ក្នុងមួយសប្តាហ៍នេះ សម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជានឹងមមាញឹកខ្លាំងក្នុងការជួបជាមួយមេដឹកនាំប្រទេសសមាជិកអាស៊ាន និងជប៉ុនផងដែរ ដើម្បីចាក់គ្រឹះកាន់តែរឹងមាំលើទំនាក់ទំនងសេដ្ឋកិច្ច និងនយោបាយជាមួយប្រទេសទាំង៩ផ្សេងទៀត នៅក្នុងអាស៊ាន និងប្រទេសជប៉ុនផងដែរ ។…
ក្នុងមួយសប្តាហ៍នេះ សម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជានឹងមមាញឹកខ្លាំងក្នុងការជួបជាមួយមេដឹកនាំប្រទេសសមាជិកអាស៊ាន និងជប៉ុនផងដែរ ដើម្បីចាក់គ្រឹះកាន់តែរឹងមាំលើទំនាក់ទំនងសេដ្ឋកិច្ច និងនយោបាយជាមួយប្រទេសទាំង៩ផ្សេងទៀត នៅក្នុងអាស៊ាន និងប្រទេសជប៉ុនផងដែរ ។
សម្តេចធិបតី និងលោកជំទាវ ពេជ្រ ចន្នមុន្នី ព្រមទាំងមន្ត្រីជាន់ខ្ពស់កម្ពុជាមួយចំនួនបានចាកចេញពីកម្ពុជាកាលពីថ្ងៃទី២៥ ខែឧសភា ដើម្បីចូលរួមកិច្ចប្រជុំកំពូលអាស៊ាន នៅទីក្រុងកូឡាឡាំពួរ ប្រទេសម៉ាឡេស៊ី ពីថ្ងៃទី២៦ ដល់២៧ ខែឧសភា ។
នៅថ្ងៃទី២៦ ខែឧសភា សម្តេចក៏បានចាប់ផ្តើមចូលរួមកិច្ចប្រជុំកំពូលអាស៊ាន និងជួបជាមួយមេដឹកនាំប្រទេសមួយចំនួនរួចទៅហើយដូចជា នាយករដ្ឋមន្ត្រីម៉ាឡេស៊ី លោក អាន់ វ៉ា អ៊ីប្រាហ៊ីម ស្តេចស៊ុលតង់នៃប្រទេសប្រ៊ុយណេ Haji Hassanal Bolkiah Mu’ izzadin Waddaulah លោក ផាម មិញជិញ នាយករដ្ឋមន្ត្រីវៀតណាម និងលោក សនសៃ ស៊ីផាន់ដន នាយករដ្ឋមន្ត្រីឡាវ ។ សម្តេចនឹងអាចបន្តជួបជាមួយមេដឹកនាំប្រទេសអាស៊ានផ្សេងៗទៀតផងដែរ ក្រៅពីការជួបគ្នាក្នុងជំនួបកំពូលអាស៊ាន ។
ក្នុងដំណើរទស្សនកិច្ចទៅកាន់ម៉ាឡេស៊ី សម្តេចធិបតី ហ៊ុន ម៉ាណែត នឹងពិភាក្សាជាមួយមេដឹកនាំអាស៊ានស្តីពីបញ្ហាសំខាន់ៗរួមមាន ការពង្រឹងសហប្រតិបត្តិការសេដ្ឋកិច្ច ការអភិវឌ្ឍហេដ្ឋារចនាសម្ព័ន្ធ និងសន្តិសុខតំបន់ផងដែរ ។
ដូច្នេះ ទស្សនកិច្ចរបស់សម្តេច នៅប្រទេសម៉ាឡេស៊ីនឹងក្លាយជាឱកាសដ៏មានតម្លៃខ្លាំងក្លាសម្រាប់សម្តេចពិភាក្សាបញ្ហាទ្វេភាគី តំបន់ និងអន្តរជាតិ ដើម្បីស្វែងរក និងពង្រីកកិច្ចសហប្រតិបត្តិការរវាងប្រទេសកម្ពុជា និងប្រទេសផ្សេងទៀតក្នុងគោលបំណងបង្កើតសន្តិភាព ស្ថេរភាព និងការអភិវឌ្ឍដល់ប្រទេសកម្ពុជា ។
ខណ:ដែលកម្ពុជាកំពុងមានស្ថេរភាពនយោបាយ និងសន្តិភាពនោះរដ្ឋាភិបាលកំពុងប្រឹងប្រែងមិនសំចៃកម្លាំង ដើម្បីធ្វើយ៉ាងណាអោយសេដ្ឋកិច្ចកម្ពុជាបន្តមានកំណើន និងរីកសម្រើនកាន់តែខ្លាំងក្លា ដើម្បីទប់ទល់នឹងព្យុះភ្លៀងនៃវិបត្តិពិភពលោក ។
ការជំរុញការវិនិយោគ និងពាណិជ្ជកម្មរវាងកម្ពុជា និងប្រទេស៩ផ្សេងទៀត ក្នុងអាស៊ាននឹងក្លាយជារបៀបវារដ៏សំខាន់នៅក្នុងពេលដែលសម្តេចជួបមេដឹកនាំអាស៊ានទាំង៩ផ្សេងទៀតនៅម៉ាឡេស៊ី ។ ខណ:ដែលសម្តេចធិបតី ត្រូវចូលរួមកិច្ចប្រជុំកំពូលអាស៊ាន ដល់ថ្ងៃទី២៧ ខែឧសភានោះ សម្តេចក៏នឹងគ្រោងបំពេញទស្សនកិច្ចផ្លូវការនៅប្រទេសជប៉ុនបន្តទៀត ចាប់ពីថ្ងៃទី២៨ ដល់៣១ ខែឧសភា ។
ក្រសួងការបរទេសកម្ពុជា បានប្រកាសអោយដឹងថា ក្នុងទស្សនកិច្ចការងារផ្លូវការ នៅជប៉ុននោះ សម្តេចធិបតី នឹងជួបប្រជុំទ្វេភាគីជាមួយនាយករដ្ឋមន្ត្រីជប៉ុន គឺលោក អ៊ីស៊ីបា ស៊ូហ្គេរុ ( ISHIBA Shigeru) ព្រមទាំងមានគម្រោងជួបជាមួយថ្នាក់ដឹកនាំស្ថាប័ននីតិបញ្ញត្តិជប៉ុនផងដែរ ។
ខណ:ជប៉ុនជាប្រទេសផ្តល់ជំនួយដ៏សំខានសម្រាប់កម្ពុជា និងមានសហប្រតិបត្តិការល្អជាមួយកម្ពុជានោះសម្តេចធិបតីនឹងប្រែក្លាយទស្សនកិច្ចនេះ អោយក្លាយជាការពង្រីក និងពង្រឹងសហប្រតិបត្តិការលើគ្រប់វិស័យជាមួយជប៉ុន ដើម្បីផលប្រយោជន៍រវាងប្រទេសទាំងពីរ ។ សំខាន់ដូចគ្នានេះដែរ សម្តេចធិបតី គ្រោងនឹងថ្លែងសុន្ទរកថា គន្លឹះនៅក្នុងសន្និសីទអន្តរជាតិ លើកទី៣០ស្តីពី «អនាគតនៃអាស៊ី» ហើយក៏នឹងចូលរួមវេទិកាធុរកិច្ចកម្ពុជា-ជប៉ុន ផងដែរ ។
ដូច្នេះ ទស្សនកិច្ចរបស់សម្តេចធិបតី នៅជប៉ុនក៏នឹងជួយជំរុញកំណើនពាណិជ្ជកម្មរវាងកម្ពុជា និងជប៉ុន ពិសេសពង្រីកការនាំចេញផលិតផលកម្ពុជា ទៅកាន់ទីផ្សារជប៉ុន និងទាក់ទាញវិនិយោគិនជប៉ុនអោយមករកស៊ីកាន់តែច្រើននៅកម្ពុជាផងដែរ ។
ការជួបរវាងលោក ហ៊ុន ម៉ាណែត និងមេដឹកនាំតំបន់នៅសប្តាហ៍នេះបានបង្ហាញពីភាពច្នៃប្រឌិតរបស់កម្ពុជាក្នុងការពង្រឹងទំនាក់ទំនងអន្តរជាតិ ដោយមានផលប្រយោជន៍សំខាន់ៗដូចជា សេដ្ឋកិច្ច នយោបាយ និងវប្បធម៌ព្រមទាំងវិស័យផ្សេងៗទៀត ៕
ចែករំលែកព័តមាននេះ