ខេត្តស្ទឹងត្រែង ៖ អន្លង់ចំនួន៣ជាទីជម្រកនៃសត្វផ្សោត ដែលមានចន្លោះពី២៥ ទៅ៣០ក្បាល ។ ដោយឡែក យោងតាមការតាមដានរបស់មន្ត្រីជំនាញក្នុងឆ្នាំ២០២៥ សត្វផ្សោតកើតថ្មីចំនួន២ក្បាល រីឯការងាប់គឺពុំមាននោះឡើយ…
ខេត្តស្ទឹងត្រែង ៖ អន្លង់ចំនួន៣ជាទីជម្រកនៃសត្វផ្សោត ដែលមានចន្លោះពី២៥ ទៅ៣០ក្បាល ។ ដោយឡែក យោងតាមការតាមដានរបស់មន្ត្រីជំនាញក្នុងឆ្នាំ២០២៥ សត្វផ្សោតកើតថ្មីចំនួន២ក្បាល រីឯការងាប់គឺពុំមាននោះឡើយ ។ នេះបើតាមការឲ្យដឹងពីលោកស្រី សំវិចិត្រ នាយខណ្ឌជលផលខេត្តស្ទឹងត្រែង បានប្រាប់កោះសន្តិភាព នាថ្ងៃទី២៦ ឧសភា២០២៥ ។
នាយខណ្ឌជលផលបានបញ្ជាក់ទៀតថា សម្រាប់ក្នុងខេត្តស្ទឹងត្រែង មានអន្លង់សត្វផ្សោតរស់នៅចំនួន៣នោះ គឺអន្លង់សន្ទុ អន្លង់កោះកូនសត្វ និងអន្លង់ត្បូងខ្លា។ ដែលបច្ចុប្បន្ន មន្ត្រីរបស់យើងបានរួមសហការជាមួយសហគមន៍នេសាទឆ្មាំទន្លេ និងបណ្ដាអង្គភាពពាក់ព័ន្ធផ្សេងទៀតខិតខំប្រឹងប្រែងតាមដានអភិរក្សការពារយ៉ាងយកចិត្តទុកដាក់បំផុតផងដែរ ។
ដោយឡែក ស្ថិតនៅអន្លង់កាំពី ក្នុងភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ កាលពីថ្ងៃទី២៥ ខែឧសភា ឆ្នាំ២០២៥ កូនសត្វផ្សោតមួយក្បាល ត្រូវគេប្រទះឃើញក្នុងហ្វូងសត្វផ្សោតធំៗ៤ក្បាលផ្សេងទៀត ដែលតាមការប៉ាន់ស្មានទើបមានអាយុប្រមាណជា២ថ្ងៃប៉ុណ្ណោះ ។
យោងតាមក្រសួងកសិកម្ម បើគិតត្រឹមដើមខែឧសភា ឆ្នាំ២០២៥ នេះ កម្ពុជាទទួលបានកូនផ្សោតកើតថ្មីចំនួន៧ក្បាល ក្នុងនោះ ៥ក្បាលកើតនៅខេត្តក្រចេះ និង២ក្បាលនៅខេត្តស្ទឹងត្រែង ដែលធ្វើឲ្យចំនួនសត្វផ្សោតទន្លេមេគង្គនៅកម្ពុជាសរុបកើនឡើងដល់ចំនួន១១១ក្បាលហើយ ។
ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផល ជាសេនាធិការ សូមថ្លែងអំណរគុណយ៉ាងជ្រាលជ្រៅអស់ពីដួងចិត្ត ចំពោះការលះបង់របស់បងប្អូនឆ្មាំទន្លេទាំង៧២រូប នៅខេត្តស្ទឹងត្រែង និងក្រចេះ ក្នុងបុព្វហេតុអភិរក្សសត្វផ្សោតទន្លេមេគង្គ ហើយក្រសួងនឹងខិតខំប្រឹងប្រែងអស់ពីលទ្ធភាព ដើម្បីគាំទ្រការងាររបស់បងប្អូនឆ្មាំទន្លេយើង ៕
ចែករំលែកព័តមាននេះ