ទីក្រុងវ៉ាស៊ីនតោន៖ សេដ្ឋីលេខ១លើលោកកំពុងមានបញ្ហាធំហើយពេលនេះបន្ទាប់ពីគាត់ហ៊ានប៉ះពារពាក្យសម្ដីគ្នាជាមួយលោកត្រាំ។ សារព័ត៌មានអន្តរជាតិចាត់ទុកថារាត្រីទឹកឃ្មុំរវាងត្រាំ និងអ៊ីឡនម៉ាស់បានឈានដល់ទីបញ្ចប់ហើយ ហើយពួកគេបានដើរដល់ផ្លូវបំបែកហើយនៅពេលនេះ។ ឥឡូវនេះ អតីតទីប្រឹក្សាកំពូលរបស់លោកត្រាំរហូតដល់ទៅនិយាយពន្យុះឱ្យត្រាំដេញអ៊ីឡនម៉ាស់ចេញពីប្រទេសអាមេរិកថែមទៀតផងព្រោះគាត់មិនមែនមានដើមកំណើតនៅអាមេរិកទេ។
លោកស្ទីហ្វឹន បេនណុន (Stephen K. Bannon) ដែលជាអ្នកទិតៀនលោកម៉ាស់ឥតសំចៃមាត់ថ្លែងថាលោកបានជូនយោបល់ទៅលោកត្រាំឱ្យលុបចោលកិច្ចសន្យាទាំងអស់រវាងរដ្ឋាភិបាល និងក្រុមហ៊ុនតេសស្លារបស់លោកម៉ាស់។ មិនតែប៉ុណ្ណោះ លោកបេនណុនស្នើឱ្យលោកត្រាំស៊ើបអង្កេតលោកម៉ាស់ដើម្បីរកចំណុចខុសច្បាប់ដទៃទៀត។ លោកយល់ថាសមត្ថកិច្ចគួរចាប់ផ្ដើមស៊ើបអង្កេតជាផ្លូវការដើម្បីតាមដានប្រវត្តិរូបរបស់លោកម៉ាស់ក្នុងនាមជាជនអន្តោប្រវេសន៍។
អតីតទីប្រឹក្សារូបនេះមានជំនឿថាលោកម៉ាស់អាចនឹងចូលទឹកដីអាមេរិកទាំងខុសច្បាប់ក៏អាចថាបាន។ បើដូច្នេះមែន អាជ្ញាធរគួរបណ្ដេញគាត់ចេញជាបន្ទាន់។ ត្រាំបង្ហោះនៅលើបណ្ដាញសង្គមថាវិធីសាមញ្ញបំផុតដើម្បីកាត់បន្ថយខ្ទង់ចំណាយរបស់រដ្ឋាភិបាលគឺផ្ដាច់កុងត្រាជាមួយក្រុមហ៊ុនរបស់លោកម៉ាស់។ ពេលនោះ អាចសំចៃថវិកាបានរាប់ពាន់លានដុល្លារ។
លោកម៉ាស់ និងលោកត្រាំបង្ហាញជម្លោះជាចំហកាលពីថ្ងៃព្រហស្បតិ៍។ លោកទាំង២វាយប្រហារគ្នាយ៉ាងចាស់ដៃតាមបណ្ដាញសង្គម។ តាមពិត លោកត្រាំគិតក្នុងផ្លូវត្រូវដែលគាត់បង្កើតបណ្ដាញសង្គមដោយផ្ទាល់ដៃឈ្មោះទ្រូសសូសល (Truth Social)។ ឧបមាថាបើគាត់ប្រើបណ្ដាញអ៊ិច កាលគាត់នៅផ្អែមល្ហែមជាមួយម៉ាស់មិនអីទេ។ ប៉ុន្តែនៅពេលទំនាក់ទំនងប្រែជាល្វីងជូរចត់ដូចឥឡូវនេះ បណ្ដាញសង្គមរបស់គាត់ដែលផ្ញើវាសនាលើក្រុមហ៊ុនរបស់លោកម៉ាស់អាចនឹងមានបញ្ហាជាមិនខាន។
លោកម៉ាស់ជាម្ចាស់ក្រុមហ៊ុនរថយន្តអគ្គិសនីតេស្លា (Tesla), ស្ពេសអ៊ិច (SpaceX) (ផលិតរ៉ុកកែតសម្រាប់បាញ់បង្ហោះផ្កាយរណប និងយានអវកាស) និងក្រុមហ៊ុនអេអាយស្តាតអប់ (xAI)។ កំពុងធ្វើការនៅក្នុងរដ្ឋាភិបាលរបស់លោកត្រាំសុខៗ លោកម៉ាស់ប្រកាសលាឈប់ពីតំណែងជាទីប្រឹក្សាទទួលបន្ទុកខាងធានាប្រសិទ្ធភាព និងកាត់បន្ថយខ្ទង់ចំណាយរបស់រដ្ឋាភិបាល។
លោកម៉ាស់ក៏ជាមនុស្សសំខាន់ផងដែរដែលបានជួយជ្រោមជ្រែងលោកត្រាំរហូតដល់ឈ្នះឆ្នោតក្លាយជាប្រធានាធិបតីនៅអាណត្តិថ្មី។ គេហទំព័រអេកសឺស (Axious) ផ្សាយថាលោកម៉ាស់បានចំណាយលុយជាង២៩០លានដុល្លារនៅក្នុងយុទ្ធនាការឃោសនាបោះឆ្នោតរបស់លោកត្រាំកាលពីឆ្នាំ២០២៤។ ប៉ុន្តែលោកម៉ាស់សម្រេចចិត្តឈប់ធ្វើការជាមួយលោកត្រាំតទៅទៀតដោយសារខឹងសម្បារនឹងការរៀបចំសេចក្ដីព្រាងច្បាប់វាន់ ប៊ីក ប៊ីយូធីហ្វ៊ូល ប៊ីល (One Big Beautiful Bill ) ដែលមិនព្រមដាក់បញ្ចូលគំនិតរបស់គាត់នៅក្នុងនោះ។ នេះបើយោងតាមការបញ្ជាក់របស់សេតវិមាន។
ក្រុមហ៊ុនរបស់លោកម៉ាស់ក៏បានកើបប្រាក់ចំណេញរាប់ពាន់លានដុល្លារពីការចុះកិច្ចសន្យាជាមួយស្ថាប័នរបស់រដ្ឋាភិបាលអាមេរិកដើម្បីទទួលបានសិទ្ធិដេញថ្លៃ ឬផ្គត់ផ្គង់សេវាផ្សេងៗ។ ក្រោយពេលផ្ទុះជម្លោះដ៏ក្ដៅគគុករវាងអ្នកមានលុយច្រើនបំផុតលើលោក និងបុរសមានអំណាចផុតលេខលើលោក ទីប្រឹក្សាលោកត្រាំស្នើឱ្យស៊ើបអង្កេតលោកម៉ាស់ក្រែងលោគាត់ប្រើគ្រឿងញៀនដូចការចុះផ្សាយរបស់កាសែតញូយ៉កថាមស៍។ មួយទៀតត្រូវស៊ើបអង្កេតមូលហេតុអ្វីបានជាគាត់ចង់ដឹងឯកសារសម្ងាត់របស់មន្ទីរបញ្ចកោណ (ក្រសួងការពារជាតិ) ពាក់ព័ន្ធនឹងប្រទេសចិន។
លោកម៉ាស់មិនមែនជាជនជាតិអាមេរិកពីកំណើតទេ។ លោកកើតនៅប្រទេសអាហ្វ្រិកខាងត្បូង និងផ្លាស់ទៅរស់នៅអាមេរិកកាលពីឆ្នាំ១៩៩២មុនពេលចូលសញ្ជាតិអាមេរិក។ ព័ត៌មានចុះផ្សាយកាលពីឆ្នាំ២០២៤ថាលោកម៉ាស់ធ្វើខុសច្បាប់អន្តោប្រវេសន៍ព្រោះគាត់ទៅអាមេរិកក្នុងនាមជានិស្សិតបរទេស ប៉ុន្តែគាត់លួចបង្កើតក្រុមហ៊ុនកាលពីឆ្នាំ១៩៩៥។ មែនទែនទៅ គាត់មិនបានរៀននៅសាកលវិទ្យាល័យស្ទេនហ្វត (Stanford) ដូចការអះអាងរបស់គាត់នោះទេ។ នេះបើតាមការចុះផ្សាយរបស់អេកូណូមិចថាមស៍ (The Economic Times), ញូយ៉កថាមស៍ និងប្រភពដទៃទៀត៕
ចែករំលែកព័តមាននេះ