នៅសម័យនេះ បុរសៗនៅក្នុងជួរកងកម្លាំងប្រដាប់អាវុ.ធ និងមន្ត្រីរាជការ ដែលបែកធ្លាយរឿងរំលោ.ភច្បាប់ឯកពន្ធភាព ពោល គឺទៅលួចលាក់មានស្រី ឬមានប្រពន្ធចុង ដឹងតែត្រូវរងគ្រោះជាដំណំ អស់ទាំងកិត្តិយស និងអាចអស់ដល់យសស័ក្តិ…
នៅសម័យនេះ បុរសៗនៅក្នុងជួរកងកម្លាំងប្រដាប់អាវុ.ធ និងមន្ត្រីរាជការ ដែលបែកធ្លាយរឿងរំលោ.ភច្បាប់ឯកពន្ធភាព ពោល គឺទៅលួចលាក់មានស្រី ឬមានប្រពន្ធចុង ដឹងតែត្រូវរងគ្រោះជាដំណំ អស់ទាំងកិត្តិយស និងអាចអស់ដល់យសស័ក្តិ និងតួនាទីក៏ដូចជា ភារកិច្ចថែមទៀត ។
សម័យនេះ ខុសពីសម័យមុន ដោយសារតែតាំងពីមានបណ្តាញសង្គមមក មាត់មនុស្សកាន់តែធំ ហើយត្រចៀកក៏កាន់តែវែងដែរ ។ ដូច្នេះកុំប្រហែស ។ តែប្រហែស គឺប្រហោង និងមានបញ្ហាដល់ខ្លួនតែម្តង ។ សម្រាប់បុរសៗ ដែលមានប្រពន្ធ ឬដៃគូជីវិត ជាអ្នកចេះគិត ចេះគូរ ហើយមិនចេះរករឿង គឺជារឿងសំណាងហើយ ។ ប៉ុន្តែសម្រាប់បុរស ដែលមានដៃគូជីវិត មិនយោគយល់បញ្ហានេះ គឺប្រយ័ត្នស៊យនៅថ្ងៃណាមួយដូចជា ករណីកើតមានឡើងនៅខាងខេត្តកំពត ដែលផ្ទុះនៅលើបណ្តាញសង្គម នៅដើមខែមិថុនាថ្មីៗនេះជាដើម ។
ពាក់ព័ន្ធនឹងរឿងអាស្រូវនេះ មន្ត្រីរដ្ឋបាលនៅថ្នាក់ក្រោមជាតិមួយរូបដែលមានឋានៈជាអភិបាលរងស្រុកមួយ នៅខេត្តកំពតដែលផ្ទុះរឿងអាស្រូវ ត្រូវប្រពន្ធទៅអុកឡុកនៅរោងពិធី ដែលមន្ត្រីរូបនោះបានលួចទៅរៀបការប្រពន្ធថ្មី ទាំងដែលមិនទាន់លែងលះជាមួយប្រពន្ធដើមដាច់ស្រេច ហើយគ្រួសារប្រពន្ធដើមតាមទាន់ឈ្លោះគ្នាផ្អើលឆោឡោពេញរោងការ ។
រឿងនេះ ត្រូវបែកធ្លាយតាមបណ្តាញសង្គម បង្កការចែករំលែក និងចូលទៅបញ្ចេញយោបល់ព្រោងព្រាធ ហើយក្រោយមកបុរសជាសាមី រឿងក៏បានចេញមកបំភ្លឺ ហើយបានអះអាងថា រឿងនោះ គឺជារឿងមិនពិត ប៉ុន្តែទោះបីជាយ៉ាងណាក៏ដោយ ក៏រឿងនេះត្រូវបានរដ្ឋបាលខេត្តកំពតបញ្ចូនទៅថ្នាក់លើដោះស្រាយបាត់ទៅហើយ ។
តាមសេចក្តីជូនដំណឹង ចុះថ្ងៃទី០៤ ខែមិថុនា ឆ្នាំ២០២៥ រដ្ឋបាលខេត្តកំពត បានប្រកាសថា ស្ថាប័នមិនមិនគាំទ្រដាច់ខាត ចំពោះករណីនេះ និងបានលើកសំណើគោរពជូនទៅក្រសួងមហាផ្ទៃ ដើម្បីចាត់វិធានការ វិន័យ ស្របតាមកំហុសឆ្គង ដែលមន្ត្រីរូបនោះបានប្រព្រឹត្ត ។
រដ្ឋបាលខេត្តកំពត បានប្រកាសថា រឿងរ៉ាវ កាលពីវេលាយប់ថ្ងៃទី០២ ខែមិថុនា ឆ្នាំ២០២៥ គឺពិតជាបានត្រូវគេបង្ហោះជាច្រើន នៅលើបណ្តាញសង្គម ហើយលើកឡើងថា មន្ត្រីរូបនោះបានប្រព្រឹត្តអំពើដែលធ្វើឲ្យប៉ះពាល់ទៅលើសេចក្ដីថ្លៃថ្នូរ កិត្តិយសរបស់ខ្លួន និងអង្គភាព ។
រដ្ឋបាលខេត្តកំពត មិនគាំទ្រដាច់ខាត ចំពោះករណីខាងលើនេះដែលមានចែងក្នុងច្បាប់ស្តីពីសហលក្ខន្តិកៈមន្ត្រីរាជការស៊ីវិល ។ រដ្ឋបាលខេត្តនឹងលើកសំណើគោរពជូនទៅក្រសួងមហាផ្ទៃ ដើម្បីចាត់វិធានការវិន័យ ស្របតាមកំហុសឆ្គងដែលមន្ត្រីរូបនេះបានប្រព្រឹត្ត ។
សូមប្រុងប្រយ័ត្ន អស់លោកមន្ត្រីដែលមានចរិត ឬចូលចិត្តខិលខូចនឹងរឿងស្រីញី ។ ជាការពិត ការរស់នៅជួបជុំគ្រួសារហើយបែកបាក់ គឺជារឿងឯកជនភាពរបស់បុរស និងស្ត្រីជាដៃគូ ។ នៅក្នុងករណីជីវិតជាគូ មិនចុះសម្រុង គ្មាននរណាហាមឃាត់យើងមិនអោយចែកផ្លូវគ្នាទេ ។ ប៉ុន្តែមុននឹងមានអ្នកថ្មី សូមជម្រះជាមួយអ្នកចាស់អោយជ្រះស្រឡះតាមផ្លូវច្បាប់ ។ នៅក្នុងករណីមិនទាន់ជ្រះស្រឡះទេ វានឹងមានរឿងរសេមរសាម និងបញ្ហាបង្កឲ្យប៉ះពាល់ដល់ការងារនិងកិត្តិយសបែបនេះ ។ មិនដូចសម័យមុនទេ សម័យនេះ ពិបាកលាក់បាំងណាស់ ។ ដូចនេះបុរសៗសូមប្រុងប្រយ័ត្ន ជាពិសេស គឺនៅក្នុងជួរមន្ត្រី និងកងកម្លាំង ៕
ចែករំលែកព័តមាននេះ