សម័យនេះ សម័យ៥G និងឌីជីថល ស្អីក៏ទំនើបដែរ រហូតដល់អ្នកខ្លះដើរទៅណាមកណាលែងមានលុយនៅក្នុងហោប៉ៅហើយ ។ សូម្បីតែសប់កង់ម៉ូតូ៥០០រៀល ក៏បានទូរទាត់លុយតាមទូរស័ព្ទដៃដែរ ។ ប៉ុន្តែទន្ទឹមនឹងភាពងាយស្រួល…
សម័យនេះ សម័យ៥G និងឌីជីថល ស្អីក៏ទំនើបដែរ រហូតដល់អ្នកខ្លះដើរទៅណាមកណាលែងមានលុយនៅក្នុងហោប៉ៅហើយ ។ សូម្បីតែសប់កង់ម៉ូតូ៥០០រៀល ក៏បានទូរទាត់លុយតាមទូរស័ព្ទដៃដែរ ។ ប៉ុន្តែទន្ទឹមនឹងភាពងាយស្រួល តើអ្នកណាខ្លះធ្លាប់អស់លុយពីក្នុងកុងមិនដឹងខ្លួនដែរឬទេ?
ពាក់ព័ន្ធនឹងបញ្ហានេះ មានអ្នកចែករំលែកតាមបណ្តាញសង្គមខ្លះៗ ហើយនាពេលថ្មីៗកន្លងទៅនេះ ពាក់ព័ន្ធនឹងការអស់លុយពីក្នុងកុងមិនដឹងមូលហេតុ ។ តាមការចែកចាយ អ្នកដែលអស់លុយនោះ គឺដោយកូនៗរបស់ពួកគេយកទូរស័ព្ទឪពុកម្តាយដែលមានគណនីធនាគារ នៅក្នុងនោះទៅកុម្ម៉ង់ទិញអាហារដែលពួកគេចូលចិត្ត ។
ក្មេងៗឥឡូវឆាប់ចាប់បានណាស់ រឿងបច្ចេកវិទ្យានេះ ដោយអ្នកខ្លះពួកគេបានឃើញតែឪពុកម្តាយគេចុចតែម្តងទេ គឺគេអាចចាំបានទាំងអស់ ហើយពួកគេក៏អាចនឹងយកទូរស័ព្ទយើងចុចនាំឲ្យមានបញ្ហាក៏មានផងដែរ ។ ពួកគេអាចសង្កេត តាំងពីពេលដែលយើងចាប់ផ្តើម និងបញ្ចប់ប្រតិបត្តិការ ហើយគេអាចយកមកប្រើប្រាស់ គឺបានយ៉ាងងាយបំផុត ។
ក្រៅពីនោះក៏មានអ្នកខ្លះ គឺត្រូវបានកូនៗរបស់ពួកគេដែលចូលចិត្តលេងហ្គេមអនឡាញលួចទូរស័ព្ទវេលុយយកទៅបញ្ជាទិញអ្វីៗនៅក្នុងហ្គេម ដើម្បីគេលេងឈ្នះ ។ អ្នកខ្លះទៀតក៏អាចនឹងលួចវេលុយពីគណនីឪពុកម្តាយទៅគណនេយ្យរបស់ពួកគេបាន ពីព្រោះនៅសម័យនេះធនាគារខ្លះ គឺមិនចាំបាច់ទៅធនាគារទេគឺអោយតែមានអត្តសញ្ញាណប័ណ្ណដែលអាជ្ញាធរចេញចាប់តាំងពីអាយុ១៦ឆ្នាំ គឺពួកគេអាចបង្កើតគណនីធនាគារបានហើយ ។
ដើម្បីសុវត្ថិភាព ឪពុកម្តាយគួរកុំទម្លាប់ឲ្យកូនៗលេងទូរស័ព្ទផ្ទាល់ខ្លួនរបស់យើង ហើយគួរតែឧស្សាហ៍ធ្វើការផ្លាស់ប្តូរលេខសម្ងាត់គណនីធនាគារនានា ដែលមាននៅក្នុងទូរស័ព្ទពីព្រោះថា ក្មេងៗ គឺពួកគេពិតជា រវាសភ្នែកណាស់ ។ គេក្រឡេកតែមួយភ្លែត គេអាចចាំលេខសម្ងាត់ធនាគារយើងបានដោយងាយ ។
មិនបានទេ ក្មេងៗសម័យនេះ ពួកគេមានភាពវ័យឆ្លាត ហើយកាន់តែវាងវៃ ដូច្នេះគួរតែលើកកម្ពស់ការប្រុងប្រយ័ត្ន ដើម្បីសុវត្ថិភាពគួរតែកុំធ្វេសប្រហែស ប្រយ័ត្នទឹកភ្នែកហើយយំលែងចេញ ។ ក្រៅពីការ ប្រុងប្រយ័ត្នហើយនោះឪពុកម្តាយគួរតែព្យាយាមបញ្ជ្រាបចំណេះដឹង នៅក្នុងការស្វ័យរិះគិតអំពីការទទួលខុសត្រូវដល់កូនៗរបស់ពួកគេ ដើម្បីកុំអោយពួកគេងប់ងល់នឹងអ្វីមួយ ។ ហើយក៏ត្រូវតែប្រុងប្រយ័ត្នដែរ ចំពោះក្មេងតូចៗ ដោយពេលខ្លះពួកគេមិនមានចេតនា ប៉ុន្តែដោយសារតែការចង់ចេះចង់ដឹង ពួកគេអាចនឹងស្រាវជ្រាវចុចនេះចុចនោះនាំឲ្យយើងអាចខូចខាតទ្រព្យសម្បត្តិហើយនោះ គឺអាចនឹងមានបញ្ហាពាក់ព័ន្ធនឹងសុវត្ថិភាពនៅក្នុងប្រព័ន្ធហិរញ្ញវត្ថុនេះផងដែរ ។
នៅក្នុងករណីដែលឪពុកម្តាយនោះ ជួបករណីនេះគួរតែនិយាយជាមួយកូនៗដោយត្រង់នៅពេលមានបញ្ហានេះកើតឡើង ហើយព្យាយាមពន្យល់ពួកគេដោយហេតុ និងផល ក៏ដូចជា បញ្ហាប្រឈមពីទង្វើររបស់ពួកគេ ។ ឪពុកម្តាយ គួរតែបញ្ជ្រាបចំណេះដឹងអំពីហិរញ្ញវត្ថុ ហានិភ័យនៃការចាយវាយផ្តេសផ្តាស់ ហើយក៏គួរតែទម្លាប់កុំអោយកូនៗកាន់ទូរស័ព្ទដៃរបស់យើងលេង ។
សរុបទៅសូមប្រុងប្រយ័ត្ន ! សម័យនេះអ្វីក៏ស្រួលដែរ ប៉ុន្តែការស្រួលពេកនេះក៏វានឹងបង្កជាបញ្ហានៅពេលអនាគត ដូច្នេះយើងគួរតែទុកដាក់ទូរស័ព្ទឲ្យត្រឹមត្រូវ ។ សូមកុំទម្លាប់ឲ្យកូនៗកាន់ទូរស័ព្ទរបស់យើង ពីព្រោះពួកគេនៅខ្ចីណាស់ ដូច្នេះយើងអាចនឹងមានបញ្ហាខាតបង់ បើយើងប្រហែស ៕
ចែករំលែកព័តមាននេះ