គោលដៅទាក់ទាញទេសចរណ៍ចិនឲ្យបានដល់កម្រិត យ៉ាងហោចណាស់១លាននាក់នាឆ្នាំ២០២៥នេះអាចនឹងសម្រេចបាន ។ ប៉ុន្តែទោះបីជាយ៉ាងណាក៏ដោយ ក៏កុំមើលងាយស្ថានភាព និងសភាពការណ៍តំបន់ និងអន្តរជាតិដែលពាក់ព័ន្ធនានា ។ អ្នកវិភាគមួយរូបបានលើកឡើងថា រឿងគោលនយោបាយ…
គោលដៅទាក់ទាញទេសចរណ៍ចិនឲ្យបានដល់កម្រិត យ៉ាងហោចណាស់១លាននាក់នាឆ្នាំ២០២៥នេះអាចនឹងសម្រេចបាន ។ ប៉ុន្តែទោះបីជាយ៉ាងណាក៏ដោយ ក៏កុំមើលងាយស្ថានភាព និងសភាពការណ៍តំបន់ និងអន្តរជាតិដែលពាក់ព័ន្ធនានា ។
អ្នកវិភាគមួយរូបបានលើកឡើងថា រឿងគោលនយោបាយ និងហេដ្ឋារចនាសម្ព័នដែលគាំទ្រដល់ការទាក់ទាញអ្នកទេសចរចិនមកកម្ពុជាមិនជាឧបសគ្គឡើយ គឺអ្វីៗសុទ្ធតែអំណោយផល ។ ប៉ុន្តែស្ថានភាពពាក់ព័ន្ធវាអាចរាំងស្ទះ និងជះឥទ្ធិពលបាន ។ លោកបានបន្តថា «ទេសចរណ៍ជាវិស័យដ៏រសើប ហើយមានទំនាក់ទំនងដ៏ជិតស្និទនឹងស្ថានការណ៍នានាមិនថា សេដ្ឋកិច្ច សង្គ្រាម ឬសុខភាពឡើយ »។
លោកបានអះអាងថា បញ្ហារលកនៃការរីករាលដាលនៃមេរោគកូវីដ១៩នាពេលថ្មីៗនេះ បញ្ហានៅលើតំបន់ និងអន្តរជាតិ ជាពិសេស គឺបញ្ហាពន្ធបដិការរបស់សហរដ្ឋអាមេរិក សង្គ្រាមពាណិជ្ជកម្មសហរដ្ឋអាមេរិកនិង ចិន គឺសុទ្ធតែជារឿងដែលមានឥទ្ធិពលដល់វិស័យទេសចរណ៍ ។ លោកបានលើកឡើងថា «ពេលនេះ ស្ថានភាពវាមិនជាអីទេពេលនេះ ប៉ុន្តែកុំជិះសេះលែងដៃឲ្យសោះពីព្រោះអ្វីៗ ពិតជាពិបាកស្មានណាស់» ។
អ្នកវិភាគរូបនោះបានឲ្យដឹងថា សម្រាប់កម្ពុជាគោលដៅដែលបានដាក់ចេញវាមិនជាលើសលុបដូចជា ប្រទេសជិតខាងនោះទេ គឺវាសមស្របនឹងធនធានក៏ដូចជា លទ្ធភាពដែលកម្ពុជាអាចទាក់ទាញបាន ។ ប៉ុន្តែស្ថានការណ៍ និងសភាពការអន្តរជាតិពិតជាពិបាកប៉ាន់ប្រមាណទុកណាស់ ករណីដូចជា សង្គ្រាមរវាងឥណ្ឌា និងប៉ាគីស្ថានជាដើម ។
ពាក់ព័ន្ធនឹងផែនការទេសចរណ៍នេះដែរក្រសួងទេសចរណ៍កម្ពុជាបានប្រកាសរួចហើយថា ខ្លួន និងសហការជាមួយនឹងស្ថានទូតចិន ដើម្បីរៀបចំនូវព្រឹត្តិការណ៍មួយគឺ «ឆ្នាំទេសចរណ៍ កម្ពុជា-ចិន ២០២៥» ។
ព្រឹត្តិការណ៍ដែលនឹងត្រូវបើកជាផ្លូវការនៅថ្ងៃទី២៣ ដល់ថ្ងៃទី២៥ ខែឧសភា ឆ្នាំ២០២៥ ដែលជាលទ្ធផលនៃដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកាន់កម្ពុជា គឺសុទ្ធតែជាព្រឹត្តិការណ៍ដែលនឹងលើកកម្ពស់ទីផ្សារទេសចរណ៍កម្ពុជា និងចិន ។
ក្រសួងទេសចរណ៍បានឲ្យដឹងថា ព្រឹត្តិការណ៍នេះនឹងមានការសម្តែងទស្សនីយភាពសិល្បៈរួមគ្នាកម្ពុជា-ចិន នៅសាលសន្និសីទចតុម្មុខ រាជធានីភ្នំពេញ ក៏ដូចជាសម្រាប់មហាជនទស្សនា នៅបរិវេណសួនច្បារតេជោមាសតេជោយ៉ត និងតាមបណ្តោយផ្លូវថ្មើជើងមាត់ទន្លេចតុមុខ ។
មកដល់ពេលនេះ ភ្ញៀវទេសចរចិន គឺជាទីផ្សារទេសចរណ៍លំដាប់ទី៣ របស់កម្ពុជាបន្ទាប់ពីថៃ និងវៀតណាម ។ ក្រសួងទេសចរណ៍បានឲ្យដឹងថា នៅត្រីមាសដំបូងឆ្នាំ២០២៥ កម្ពុជាទទួលភ្ញៀវទេសចរអន្តរជាតិចំនួន១,៨៣លាននាក់ ភ្ញៀវទេសចរពីចិនមានជាង២៨ម៉ឺននាក់ជាមួយនឹងកំណើនប្រមាណជា៥០,៦ភាគរយ ។ តាមតួលេខនេះ វានឹងមិនពិបាកទេ ក្នុងការទាក់ទាញទេសចរចិន១លាននាក់នៅឆ្នាំ២០២៥នេះ ។
ដោយឡែក ក្នុងឆ្នាំ២០២៤ កម្ពុជាទទួលបានភ្ញៀវទេសចរសរុបជាង ៦,៦៦លាននាក់ ក្នុងនោះមាន ភ្ញៀវចិនមានជាង ៨៤ ម៉ឺននាក់ កើន៥៥ភាគរយ បើធៀបនឹងឆ្នាំ២០២៣ ៕
ចែករំលែកព័តមាននេះ