រាជធានីភ្នំពេញ ៖ រយៈពេលចំនួន៦ថ្ងៃប៉ុណ្ណោះ នគរបាលនៅតាមអធិការដ្ឋានខណ្ឌទាំង១៤ នៃស្នងការដ្ឋានរាជធានីភ្នំពេញ បានចាប់ឃាត់ម៉ូតូដែលកែច្នៃបំពង់ស៊ីម៉ាំងបង្កឱ្យមានសំឡេងខ្លាំងៗឱ្យឈ្មោះជាទូទៅថា«អាប្រែន» បានសរុបចំនួន១២៦គ្រឿង និងនាំខ្លួនទាំងម្ចាស់ មកណែនាំ ដោះដូរ…
រាជធានីភ្នំពេញ ៖ រយៈពេលចំនួន៦ថ្ងៃប៉ុណ្ណោះ នគរបាលនៅតាមអធិការដ្ឋានខណ្ឌទាំង១៤ នៃស្នងការដ្ឋានរាជធានីភ្នំពេញ បានចាប់ឃាត់ម៉ូតូដែលកែច្នៃបំពង់ស៊ីម៉ាំងបង្កឱ្យមានសំឡេងខ្លាំងៗឱ្យឈ្មោះជាទូទៅថា«អាប្រែន» បានសរុបចំនួន១២៦គ្រឿង និងនាំខ្លួនទាំងម្ចាស់ មកណែនាំ ដោះដូរ បំពង់ស៊ីម៉ាំងកែច្នៃចេញ ព្រមទាំងអញ្ជើញអាណាព្យាបាលមកធានាយកទៅអប់រំបន្តទៀត ដែលនគរបាលបាននិយាយថា ចាប់មិនចេះអស់សោះ ។
តាមស្នងការដ្ឋាននគរបាលរាជធានីភ្នំពេញបានឱ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ចាប់ពីថ្ងៃទី៣០ ខែឧសភា រហូតដល់ថ្ងៃទី០៤ ខែមិថុនា ឆ្នាំ២០២៥ កម្លាំងនៅតាមបណ្តាអធិការដ្ឋាននគរបាលខណ្ឌទាំង១៤ បានឃាត់ម៉ូតូប្រើប្រាស់បំពង់ស៊ីម៉ាំងហៅ«អាប្រែន»សរុបចំនួន១២៦គ្រឿង ក្នុងនោះតម្រូវឱ្យម្ចាស់យកបំពង់ស៊ីម៉ាំងដើមមកដោះដូរបានចំនួន៣៤គ្រឿងហើយ និងនៅរក្សាទុកចំនួន៩២គ្រឿងទៀត រង់ចាំម្ចាស់យកបំពង់ស៊ីម៉ាំងដើមមកដោះដូរបន្ត ។
គួរបញ្ជាក់ថា ប៉ុន្មានថ្ងៃនេះ បន្ទាប់ពីមានបទបញ្ជាយ៉ាងម៉ឺនម៉ាត់ពីលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ជាថ្មីនគរបាលតាមបណ្ដាលខណ្ឌទាំង១៤នៅក្នុងរាជធានីភ្នំពេញ បានបើកយុទ្ធនាការល្បាតនៅក្នុងមូលដ្ឋាន ហើយឃាត់ខ្លួនក្រុមយុវជនដែលទំនើងកោងកាចតែងតែជិះម៉ូតូធំ-តូច បំពាក់បំពង់ស៊ីម៉ាំងកែច្នៃខុសលក្ខណៈបច្ចេកទេស បង្កសំឡេងខ្លាំងៗរំខានដល់ការរស់នៅ និងធ្វើដំណើររបស់ប្រជាពលរដ្ឋ គួរឱ្យរំខាន និងស្អប់ខ្ពើមណាស់ ៕
ចែករំលែកព័តមាននេះ