ក្រសួងសេដ្ឋកិច្ច និងហិរញ្ញវត្ថុបានអះអាងថា កម្ពុជាបានខ្ចីគេបន្ថែម ដើម្បីយកមកអភិវឌ្ឍន៍ប្រទេសត្រឹមតែប្រមាណជាជិត៧៩លានដុល្លារប៉ុណ្ណោះ នៅត្រីមាសទី១ ដើមឆ្នាំ២០២៥កន្លងទៅនេះ ។ ព្រឹត្តិបត្រស្ថិតិបំណុលសាធារណៈកម្ពុជា ដែលបានចេញផ្សាយ កាលពីចុងខែឧសភា…
ក្រសួងសេដ្ឋកិច្ច និងហិរញ្ញវត្ថុបានអះអាងថា កម្ពុជាបានខ្ចីគេបន្ថែម ដើម្បីយកមកអភិវឌ្ឍន៍ប្រទេសត្រឹមតែប្រមាណជាជិត៧៩លានដុល្លារប៉ុណ្ណោះ នៅត្រីមាសទី១ ដើមឆ្នាំ២០២៥កន្លងទៅនេះ ។
ព្រឹត្តិបត្រស្ថិតិបំណុលសាធារណៈកម្ពុជា ដែលបានចេញផ្សាយ កាលពីចុងខែឧសភា ឆ្នាំ២០២៥បានបង្ហាញថា នៅត្រីមាសទី១ ដើមឆ្នាំនេះ រដ្ឋាភិបាលកម្ពុជាជំពាក់បំណុលសរុបទំហំ១២,១៨ ពាន់លានដុល្លារ ។
ប្រភពដដែលបានអះអាងថា ពីខែមករាដល់ខែមីនា ឆ្នាំ២០២៥ កម្ពុជាបានចុះកិច្ចព្រមព្រៀងឥណទានថ្មីត្រឹមតែជិត៧៩លានដុល្លារ ស្មើនឹងប្រមាណជា៣ភាគរយនៃពិដានបំណុល ដែលច្បាប់អនុញ្ញាត ។
ប្រភពដដែលបានអះអាងថា ប្រសិនបើធៀបនឹងត្រីមាសទី១ ឆ្នាំ២០២៤ ការចុះកិច្ចព្រមព្រៀងឥណទានថ្មីដែលភាសាសមញ្ញថា ជំពាក់បំណុលគេថ្មីនោះ គឺមានការថយចុះដល់ទៅ៤៤ភាគរយ ។
ពាក់ព័ន្ធនឹងប្រភេទនៃបំណុលទាំងនោះ ក្រសួងសេដ្ឋកិច្ច និងហិរញ្ញវត្ថុ បានសង្កត់ធ្ងន់ថា បំណុល ឬឥណទានទាំងអស់នោះ គឺសុទ្ធសឹងស្ថិតនៅក្នុងប្រភេទជាបំណុលមានកម្រិតសម្បទានខ្ពស់ដោយមានធាតុជាអំណោយជាមធ្យមប្រមាណជា៥០ភាគរយ ។
ក្រសួងក៏បានបញ្ជាក់បន្ថែមទៀតថា គោលដៅនៃការចុះកិច្ចព្រមព្រៀងបំណុលថ្មីទាំងនោះគឺសម្រាប់បំពេញតម្រូវការហិរញ្ញវត្ថុក្នុងវិស័យអាទិភាពរបស់រដ្ឋាភិបាលសំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាព សេដ្ឋកិច្ច ឬផលិតភាពផលិតកម្មនៅក្នុងស្រុក ។ ក្រសួងក៏បានបន្តទៀតថា នៅក្នុងរយៈពេលដដែលរដ្ឋាភិបាលក៏បានបោះផ្សាយលក់មូលបត្ររដ្ឋ សរុប២៨លានដុល្លារកន្លះ ដើម្បីធ្វើហិរញ្ញប្បទានគាំទ្រគម្រោងវិនិយោគសាធារណៈសំដៅលើកស្ទួយកំណើន និងផលិតភាពសេដ្ឋកិច្ច ។
និយាយអំពីចំណាយ និងការប្រើប្រាស់បំណុលទាំងអស់នោះវិញ គឺថានៅត្រីមាសទី១នេះ រដ្ឋាភិបាលបានដកសាច់ប្រាក់ពីបំណុលដែលទទួលបានសរុបចំនួនជាង១៧៥លានដុល្លារដោយនៅក្នុងនោះពីបំណុលក្របខណ្ឌទ្វេភាគី៥៣ភាគរយ និងពហុភាគីប្រមាណជា៤៧ភាគរយប្រើប្រាស់ជាក់ស្តែងលើវិស័យហេដ្ឋា រចនាសម្ព័ន្ធរហូតដល់ទៅ៨៦ភាគរយ ។
ក្រសួងបានបញ្ជាក់យ៉ាងច្បាស់ថា នៅត្រីមាសទី១ ដើមឆ្នាំ២០២៥ ការខ្ចីបំណុលថយ ប៉ុន្តែការដកសាច់ ប្រាក់ជាក់ស្តែងនៅក្នុងរយៈពេលនេះ គឺមានការកើនឡើងប្រមាណជា ២២ភាគរយ ។ កាលណានិយាយអំពីបំណុលក៏ត្រូវតែនិយាយអំពីការសង ។ ចំពោះសំណងក្រសួងបានបញ្ជាក់ថា នារយៈពេល៣ខែ រដ្ឋាភិបាលបានទូរទាត់បំណុលសរុបជិត២៣៨លានដុល្លារ ដោយគិតទាំងការប្រាក់ និងរំលួសប្រាក់ដើម ។ ក្រសួងបានលើកឡើងថា ការទូរទាត់បំណុលសរុបនៅបីខែកន្លងទៅ គឺមានកំណើន៣១%ដែរ ។
នៅក្នុងស្ថានភាពនេះ អ្នកជំនាញសេដ្ឋកិច្ចមួយរូបបានលើកឡើងថា ផ្អែកតាមលទ្ធផលបឋមនេះ ការវិភាគពីចីរភាពបំណុលតាមមូលដ្ឋានទិន្នន័យដែលបានប៉ាន់ស្មានត្រឹមត្រីមាសទី១ ឆ្នាំ២០២៥ បង្ហាញថា ស្ថានភាពបំណុលសាធារណៈកម្ពុជានៅតែបន្តរក្សាបាននូវចីរភាព និងមានកម្រិតហានិភ័យទាបដដែល ៕
ចែករំលែកព័តមាននេះ