រឿងគោលដៅជំរុញពាណិជ្ជកម្មរវាងអ្នកជិតខាងភាគកើត និងភាគខាងលិចដែលមានតម្លៃសរុប៣៥ពាន់លានដុល្លារ នឹងមិនមានអ្វីជាឧបសគ្គឡើយសម្រាប់កម្ពុជាពីព្រោះមូលដ្ឋានផលិតកម្មរបស់កម្ពុជា ពិតជាមានធនធាន និងកម្លាំងគ្រប់គ្រាន់ដែលអាចបំពេញគោលបំណងនេះបាន ។ តាមការប្តេជ្ញាចិត្តក៏ដូចជា ចង់បានរបស់រដ្ឋាភិបាលកម្ពុជា និងវៀតណាមដែលជាប្រទេសជិតខាងភាគខាងកើត នៅក្នុងការជំរុញពាណិជ្ជកម្មដល់២០ពាន់លានដុល្លារ…
រឿងគោលដៅជំរុញពាណិជ្ជកម្មរវាងអ្នកជិតខាងភាគកើត និងភាគខាងលិចដែលមានតម្លៃសរុប៣៥ពាន់លានដុល្លារ នឹងមិនមានអ្វីជាឧបសគ្គឡើយសម្រាប់កម្ពុជាពីព្រោះមូលដ្ឋានផលិតកម្មរបស់កម្ពុជា ពិតជាមានធនធាន និងកម្លាំងគ្រប់គ្រាន់ដែលអាចបំពេញគោលបំណងនេះបាន ។
តាមការប្តេជ្ញាចិត្តក៏ដូចជា ចង់បានរបស់រដ្ឋាភិបាលកម្ពុជា និងវៀតណាមដែលជាប្រទេសជិតខាងភាគខាងកើត នៅក្នុងការជំរុញពាណិជ្ជកម្មដល់២០ពាន់លានដុល្លារ និងគោលដៅ១៥ពាន់លានដុល្លាររវាងកម្ពុជា និងថៃ វាពិតជាមិនមានអ្វីជាឧបសគ្គឡើយ ពីព្រោះមូលដ្ឋានពាណិជ្ជកម្ម និងធនធានដែលកម្ពុជា អាចបំពេញជាមួយនឹងប្រទេសជិតខាងទាំងពីរ គឺវាមានសន្ទុះកំណើនស្របតាមនិន្នាការនោះរួចទៅហើយ ។
សម្រាប់ពាណិជ្ជកម្មកម្ពុជាជាមួយនឹងវៀតណាម គឺភាគីទាំងពីរបានដាក់ការប្តេជ្ញាចិត្តរបស់ខ្លួន ក្នុងការជំរុញភាពជាដៃគូសេដ្ឋកិច្ចលើវិស័យសំខាន់ៗសំដៅសម្រេចបាននូវទំហំពាណិជ្ជកម្មទ្វេភាគីចំនួន២០ពាន់លានដុល្លារ យ៉ាងយូរ៥ឆ្នាំទៀត ។ ការសន្យានេះ ត្រូវបានគូសបញ្ជាក់ជាម្តងហើយម្តងទៀត ដោយមេដឹកនាំកម្ពុជា និងវៀតណាម នៅក្នុងជំនួបជាបន្តបន្ទាប់កន្លងមក ហើយសូម្បីតែនៅក្នុងកិច្ចសន្ទនាធុរកិច្ច ឆ្នាំ២០២៥ថ្មីៗដែលរៀបចំឡើងដោយស្ថានទូតវៀតណាម ប្រចាំនៅទីក្រុងភ្នំពេញ ក៏បានលើកឡើងពីផែនការនេះផងដែរ ។
មកដល់ពេលនេះ អ្នកវិភាគបានលើកឡើងថា ប្រទេសទាំងពីរ គឺពិតជាមានលក្ខខណ្ឌអំណោយផលច្រើនក្នុងការពង្រឹងភាពជាដៃគូក្នុងវិស័យសេដ្ឋកិច្ចជាក់លាក់ ។ ទំនាក់ទំនងពាណិជ្ជកម្មរវាងប្រទេសកម្ពុជា និងវៀតណាម នៅតែបន្តរីកចម្រើន បើទោះបីជាមានបញ្ហាប្រឈមជាសាកលក៏ដោយ ។ នៅឆ្នាំ២០២៤ ទំហំពាណិជ្ជកម្មទ្វេភាគីរវាងប្រទេសទាំងពីរ គឺឈានដល់តម្លៃ១០,១ពាន់លានដុល្លារមានការកើនឡើង១៧,៥ភាគរយធៀបនឹងឆ្នាំ២០២៣ ។ ក្នុងរយៈពេល៤ខែដំបូង នៃឆ្នាំ២០២៥ ទំហំពាណិជ្ជកម្មរវាងកម្ពុជា និងវៀតណាម ដល់ទៅ ៣,២២ពាន់លានដុល្លារកើនឡើង៧ភាគរយ ដោយនៅក្នុងនោះកម្ពុជានាំចេញទៅវៀតណាមសរុប១,៧៨ពាន់លានដុល្លារ ហើយនាំចូលប្រមាណជា១,៤៣ ពាន់លានដុល្លារដោយកម្ពុជាមានអតិរេកពាណិជ្ជកម្មជាង៣៥៤លានដុល្លារ ។
ដោយឡែក ចំពោះទំនាក់ទំនងពាណិជ្ជកម្មរវាងកម្ពុជាជាមួយនឹងថៃ គឺភាគីទាំងពីរបានប្តេជ្ញាចិត្តសម្រេចឲ្យបានដល់១៥ពាន់លានដុល្លារ ។ ភាគីកម្ពុជា និងថៃ បានអះអាងជាថ្មីនូវការប្តេជ្ញាចិត្តក្នុងការពង្រឹងទំនាក់ទំនងពាណិជ្ជកម្មប្រកបដោយមហិច្ឆិតាចំនួន១៥ ពាន់លានដុល្លារនៅឆ្នាំ២០២៧ នេះជាថ្មី ដោយលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងរដ្ឋមន្ត្រីការបរទេសថៃ លោក ម៉ារីស សាងអាមភង្សា ( Maris Sangiampongsa ) នៅទីក្រុងគូឡាឡាំពួ ប្រទេសម៉ាឡេស៊ីថ្មីៗនេះ ។
ក្រសួងការបរទេសបានប្រកាសថា រដ្ឋមន្ត្រីការបរទេសទាំងពីរបានផ្លាស់ប្តូរទស្សនៈរួមជាមួយនឹងការពិភាក្សាស៊ីជម្រៅលើវិស័យសក្តានុពលនៃកិច្ចសហប្រតិបត្តិការ រួមមានគោលដៅពាណិជ្ជកម្មទ្វេភាគីចំនួន១៥ ពាន់លានដុល្លារក្នុងឆ្នាំ ២០២៧ ការលើកកម្ពស់ទេសចរណ៍ កសិកម្ម កិច្ចសហប្រតិបត្តិការវប្បធម៌ ការបង្កើតតំបន់សេដ្ឋកិច្ចពិសេស (SEZs) នៅតាមព្រំដែន និងរួមគ្នាដោះស្រាយ និងសហការលើបញ្ហាសន្តិសុខមិនប្រពៃណី ។
កិច្ចព្រមព្រៀងលើកកម្ពស់ទំនាក់ទំនងពាណិជ្ជកម្មបានឆ្លុះបញ្ចាំងពីការរីកចម្រើននៃការពឹងពាក់គ្នាខាងសេដ្ឋកិច្ចរវាងប្រទេសជិតខាងទាំងពីរ ។ ពាណិជ្ជកម្មឆ្លងកាត់ព្រំដែន ជាពិសេសតាមរយៈតំបន់សេដ្ឋកិច្ចពិសេសព្រំដែនត្រូវបានគេរំពឹងថា នឹងដើរតួនាទីយ៉ាងសំខាន់ក្នុងការសម្រេចបាននូវគោលដៅពាណិជ្ជកម្ម ។
រដ្ឋមន្ត្រីទាំងពីរបានពិភាក្សាគ្នាអំពីយុទ្ធសាស្ត្រលើកកម្ពស់ការសម្របសម្រួលពាណិជ្ជកម្ម និងហេដ្ឋារចនាសម្ព័ន្ធដឹកជញ្ជូន ។ ចំណុចពិសេសមួយ គឺការសម្ពោធស្ពានមិត្តភាពកម្ពុជា-ថៃ នាពេលខាងមុខដែលមានឈ្មោះជាផ្លូវការថា ស្ពានស្ទឹងបត់-បានណងអៀន ដែលជាគម្រោងហេដ្ឋារចនាសម្ព័ន្ធដ៏សំខាន់ដែលរំពឹងថា នឹងជំរុញលំហូរទំនិញ និងប្រជាជនឆ្លងកាត់ព្រំដែន ។
កាលពីឆ្នាំ២០២៤ កន្លងទៅ ពាណិជ្ជកម្មកម្ពុជា និងថៃ មានតម្លៃសរុប៤,២៨ ពាន់លានដុល្លារកើនឡើង១៤,១៩ ភាគរយ ។ នៅក្នុងអំឡុងពេល៤ខែដំបូងនៃឆ្នាំនេះពាណិជ្ជកម្មរវាងប្រទេសទាំងពីរឈានដល់១,៤៩ ពាន់លានដុល្លារ កើនឡើង៦,៤ ភាគរយ បើធៀបនឹងរយៈពេលដូចគ្នា កាលពីឆ្នាំមុន នេះបើយោងតាមរបាយការណ៍ថ្មីៗរបស់អគ្គនាយកដ្ឋានគយ និងរដ្ឋាករកម្ពុជា ។ ចាប់ពីខែមករាដល់ខែមេសា ការនាំចេញរបស់កម្ពុជាទៅកាន់ប្រទេសថៃមានចំនួនសរុបជិត៣២៨លានដុល្លារ ធ្លាក់ចុះ២,៩ ភាគរយ ផ្ទុយទៅវិញការនាំចូលរបស់កម្ពុជាពីប្រទេសថៃ បានកើនឡើង៩,៤ ភាគ ពោល គឺមានតម្លៃ ១,១៦ ពាន់លានដុល្លារ ។
នេះ គឺជានិន្នាការនៃកិច្ចសហប្រតិបត្តិការសេដ្ឋកិច្ចរបស់កម្ពុជាជាមួយនឹងប្រទេសជិតខាងទាំងពីរ ដែលនៅទិសខាងកើត និងខាងលិច ខណៈដែលជាមួយនឹងឡាវ គឺមានទំហំតិចតួចនៅឡើយទេ ។ ការនាំចេញរបស់កម្ពុជាទៅកាន់ប្រទេសជិតខាងនៅខាងកើត និងខាងលិច គឺជាទូទៅផលិតផលកសិកម្មដែលជាវត្ថុធាតុដើមសំខាន់សម្រាប់ការកែច្នៃ ហើយនាំចូលមកវិញ គឺជាផលិតផលសម្រេច គ្រឿងអេឡិចត្រូនិច ផលិតផលប្រើប្រាស់ ប្រេងឥន្ធនៈ …។ល។
សរុបទៅ និន្នាការនៃទំនាក់ទំនងសហប្រតិបត្តិការសេដ្ឋកិច្ចជាមួយនឹងប្រទេសជិតខាង គឺនៅតែប្រសើរ ហើយស្ថានភាពទំនងជាកាន់តែប្រសើរឡើងថែមទៀត ។ ដូច្នេះយើងសង្ឃឹមថា ភាគីពាក់ព័ន្ធនឹងបន្តយកចិត្តទុកដាក់ ដើម្បីឲ្យយើងសម្រេចបាននូវកំណើនពាណិជ្ជកម្មតាមការចង់បានរបស់សាមីភាគីនីមួយៗ ៕
ចែករំលែកព័តមាននេះ