ទីក្រុងគូឡាឡាំពួរ៖ មានហេតុការណ៍រថយន្តបុកគ្នាយ៉ាងពេញទំហឹងនៅលើកំណាត់ផ្លូវហាយវ៉េនៃប្រទេសម៉ាឡេស៊ីបណ្ដាលឱ្យស្លាប់មនុស្ស១៥នាក់សុទ្ធតែជានិស្សិតសាកលវិទ្យាល័យ។ ដំណឹងនេះលេចឮដល់នាយករដ្ឋមន្ត្រីម៉ាឡេស៊ី លោកអាន់វ៉ាអ៊ីប្រាហ៊ីមរួចហើយ។ លោកបានបញ្ជាឱ្យសមត្ថកិច្ចស៊ើបអង្កេតជាបន្ទាន់។ សាក្សីនិយាយថាហេតុការណ៍នោះកើតឡើងនៅលើផ្លូវអ៊ីសវេស (East-West)។ ១គ្រឿងជារថយន្តបឺសដឹកនិស្សិត រីឯ១គ្រឿងទៀតជារថយន្តប៉េរ៉ូឌ្យួ អាល់ហ្សា (Perodua Alza)។
លទ្ធផលស៊ើបអង្កេតបឋមរបស់សមត្ថកិច្ចបង្ហាញថារថយន្តបឺសជាអ្នកបង្កហេតុ និងបានប៉ះទង្គិចនឹងរថយន្តប៉េរ៉ូហ្សួ អាល់ហ្សា១ទំហឹង។ បន្ទាប់មក រថយន្តបឺសបានបាត់ម្ចាស់ការ គ្រប់គ្រងដៃចង្កូតលែងជាប់ ហើយក៏ធ្លាក់ពីលើផ្លូវហាយវេ។ ក្រសួងអប់រំបញ្ជាក់ថានិស្សិត១៥នាក់រៀននៅសាកលវិទ្យាល័យស៊ុលតង់ អ៊ីឌ្រីស (Sultan Idris) ពិតជាបានស្លាប់នៅក្នុងហេតុការណ៍នេះមែន។
អាជ្ញាធរទទួលការហៅទូរស័ព្ទដើម្បីធ្វើអន្តរាគមន៍បន្ទាន់នៅវេលាម៉ោង១ និង១០នាទីរំលងអធ្រាត្រ។ អ្នកទូរស័ព្ទប្រាប់ថាជនរងគ្រោះសរុប៤៩នាក់ (ដែលរងរបួស និងស្លាប់)។ គ្រូពេទ្យអះអាងថាជនរងគ្រោះ១៣នាក់ស្លាប់ភ្លាមៗនៅនឹងកន្លែងកើតហេតុ។ ចំណែក២នាក់ទៀតត្រូវគេដឹកទៅដល់មន្ទីរពេទ្យ។ ប៉ុន្តែដោយសារមុខរបួសធ្ងន់ធ្ងរពេក ពួកគេក៏ស្លាប់បាត់ទៅ។
នៅមន្ទីរពេទ្យដដែលនេះ ជនរងគ្រោះ២នាក់មិនទាន់ដឹងថាស្លាប់ ឬរស់នោះទេព្រោះពួកគេកំពុងស្ថិតនៅក្នុងបន្ទប់សង្គ្រោះបន្ទាន់។ ម្ភៃនាក់ក៏កំពុងរងរបួសធ្ងន់ធ្ងរផងដែរប៉ុន្តែមិនដល់ថ្នាក់សង្គ្រោះបន្ទាន់។ ២នាក់អាចវិលមករកសភាពធម្មតាឡើងវិញ។ លោកអាន់វ៉ា អ៊ីប្រាហ៊ីម (Anwar Ibrahim) ចូលសម្ដែងការសោកស្ដាយចំពោះហេតុការណ៍នេះ និងចូលរួមមរណទុក្ខជាមួយក្រុមគ្រួសារសព។
នៅក្នុងចំណោមជនរងគ្រោះសរុប៤៨នាក់នៅក្នុងរថយន្តទាំង២គ្រឿងនោះ ៤២នាក់ជានិស្សិតសាកលវិទ្យាល័យ, ៤នាក់ជាតៃកុង និងអ្នកដំណើរនៅក្នុងរថយន្តប៉េរ៉ូឌ្យួ អាល់ហ្សា (Perodua Alza) ចំណែក២នាក់ទៀតជាតៃកុង និងព្រូឡានបឺស។ តាមពិតរថយន្តទាំង២គ្រឿងធ្វើដំណើរស្របទិសគ្នា។ សាក្សីនិយាយថាក្រោយពេលកើតហេតុ ជនរងគ្រោះខ្លះព្យាយាមជម្លៀសខ្លួនចេញពីក្នុងឡាន អ្នកខ្លះទៀតត្រូវគ្រវែងចេញទៅខាងក្រៅឡានដោយសារកម្លាំងប៉ះទង្គិចគ្នាដ៏ខ្លាំង៕
ចែករំលែកព័តមាននេះ