ទីក្រុងវីយេន៖ មានហេតុការណ៍បាញ់ប្រហារនៅក្នុងបរិវេណសាលារៀននៃទីក្រុងហ្គ្រេស (Graz) ប្រទេសអូទ្រីស បណ្ដាលឱ្យស្លាប់មនុស្សយ៉ាងតិច៩នាក់។ នៅក្នុងចំណោមនោះក៏មានកុមារមួយចំនួនផងដែរ។ នេះបើយោងតាមការបញ្ជាក់របស់អភិបាលក្រុងខាងលើ។ បន្ទាប់ពីបាញ់ប្រហាររួច ជនប្រដាប់អាវុធដែលជាជនដៃដល់ក៏តម្រង់កាណុងកាំភ្លើងបាញ់ខ្លួនឯងថែមទៀត។ អភិបាលក្រុងហ្គ្រេស…
ទីក្រុងវីយេន៖ មានហេតុការណ៍បាញ់ប្រហារនៅក្នុងបរិវេណសាលារៀននៃទីក្រុងហ្គ្រេស (Graz) ប្រទេសអូទ្រីស បណ្ដាលឱ្យស្លាប់មនុស្សយ៉ាងតិច៩នាក់។ នៅក្នុងចំណោមនោះក៏មានកុមារមួយចំនួនផងដែរ។ នេះបើយោងតាមការបញ្ជាក់របស់អភិបាលក្រុងខាងលើ។ បន្ទាប់ពីបាញ់ប្រហាររួច ជនប្រដាប់អាវុធដែលជាជនដៃដល់ក៏តម្រង់កាណុងកាំភ្លើងបាញ់ខ្លួនឯងថែមទៀត។ អភិបាលក្រុងហ្គ្រេស លោកអេលខឺ ខា (Elke Kahr) ចាត់ទុកព្រឹត្តិការណ៍នេះជាសោកនាដកម្មដ៏អាក្រក់បំផុត។
ក្រោយហេតុការណ៍នេះ មនុស្សយ៉ាងតិច២៨នាក់ត្រូវគេបញ្ជូនទៅព្យាបាលមុខរបួសនៅមន្ទីរពេទ្យ។ ក្នុងនោះ ៤នាក់រងរបួសធ្ងន់។ អាជ្ញាធរបានចេញសេចក្ដីប្រកាសអាសន្នទៅកាន់មន្ទីរពេទ្យក្នុងស្រុក និងមណ្ឌលសុខភាព២ទៀតដែលសាងសង់នៅជិតសាលារៀនខាងលើនេះ។ នគរបាលអូទ្រីសបញ្ជាក់ថាខ្លួនបានបញ្ជូនកម្លាំងទៅកាន់កន្លែងកើតហេតុ រួមជាមួយភ្នាក់ងារសង្គ្រោះបន្ទាន់។ ពួកគេជឿជាក់ថាជនប្រដាប់អាវុធរូបនោះបានប្រព្រឹត្តអំពើបាញ់ប្រហារនេះតែម្នាក់ឯងប៉ុណ្ណោះ។
អាជ្ញាធរបានបញ្ជូនកងកម្លាំងពិសេសទៅកន្លែងកើតហេតុនៅសាលាមធ្យមសិក្សាមួយកន្លែងក្រោយម៉ោង១០ព្រឹក។ នគរបាលចេញសេចក្ដីថ្លែងការណ៍ថាប្រតិបត្តិការទ្រង់ទ្រាយធំរបស់នគរបាលកំពុងបន្តនៅក្នុងបរិវេណសាលារៀននោះ។ លទ្ធផលស៊ើបអង្កេតបឋមបង្ហាញថាគេស្ដាប់ឮសំឡេងគ្រាប់កាំភ្លើងជាច្រើនគ្រាប់បាញ់នៅក្នុងបរិវេណសាលា។ អាជ្ញាធរប្រកាបប្រាប់ឱ្យប្រជាជនកុំធ្វើដំណើរទៅក្បែរកន្លែងកើតហេតុ ហើយត្រូវអនុវត្តតាមការណែនាំរបស់កងសន្តិសុខនៅទីនោះ។
ដំណឹងនេះបានលេចឮដល់ប្រធានាធិបតីអូទ្រីស លោកអាឡិចសាន់ដឺ វ៉ាន់ ឌែ ប៊ែឡឹន (Alexander Van der Bellen) រួចហើយ។ លោកថ្លែងថាព្រឹត្តិការណ៍ដ៏រន្ធត់នេះហួសពីការពិពណ៌នា។ ពួកជនរងគ្រោះសុទ្ធតែជាមនុស្សវ័យក្មេងដែលនៅមានអនាគតវែងឆ្ងាយតទៅទៀត។ ជនរងគ្រោះម្នាក់ជាគ្រូបង្រៀនដែលចូលរួមរៀបចំអនាគតសម្រាប់ពួកគេក៏ស្លាប់នៅក្នុងហេតុការណ៍នោះផងដែរ។
ប្រធានគណៈកម្មការអឺរ៉ុប លោកស្រីឡីយឹន បានសម្ដែងការសោកស្ដាយចំពោះហេតុការណ៍នេះរ។ លោកស្រីបង្ហោះសារនៅលើបណ្ដាញអ៊ិចថាសាលារៀនជានិមិត្តរូបនៃយុវជន សេចក្ដីសង្ឃឹម និងអនាគតរបស់ពួកគេ។ លោកស្រីយល់ថាវាជារឿងដែលពិបាកនឹងទទួលយកបាននៅពេលសាលារៀនក្លាយជាទីកន្លែងពិឃាតមនុស្ស និងកើតមានអំពើហិង្សាដូច្នេះ៕
ចែករំលែកព័តមាននេះ