកព័តមាននេះ