ខេត្តបន្ទាយមានជ័យ ៖ កម្លាំងកងរាជអាវុធហត្ថឃាត់ខ្លួនជនសង្ស័យជាស្ត្រីម្នាក់ពីបទយកលុយចំនួន១.០០០ដុល្លារ ដែលម្ចាស់បាញ់ច្រឡំ មិនព្រមអោយវិញ ត្រូវបានបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី០៣ ខែមិថុនា ឆ្នាំ២០២៥។ លោកវរៈសេនីយ៍ត្រី សុខ…
ខេត្តបន្ទាយមានជ័យ ៖ កម្លាំងកងរាជអាវុធហត្ថឃាត់ខ្លួនជនសង្ស័យជាស្ត្រីម្នាក់ពីបទយកលុយចំនួន១.០០០ដុល្លារ ដែលម្ចាស់បាញ់ច្រឡំ មិនព្រមអោយវិញ ត្រូវបានបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី០៣ ខែមិថុនា ឆ្នាំ២០២៥។
លោកវរៈសេនីយ៍ត្រី សុខ ឡេង មេបញ្ជាការកងរាជអាវុធហត្ថក្រុងសិរីសោភ័ណបានប្រាប់ថា៖ជនសង្ស័យមានឈ្មោះ យុន ស៊ីវមិញ ភេទស្រីអាយុ៣២ឆ្នាំរស់នៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ។
លោកបានបញ្ជាក់ថា ៖ ក្រោយទទួលពាក្យបណ្តឹងពីឈ្មោះ រី ណា ភេទស្រី អាយុ៣៦ឆ្នាំ រស់នៅភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ បានប្តឹងស្ត្រីជាជនសង្ស័យឈ្មោះ យុន ស៊ីវមិញ បានយកលុយចំនួន១.០០០ដុល្លារ តាមរយៈការបាញ់លុយតាមប្រព័ន្ធQR Code ដែលបាញ់អោយថ្លៃម៉ូតូឌុបចំនួន១.០០០រៀល តែស្ត្រីជាម្ចាស់បណ្តឹងច្រឡំបាញ់ឱ្យដល់១.០០០ដុល្លារ ហើយស្ត្រីជាជនសង្ស័យមិនព្រមបាញ់សងម្ចាស់លុយវិញ ក៏ប្តឹងឱ្យឃាត់ខ្លួនកាលពីថ្ងៃទី២៩ ខែឧសភា ឆ្នាំ២០២៥នៅចំណុចភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ។
លោកវរៈសេនីយ៍ត្រី សុខ ឡេង បានបញ្ជាក់ថា៖ក្រោយឃាត់ខ្លួនស្ត្រីជាជនសង្ស័យម្នាក់ត្រូវបានបញ្ជូនសាកសួរនៅទីបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ ។ តាមចម្លើយសារភាពរបស់ស្ត្រីជាជនសង្ស័យបានឱ្យដឹងថា ខ្លួនពិតបានទទួល១.០០០ដុល្លាដែលម្ចាស់បាញ់ច្រឡំ ហើយមិនបាញ់លុយអោយវិញ ក៏ត្រូវបានកម្លាំងសមត្តកិច្ចឃាត់ខ្លួនកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យអនុវត្តន៍តាមច្បាប់៕
ចែករំលែកព័តមាននេះ