ខេត្តស្វាយរៀង៖រថយន្តសណ្តោងរ៉ឺម៉កកុងតឹន័រ១គ្រឿងក្រឡាប់ផ្ងាជើងទ្រមេឃជះចោលទំនិញពេញចិញ្ចើមផ្លូវមហាជនដាក់ការសង្ស័យថាជាទំនិញគេចពន្ធឆ្លងដែនពីប្រទេសវៀតណាមដឹកឆ្ពោះទៅរាជធានីភ្នំពេញ។
ករណីរថយន្តក្រឡាប់នេះបានកើតឡើងនៅវេលាម៉ោង១និង១០នាទីយប់រំលងអាធ្រាតឈានចូលថ្ងៃទី០៩មិថុនា២០២៥នៅលើកំណាត់ផ្លូវជាតិលេខ១ស្ថិតក្នុងភូមិគោកកណ្តោលឃុំក្រោលគោស្រុកស្វាយជ្រំ។ករណីនេះដែរមហាជនបានលើកឡើងថា រថយន្តកុងតឺន័រដឹកទំនិញលើសទម្ងន់ សង្ស័យជាទំនិញគេចពន្ធដឹកឆ្លងដែនពីប្រទេសវៀតណាមចូលមករដ្ឋបាលខេត្តស្វាយរៀងឆ្ពោះទៅរាជធានីភ្នំពេញ។ហើយទំនិញទាំងនោះគឺ មានសាប៊ូ ដាក់ស្លាកយីហោ ផលិតនៅប្រទេថៃ មានប្រេងឆា និងទំនិញជាច្រើនមុខ ដឹកពីប្រទេសវៀតណាមតាមច្រកទ្វារព្រំដែននានាក្នុងខេត្តស្វាយរៀង ។
ហើយមហាជនបានលើកឡើងទៀតថា ទំនិញទាំងនោះគ្មានលេខកូដនិងកាលបរិច្ឆេទត្រឹមត្រូវទេ ស្លាកយីហោបិតនៅក្នុងដប ផលិតនៅប្រទេសថៃ សង្ស័យជាទំនិញគេចពន្ធច្រើនតែដឹកធ្វើចរាចរណ៍នៅពេលយប់។ប្រភពបន្តទៀតថា សូមមើលរថយន្ត១គ្រឿងនេះដឹកទំនិញសំពីងសំពោងខ្ពស់កប់ពពក លើសទម្ងន់ បង្កឲ្យយោលផ្អៀងរកកលក្រឡាប់ ត្រូវម្ចាស់រថយន្តយកកូនឈើមកទល់។ហើយរថយន្តនេះដែរគឹដឹកទំនិញពីប្រទេសវៀតណាមឆ្លងដែនតាមច្រកទ្វាព្រំដែនទេវភាគីបុសមន ឃុំបុសមនស្រុករំដួល ឡើងមកតាមផ្លូវជាតិលេខ១៣ឆ្ពោះមកឡើងផ្លូវជាតិលេខ១ឆ្ពោះទៅរាជធានីភ្នំពេញដែរ។
មហាជនបានអំពាវនាវសូមឲ្យសមត្ថកិច្ចនគបាលចរាចរណ៍ឈរជើងតាមដងផ្លូវមេត្តាពិនិត្យមើលផង បើបណ្តែតបណ្តោយឲ្យឈ្មួញប្រើប្រស់រថយន្តដឹកទំនិញលើសទម្ងន់បែបនេះគឺបណ្តាលឲ្យបាក់ស្រុតខូចផ្លូវអស់ហើយនិងបង្កហានីភ័យគ្រោះថ្នាក់ចរាចរណ៍ខ្លាំងណាស់បើផ្ទុកទំនិញសំពីងសំពោងខ្ពស់ យ៉ាងនេះអាចនឹងក្រឡាប់សង្កត់អ្នកធ្វើដំណើរតាមដងផ្លូវគ្រោះថ្នាក់ជាយថាហេតុ ។
ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ