ខេត្តស្វាយរៀង ៖ បុរសម្នាក់កាប់ត្រាយព្រៃ និងកាប់មែកឫស្សី ហើយគល់ឈើ ត្រូវដុតដើម្បីសម្អាតដីលំនៅឋានខាងក្រោយផ្ទះ ក៏ចំគ្រាប់ផ្ទុះគក្រើកដី បណ្តាលឲ្យរងរបួសធ្ងន់ធ្ងរ ត្រូវក្រុមគ្រួសារដឹកបញ្ជូនមកមន្ទីរពេទ្យខេត្តស្វាយរៀង ដើម្បីសង្គ្រោះ…
ខេត្តស្វាយរៀង ៖ បុរសម្នាក់កាប់ត្រាយព្រៃ និងកាប់មែកឫស្សី ហើយគល់ឈើ ត្រូវដុតដើម្បីសម្អាតដីលំនៅឋានខាងក្រោយផ្ទះ ក៏ចំគ្រាប់ផ្ទុះគក្រើកដី បណ្តាលឲ្យរងរបួសធ្ងន់ធ្ងរ ត្រូវក្រុមគ្រួសារដឹកបញ្ជូនមកមន្ទីរពេទ្យខេត្តស្វាយរៀង ដើម្បីសង្គ្រោះ ។
ករណីផ្ទុះគ្រាប់នេះ កើតឡើងកាលពីវេលាម៉ោង០៥និង៣០នាទីល្ងាចថ្ងៃទី២៣ ខែឧសភា ឆ្នាំ២០២៥ នៅភូមិឫស្សីព្រៃ ឃុំចំឡង ស្រុកស្វាយជ្រំ ។
បើតាមក្រុមគ្រួសារជនរងគ្រោះ បានឲ្យដឹងថា មុនពេលកើតហេតុ ជនរងគ្រោះ បានយកកាំបិតទៅកាប់ត្រាយព្រៃ និងមែកឫស្សី នៅខាងក្រោយផ្ទះ ហើយដុតគុម្ពឫស្សី ដើម្បីសម្អាត ខណៈកំពុងប្រមូលមែកឈើ មែកឫស្សី យកមកដុតកំពុងឆេះ ស្រាប់តែផ្ទុះគ្រាប់ លាន់សូរគ្រាំង! ខ្ទាតអំបែង ត្រូវសុះខ្លួនរងរបួសធ្ងន់តែម្តង ។
បើតាមលោកអធិការនគបាលស្រុកស្វាយជ្រំ បានឲ្យដឹងថា ក្រោយពីផ្ទុះគ្រាប់នោះភ្លាម សមត្ថកិច្ចក៏បានចុះទៅពិនិត្យនៅកន្លែងកើតហេតុ ក៏ប៉ុន្តែ សមត្ថកិច្ចមិនទាន់កំណត់អត្តសញ្ញាណគ្រាប់ដែលផ្ទុះនោះ ជាប្រភេទគ្រាប់អ្វីនៅឡើយទេ គ្រាន់តែសន្និដ្ឋានជំហានដំបូងថា គ្រាប់ផ្ទុះនេះ ជាគ្រាប់បន្សល់ពីសម័យសង្គ្រាម ហើយក៏បានរាយការណ៍ទៅក្រុមអង្គការស៊ីម៉ាក់ CMAC ប្រចាំនៅខេត្តស្វាយរៀង ឲ្យចុះមកពិនិត្យ និងរាវរកនៅជិតទីតាំងនោះ ក្រែងមាននៅសេសសល់ ។
ប្រភពបន្តថា ជនរងគ្រោះឈ្មោះ ព្រាប គន្ធា ភេទប្រុស អាយុ៣៩ឆ្នាំ មុខរបរកសិករ រស់នៅភូមិឫស្សីព្រៃ ឃុំចំឡង ស្រុកស្វាយជ្រំ (របួសធ្ងន់) ។
ប្រភពបន្តទៀតថា លុះព្រឹកឡើងថ្ងៃទី២៤ ឧសភានេះ ក្រុមអង្គភាពស៊ីម៉ាក់ បានចុះទៅពិនិត្យទីតាំងផ្ទុះគ្រាប់ ហើយរាវ រកគ្រាប់ក្រែងមាននៅសល់ ហើយនៅជិតទីតាំងនោះ ក៏បានរាវរកប្រទះឃើញគ្រាប់មិនទាន់ផ្ទុះ ចំនួន០២គ្រាប់ទៀត គ្រាប់ទី១ គឺប្រភេទ M79 និងទី២ ប្រភេទគ្រាប់ 80MM ។ បន្ទាប់មក ក្រុមអង្គការស៊ីម៉ាក់ ក៏បានយកគ្រាប់មិនទាន់ផ្ទុះ ទាំង០២គ្រាប់នោះ ទៅកម្ទេចចោល នៅវាលស្រែក្បែនោះ រួចហើយ ៕
ចែករំលែកព័តមាននេះ