និទស្សន៍ពាណិជ្ជកម្មដែលកម្ពុជាអាចសម្រេចបាននៅក្នុងរយៈពេល៥ខែដើមឆ្នាំ២០២៥កន្លងទៅនេះត្រូវបានក្រសួងពាណិជ្ជកម្មអះអាងថា អាចសម្រេចរហូតដល់ទៅ២៥,៥ ពាន់លានដុល្លារ ដែលជាសមិទ្ធផលសេដ្ឋកិច្ចដ៏ធំដែលកម្ពុជាអាចសម្រេចបាន។ ដូច្នេះប្រសិនបើ កម្ពុជាអាចបន្តហែលព្យុះភ្លៀងនៃបញ្ហាក្តៅៗនានាបាននោះ កម្ពុជាពិតជាអាចនឹងក្លាយទៅជាខ្លានៃសេដ្ឋកិច្ចមួយនៅក្នុងតំបន់ ។ ឈានចូលដល់ឆ្នាំ២០២៥នេះ ពិភពលោកពិតជាបានឆ្លងកាត់នូវបញ្ហាប្រឈមជាច្រើន…
និទស្សន៍ពាណិជ្ជកម្មដែលកម្ពុជាអាចសម្រេចបាននៅក្នុងរយៈពេល៥ខែដើមឆ្នាំ២០២៥កន្លងទៅនេះត្រូវបានក្រសួងពាណិជ្ជកម្មអះអាងថា អាចសម្រេចរហូតដល់ទៅ២៥,៥ ពាន់លានដុល្លារ ដែលជាសមិទ្ធផលសេដ្ឋកិច្ចដ៏ធំដែលកម្ពុជាអាចសម្រេចបាន។ ដូច្នេះប្រសិនបើ កម្ពុជាអាចបន្តហែលព្យុះភ្លៀងនៃបញ្ហាក្តៅៗនានាបាននោះ កម្ពុជាពិតជាអាចនឹងក្លាយទៅជាខ្លានៃសេដ្ឋកិច្ចមួយនៅក្នុងតំបន់ ។
ឈានចូលដល់ឆ្នាំ២០២៥នេះ ពិភពលោកពិតជាបានឆ្លងកាត់នូវបញ្ហាប្រឈមជាច្រើន ដែលរួមមានផលប៉ះពាល់នៃសំណល់ដោយការរីករាលដាលដោយមេរោគកូវីដ១៩ ការអូសបន្លាយនៃសង្គ្រាមនៅអ៊ុយក្រែន ភាពតានតឹងនៃភូមិសាស្ត្រនយោបាយ ហើយអ្វីដែលថ្មីគឺសង្គ្រាមពាណិជ្ជកម្មជុំថ្មីរវាងសហរដ្ឋអាមេរិកនិងចិន បញ្ហារបាំងនៃគំនាបពន្ធបដិការរបស់សហរដ្ឋអាមេរិកមកលើពិភពលោកជាពិសេសគឺ ទីផ្សារសំខាន់ៗរបស់កម្ពុជា និង សង្គ្រាមរវាងឥណ្ឌានិងប៉ាគីស្ថានដែលជារដ្ឋមានអាវុធនុយក្លេអ៊ែរ។
នៅក្នុងបរិបទនេះ ពាណិជ្ជកម្មកម្ពុជាឃើញថា គឺអាចសម្របហើយបន្សាំខ្លួនបានយ៉ាងប្រសើរបំផុតដោយមិនត្រឹមតែរក្សាជញ្ជីងពាណិជ្ជកម្មមិនអោយធ្លាក់ចុះទេ គឺអាចសម្រេចបាននូវកំណើនគួរជាទីមោទនៈផងដែរ ។
យោងតាមស្ថិតិដែលទទួលបានពីក្រសួងពាណិជ្ជកម្មកាលពីពេលថ្មីៗកន្លងទៅនេះបានឱ្យដឹងថា ទំហំពាណិជ្ជកម្មអន្តរជាតិរបស់កម្ពុជាជាមួយនឹងបណ្តាប្រទេសនានា គឺអាចសម្រេចបាននូវទំហំពាណិជ្ជកម្ម សរុប ២៥,៥០ ពាន់លានដុល្លារ នៅក្នុងរយៈពេល ៥ ខែដំបូងនៃឆ្នាំ២០២៥ ។
ទំហំពាណិជ្ជកម្មនេះបានធ្វើឲ្យទំហំពាណិជ្ជកម្មកម្ពុជាសម្រេចបាននូវកំណើនប្រមាណជា១៨ ភាគរយ ធៀបនឹង២១,៦១ពាន់លានដុល្លារដែលកម្ពុជាអាចសម្រេចបានកាលពីអំឡុងរយៈពេលដដែលកាលពីឆ្នាំ ២០២៤កន្លងទៅ ។
ការនាំចេញសម្រេចបានលទ្ធផលសរុបប្រមាណជាជាង១២ ពាន់លានដុល្លារ ហើយនាំចូលប្រមាណជា ១៣,៤៨ ពាន់លានដុល្លារ។ ការនាំចេញពីខែមករា ដល់ខែឧសភា ឆ្នាំ២០២៥នេះមានកំណើនប្រមាណជាជិត ១៨ ភាគរយដែរ ហើយការនាំចូលមកវិញគឺំមានកំណើនជាង ១៨ ភាគរយ ។
ដៃគូពាណិជ្ជកម្មធំៗរបស់កម្ពុជាគឺ បណ្តាប្រទេសសមាជិកនៃកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ដែលមានសមាជិក១៥ប្រទេស សហភាពអឺរ៉ុប សហរដ្ឋអាមេរិក ជាដើម ។
នេះគឺជាអ្វីដែលកម្ពុជាអាចសម្រេចបាននៅក្នុងរយៈពេល៥ខែកន្លងទៅ ហើយក្រៅពីបញ្ហាជាប្រពៃណីដែលរៀបរាប់ខាងលើ ផលប៉ះពាល់នៃសង្គ្រាមរវាងអ៊ីស្រាអែលនិងអ៊ីរ៉ង់ដ៏ក្តៅគគុកនៅមជ្ឈឹមបូព៌ា ការអនុគ្រោះពន្ធបដិកាដែលសហរដ្ឋអាមេរិកបានដាក់នឹងបញ្ចប់នៅថ្ងៃទី០៩ ខែកក្កដា បូកផ្សំនិងបញ្ហាតានតឹងនៅព្រំដែន ដែលនាំអោយមានការរអាក់រអួលចរន្តពាណិជ្ជកម្មរវាងកម្ពុជានិងថៃ ថ្មីៗនេះ ក៏ជាបញ្ហា ប្រឈមថ្មីដែលនឹងតម្រូវឲ្យកម្ពុជាត្រូវលើកកម្ពស់ ការយកចិត្តទុកដាក់ដើម្បីរក្សាលំហូរពាណិជ្ជកម្មបន្តផងដែរ ។
អ្វីដែលបានកើតមានឡើងនៅចុងខែឧសភា និង ពាក់កណ្តាលខែមិថុនា ហើយនឹងកើតឡើងនៅក្នុងសប្តាហ៍ទី២នៃខែកក្កដាខាងមុខ វាគឺជាសុទ្ធតែជាការប្រឈមថ្មី ដែលត្រូវតែកម្ពុជាហែលឆ្លង ប៉ុន្តែគេជឿជាក់ថា កត្តារួមផ្សំដទៃទៀតអាចបន្តឲ្យកម្ពុជា ហែលឆ្លងបញ្ហានៅពេលខាងមុខបាន ។
កត្តាទាំងនោះត្រូវបានគេលើកឡើងថា ស្ថិរភាពនយោបាយ និងកំណើនសេដ្ឋកិច្ចរបស់កម្ពុជា បានក្លាយជាកត្តាជំរុញដ៏សំខាន់ក្នុងការទាក់ទាញការកើនឡើងនៃការវិនិយោគពីបរទេស និងក្នុងស្រុក។ លំហូរចូលនេះបានរួមចំណែកដល់ការកើនឡើងគួរឱ្យកត់សម្គាល់នៅក្នុងការនាំចេញផលិត និងកែច្នៃរបស់ប្រទេសទៅកាន់ទីផ្សារផ្សេងៗទូលំទូលាយ។
ក្រៅពីនោះការទូតពាណិជ្ជកម្មនិងសេដ្ឋកិច្ចដ៏សកម្មរបស់រដ្ឋាភិបាលដែលដឹកនាំដោយក្រុមអ្នកបន្តវេនបានកំពុងតែជំរុញទំនាក់ទំនងយ៉ាងរឹងមាំជាមួយដៃគូអន្តរជាតិ និងកំពុងបង្កើតចំណាប់អារម្មណ៍ជាវិជ្ជមាន ដល់កម្ពុជា។
នៅពេលនេះ ក្រៅពីបន្តរកទីផ្សារនាំចេញផលិតផលជាវត្ថុធាតុដើម កម្ពុជាក៏កំពុងតែបង្កើនសន្ទុះនិងការចាប់អារម្មណ៍លើការវិនិយោគនៅក្នុងការកៃច្នៃនិងវេចខ្ចប់ផលិតផលនៅក្នុងស្រុកដើម្បីបង្កើន តម្លៃបន្ថែមដល់ការនាំចេញ ឧទាហរណ៍ដូចជាការកែច្នៃគ្រាប់ស្វាយចន្ទី ការបង្កើតរោងចក្រផលិតសំបកកង់ ដែលប្រើប្រាស់វត្ថុធាតុដើមនៅក្នុងស្រុក ។ល។
សរុបទៅជាមួយនឹងការកើនឡើងនូវទំនុកចិត្តរបស់វិនិយោគិនបរទេសនិងនៅក្នុងស្រុកដែលមានស្រាប់ បូកផ្សំនឹងបរិយាកាសនយោបាយប្រកបដោយស្ថេរភាព និង ការទទួលការកញ្ចប់លើកទឹក ចិត្តផ្សេងៗ ដែល អំណោយផលដល់ការស្វែងរកប្រាក់ចំណេញ ប្រទេសកម្ពុជាពិតជានឹងបន្តរក្សាបាននូវទីតាំងល្អក្នុងការពង្រឹងកេរ្តិ៍ឈ្មោះរបស់ខ្លួនជាមជ្ឈមណ្ឌលផលិតកម្មដែលកំពុងរីកចម្រើននៅក្នុងតំបន់ ។ កំណើននេះស្របហើយពិតជាអាចនឹងរក្សាបានតាមចក្ខុវិស័យរបស់រដ្ឋាភិបាលក្នុងការប្រែក្លាយកម្ពុជាទៅជាសេដ្ឋកិច្ចដ៏ស្វាហាប់ ជាមួយនឹងមូលដ្ឋាននាំចេញចម្រុះ។
ការបញ្ជាក់ពីសារៈសំខាន់នៃការបន្តកំណែទម្រង់ និងការអភិវឌ្ឍន៍ហេដ្ឋារចនាសម្ព័ន្ធ ដែលមានក៏ជាចំណុចវិជ្ជមានឆ្លើយតបនឹងបញ្ហា ។ ជាការពិត រលកនៃបញ្ហាវាពិតជាបោកបក់ខ្លាំង ប៉ុន្តែប្រសិនបើយើងអាចបន្សាំហើយ ឈានទៅរកការពង្រឹងជំហរមួយច្បាស់លាស់ កំណើននៃពាណិជ្ជកម្មនឹងបន្ត ដំណើរទៅមុខបន្តទៀត ៕
ចែករំលែកព័តមាននេះ