ប្រទេសវៀតណាម ៖ ទីក្រុងហាណូយ ប្រទេសវៀតណាម និងទីក្រុងបាងកក ប្រទេសថៃ ដែលជាគោលដៅទេសចរណ៍ពេញនិយមបំផុតនៅអាស៊ីអាគ្នេយ៍ បានជាប់ឈ្មោះក្នុងចំណោមទីក្រុងមានការឆបោកខ្ពស់បំផុត។ នេះបើតាមការសិក្សាថ្មីមួយ ដោយវិទ្យាស្ថាន…
ប្រទេសវៀតណាម ៖ ទីក្រុងហាណូយ ប្រទេសវៀតណាម និងទីក្រុងបាងកក ប្រទេសថៃ ដែលជាគោលដៅទេសចរណ៍ពេញនិយមបំផុតនៅអាស៊ីអាគ្នេយ៍ បានជាប់ឈ្មោះក្នុងចំណោមទីក្រុងមានការឆបោកខ្ពស់បំផុត។ នេះបើតាមការសិក្សាថ្មីមួយ ដោយវិទ្យាស្ថាន Mastercard Economics និងចេញផ្សាយដោយសារព័ត៌មានអាមេរិក CNBC កាលពីពេលថ្មីៗនេះ។
របាយការណ៍ពី Mastercard បានបង្ហាញថា នៅទីក្រុងបាងកក សេវាកម្មតាក់ស៊ី និងជួលរថយន្តមានចំនួន៤៨% នៃករណីឆបោក ដែលធ្វើឱ្យរាជធានីបេះដូងប្រទេសថៃមួយនេះ ក្លាយជាប្រភពនៃការឆបោកទូទៅកម្រិតខ្ពស់បំផុតផ្តោតលើភ្ញៀវទេសចរ ។
ស្របពេលភ្ញៀវបរទេសជាច្រើនបានរាយការណ៍ថា ពួកគេក៏បានចាញ់បោកក្រោមស្នាដៃអ្នកផ្តល់សេវាកម្មម្ហូបអាហារផងដែរ ។ មិនតែប៉ុណ្ណោះ របាយការណ៍ក៏បានលើកឡើងជាពិសេសថា ទីក្រុងភូកេត ប្រទេសថៃ និងទីក្រុងអង់តាលីយ៉ា ប្រទេសតួកគី ក៏បានឃើញសកម្មភាពឆបោកបន្ថែមទៀតទាក់ទងនឹងការកក់សណ្ឋាគាររបស់ភ្ញៀវទេសចរ ។
របាយការណ៍កត់សម្គាល់ថា អ្នកធ្វើដំណើរទៅកាន់ទីក្រុងខានឃុន ប្រទេសម៉ិកស៊ិក, ទីក្រុងហាណូយ ប្រទេសវៀតណាម, ទីក្រុងដាកា ប្រទេសបង់ក្លាដែស និងទីក្រុងបាងកក ប្រទេសថៃ បានរាយការណ៍ពីកម្រិតនៃការឆបោកខ្ពស់ជាងបើធៀបនឹងទីក្រុងផ្សេងៗទៀត ខណៈទីក្រុងមានការឆបោកទាបបំផុតរួមមាន សាន់ហ្វ្រាន់ស៊ីស្កូ សហរដ្ឋអាមេរិក,ទីក្រុងឌូបលីន សាធារណរដ្ឋអៀរឡង់, ទីក្រុងសេអ៊ូល ប្រទេសកូរ៉េ, ទីក្រុងប៊ូដាប៉េស ប្រទេសហុងគ្រី និងទីក្រុងអេឌីនបឺក ប្រទេសស្កុតឡែន ។
ទោះយ៉ាងណាក៏ដោយ កម្រិតនៃការឆបោកដែលត្រូវបានរាយការណ៍ក្នុងទីក្រុងទាំងអស់ខុសៗពីគ្នាផងដែរ ។ ជាឧទាហរណ៍ ការឆបោកពាក់ព័ន្ធសេវាតាក់ស៊ី និងការជួលរថយន្តមានត្រឹម ២% ដែលបានរាយការណ៍ក្នុងទីក្រុងហុងកុង និងទីក្រុងបាសេឡូណា ប្រទេសអេស្ប៉ាញ ស្របពេលដែលតួលេខបានកើនឡើងរហូតដល់ ៦៦% នៅទីក្រុងហ្សាកាតា ប្រទេសឥណ្ឌូណេស៊ី។
យោងតាម Mastercard បានបង្ហាញថា វិស័យទេសចរណ៍ ជាពិសេស ផ្តោតលើការធ្វើដំណើរនៅតែងាយរងគ្រោះខ្ពស់ដោយការឆបោក ជាមួយនឹងករណីឆបោកកើនឡើង១៨% អំឡុងរដូវក្តៅ និង ២៨% អំឡុងរដូវរដូវរងា កាលពីឆ្នាំ២០២៤។
របាយការណ៍ពី Euromonitor International ដែលក្រុមហ៊ុនស្រាវជ្រាវទីផ្សារ ដែលមានមូលដ្ឋាននៅទីក្រុងឡុងដ៍ ចក្រភពអង់គ្លេស បានដាក់ចំណាត់ថ្នាក់ទីក្រុងបាងកកឈរលើកំពូលតារាងទីក្រុងមានភ្ញៀវទេសចរបរទេសច្រើនជាងគេបំផុតរបស់ពិភពលោកកាលពីឆ្នាំ២០២៤ ជាមួយនឹងកំណត់ត្រាចំនួន ៣២,៤លាននាក់។ ចំណែកឯទីក្រុងហាណូយទទួលបានភ្ញៀវទេសចរបរទេសចំនួនត្រឹម ៦,៣៥លាននាក់ប៉ុណ្ណោះ៕ ដកស្រង់ ៖ VnExpress និង Nation Thailand
ចែករំលែកព័តមាននេះ