ទីក្រុងគូឡាឡាំពួរ៖ នាយករដ្ឋមន្ត្រីម៉ាឡេស៊ី លោកអាន់វ៉ាអ៊ីប្រាហ៊ីម វាយតម្លៃខ្ពស់ចំពោះការរីកចម្រើនទៅមុខគួរឱ្យកត់សម្គាល់នៅក្នុងការដោះស្រាយបញ្ហានៅមីយ៉ាន់ម៉ា។ នៅពេលនេះ អាស៊ានកំពុងរៀបចំកិច្ចប្រជុំកំពូលរបស់ខ្លួនដើម្បីដោះស្រាយបញ្ហាជាប់គាំងនៅក្នុងបញ្ហាដំឡើងពន្ធរបស់លោកត្រាំ។ បញ្ហាមីយ៉ាន់ម៉ាដែលជាប្រធានបទសំខាន់ពិតមែនហើយនៅក្នុងកិច្ចប្រជុំអាស៊ាន។ ប៉ុន្តែបញ្ហាដំឡើងពន្ធក៏ជាប្រធានបទសំខាន់ផងដែរ។
គេរំពឹងថាថ្នាក់នាំអាស៊ាននឹងពិភាក្សាអំពីការចរចាគ្នាសាជាថ្មីនៅក្នុងចំណោមភាគីជម្លោះនៅមីយ៉ាន់ម៉ាបន្ទាប់ពីកិច្ចខិតខំប្រឹងប្រែងនេះហាក់ដូចជាជាប់គាំងមួយកន្លែង។ ប៉ុន្តែកិច្ចខិតខំប្រឹងប្រែងនេះចាប់ផ្ដើមងើបឡើងវិញនៅពេលលោកអាន់វ៉ាអ៊ីប្រាហ៊ីមធ្វើជាប្រធានអាស៊ាន។ លោកចង់ប្រមូលភាគីជម្លោះទាំងអស់មកអង្គុយជុំគ្នានៅតុចរចាដើម្បីដោះស្រាយបញ្ហា។
កាលពីខែមេសា លោកអាន់វ៉ាបានរៀបចំកិច្ចប្រជុំជាមួយប្រមុខយោធាភូមា ឧត្ដមសេនីយ៍មីនអុងឡាំង នៅទីក្រុងបាងកក និងរៀបចំកិច្ចប្រជុំតាមប្រព័ន្ធវីឌីអូពីចម្ងាយជាមួយរដ្ឋាភិបាលស្រមោល។ ថ្ងៃនេះ លោកចាត់ទុកកិច្ចជំនួបទាំងនោះថាមានសារៈសំខាន់។ គ្រាន់តែថាស្ថានភាពនយោបាយពោរពេញដោយភាពផុយស្រួយ។ លោកថ្លែងថាកិច្ចខិតខំប្រឹងប្រែងរបស់យើងមានដំណើរការទៅមុខ។ យូរឬឆាប់ យើងគង់តែរកឃើញដំណោះស្រាយជាមិនខានទេ។
នៅក្នុងកិច្ចប្រជុំលើកនេះ អាស៊ានក៏ត្រៀមជួបនាយករដ្ឋមន្ត្រីចិន និងថ្នាក់ដឹកនាំប្រទេសជាដៃគូនៅឈូងសមុទ្រអារ៉ាប់ផងដែរដើម្បីពិភាក្សាគ្នាអំពីបញ្ហាពាណិជ្ជកម្មដែលកំពុងប្រឈមនឹងបញ្ហាថ្មីដោយសារការដំឡើងពន្ធរបស់លោកត្រាំ។ ប្រទេសចំនួន៦នៅអាស៊ានត្រូវលោកត្រាំដំឡើងពន្ធចាប់ពី៣២%រហូត៤៩% និងព្យួរទុករយៈពេល៩០ថ្ងៃ។ បើនៅក្នុងសម័យអន្តរកាលនេះ (រហូតខែកក្កដា) ភាគីទាំង២ចរចាមិនត្រូវគ្នាទេ អត្រាពន្ធនេះនឹងចាប់ផ្ដើមអនុវត្ត។
លោកអាន់វ៉ាថ្លែងថាលោកបានសរសេរលិខិតមួយច្បាប់ផ្ញើជូនលោកត្រាំដើម្បីស្នើសុំឱ្យរៀបចំកិច្ចជំនួបរវាងអាមេរិក និងអាស៊ានដោះស្រាយបញ្ហាដំឡើងពន្ធ។ ប៉ុន្តែរដ្ឋមន្ត្រីការបរទេសម៉ាឡេស៊ីថ្លែងថាទីក្រុងវ៉ាស៊ីនតោនមិនទាន់ឆ្លើយតបនៅឡើយទេ។ នៅក្នុងការជួបគ្នាលើកនេះក៏មាននិយាយអំពីការបន្តពិភាក្សាគ្នាអំពីក្រមប្រតិបត្តិនៅសមុទ្រចិនខាងត្បូងផងដែរ៕
ចែករំលែកព័តមាននេះ