រាជធានីភ្នំពេញ ៖ ក្មេងទំនើងពីរក្រុមបានបើកឆាកប្រយុទ្ធគ្នាប្រដាប់ដោយដុំថ្មបានវាយកម្ទេចម៉ូតូព្រមទាំងធ្វើឲ្យមានមនុស្សរងរបួស ត្រូវបានសមត្ថកិច្ចឃាត់ខ្លួនបានមនុស្ស៤នាក់ និងម៉ូតូ៣គ្រឿងយកទៅធ្វើការសួរនាំ កាលពីវេលាម៉ោង៣ទៀបភ្លឺថ្ងៃទី៩ ខែមិថុនា ឆ្នាំ២០២៥ នៅចំនុចផ្លូវ៣៧០កែងផ្លូវ៥១ សង្កាត់បឹងកេងកងទី១…
រាជធានីភ្នំពេញ ៖ ក្មេងទំនើងពីរក្រុមបានបើកឆាកប្រយុទ្ធគ្នាប្រដាប់ដោយដុំថ្មបានវាយកម្ទេចម៉ូតូព្រមទាំងធ្វើឲ្យមានមនុស្សរងរបួស ត្រូវបានសមត្ថកិច្ចឃាត់ខ្លួនបានមនុស្ស៤នាក់ និងម៉ូតូ៣គ្រឿងយកទៅធ្វើការសួរនាំ កាលពីវេលាម៉ោង៣ទៀបភ្លឺថ្ងៃទី៩ ខែមិថុនា ឆ្នាំ២០២៥ នៅចំនុចផ្លូវ៣៧០កែងផ្លូវ៥១ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។
តាមប្រភពពីប្រជាពលរដ្ឋបានដឹងថា មុនពេលកើតហេតុ មិនដឹងថាភាគីទាំងសងខាងមានទំនាស់នឹងគ្នារឿងអ្វីនោះទេ ដោយភាគីម្ខាងមានគ្នា៣នាក់ជិះម៉ូតូមួយគ្រឿង ម៉ាកហុងដាឌ្រីម និងភាគីម្ខាងទៀតមានគ្នា៦នាក់ជិះម៉ូតូ២គ្រឿង ម៉ាកហុងដាឌ្រីមមួយគ្រឿងនិងម៉ូតូស៊ុយសុគីឡែតមួយគ្រឿង ។
តាមប្រភពដដែលបានបន្តថា លុះពេលជិះមកដល់ចំណុចកើតហេតុខាងលើ ស្រាប់តែពួកគេដេញវាយគ្នាប្រដាប់ដោយដុំថ្មរៀងៗខ្លួន បានគប់ និងវាយគ្នាទៅវិញទៅមក និងវាយបំផ្លិចបំផ្លាញម៉ូតូទាំងសងខាងទៅវិញទៅមក បណ្តាលឱ្យភាគីទាំងសងខាងត្រូវរបួសរៀងៗខ្លួន ខ្លះរត់ចោលគ្នា ដោយបន្សល់ភាគីទាំងសង្ខាងចំនួន៤នាក់ រួមទាំងម៉ូតូ៣គ្រឿង រងការខូចខាត ត្រូវបានសមត្ថកិច្ចមូលដ្ឋាន ចុះទៅធ្វើការឃាត់ខ្លួន យកទៅប៉ុស្តិ៍ប៉ូលិសរដ្ឋបាលបឹងកេងកងទី១ ធ្វើការសាកសួរទៅតាមជំនាញផងដែរ ។
ចំពោះការសួរនាំភាគីទាំងសងខាងបានចោទគ្នាទៅវិញទៅមក ដោយមិនមានអ្នកណាទទួលកំហុសនោះទេ ព្រមទាំងអះអាងថាភាគីដែលមានគ្នាបីនាក់បានព្រួតវាយទៅលើគ្នា៦នាក់ បម្រុងប្លន់យកម៉ូតូរបស់គាត់ថែមទៀត ។
ដោយឡែកភាគីដែលមានគ្នា៦នាក់បានចោទភាគីមានគ្នា៣នាក់ថាបានព្រួតវាយពួកគេប៉ងប្លន់យកម៉ូតូពួកគេដូចគ្នាដូចគ្នាផងដែរ ។
ពាក់ព័ន្ធករណីនេះផងដែរ ដោយសារតែមានការចោទប្រកាន់គ្នាទៅវិញទៅមក សមត្ថកិច្ចកសាងសំណុំរឿងបញ្ជូនទៅអធិការដ្ឋាននគរបាលខណ្ឌបឹងកេងកងដើម្បីចាត់ការបន្ត ៕
ចែករំលែកព័តមាននេះ