រាជធានីភ្នំពេញ ៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកកិច្ចប្រជុំគណៈកម្មាធិការគ្រប់គ្រងគ្រោះមហន្តរាយ…
រាជធានីភ្នំពេញ ៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកកិច្ចប្រជុំគណៈកម្មាធិការគ្រប់គ្រងគ្រោះមហន្តរាយ អាស៊ាន លើកទី៤៦ និងកិច្ចប្រជុំពាក់ព័ន្ធ ដែលពិធីនេះប្រព្រឹត្តទៅនៅសណ្ឋាគារសុខាសៀមរាប ខេត្តសៀមរាបព្រឹកថ្ងៃទី២០ ខែឧសភា ឆ្នាំ២០២៥ ។
ពិធីបើកកិច្ចប្រជុំគណៈកម្មាធិការគ្រប់គ្រងគ្រោះមហន្តរាយ អាស៊ាន លើកទី៤៦ និងកិច្ចប្រជុំពាក់ព័ន្ធ មានការអញ្ជើញចូលរួមពីឯកឧត្តម អគ្គលេខាធិការរងអាស៊ាន, នាយកប្រតិបត្តិ មជ្ឈមណ្ឌលសម្របសម្រួលជំនួយមនុស្សធម៌ (AHA Center), ប្រធានប្រតិភូបណ្តាប្រទេសរដ្ឋជាសមាជិកអាស៊ាន, ថ្នាក់ដឹកនាំ (គ.ជ.គ.ម), តំណាងក្រសួង-ស្ថាប័ន, អភិបាលរង តំណាងអភិបាលខេត្ត, ស្នងការនគរបាលខេត្ត និងមេបញ្ជាការកងរាជអាវុធហត្ថខេត្ត ។
កិច្ចប្រជុំនេះរៀបចំ ដោយកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) សហការជាមួយមជ្ឈមណ្ឌល-អាហា ចាប់ពីថ្ងៃទី២០ដល់២៣ ខែឧសភា ឆ្នាំ២០២៥ មានប្រធានបទ នៅឆ្នាំនេះ គឺបញ្ជាក់ឡើងវិញ នូវការប្តេជ្ញាចិត្តដ៏យូរអង្វែងរបស់អាស៊ាន ក្នុងការជំរុញ បរិយាប័ន្ន ភាពជាដៃគូ និងលើកកម្ពស់កិច្ចសហប្រតិបត្តិការអន្តរជាតិ។ ដូចដែល យើងនឹងប្រារព្ធខួបលើកទី២០ឆ្នាំ នៃអាត់ប៊ែរ (AADMER) យើងឆ្លុះបញ្ចាំងពីសមិទ្ធិផលរបស់យើង ដោះស្រាយបញ្ហាប្រឈម ដែលកំពុងកើតមាន និងកំណត់មាគ៌ាសម្រាប់អនាគត ។
ការអនុម័តលើ សេចក្តីថ្លែងការណ៍រដ្ឋមន្ត្រីអាស៊ាន ស្តីពី២០ឆ្នាំ នៃអាត់ប៊ែរ (AADMER): ចក្ខុវិស័យរបស់អាស៊ាន សម្រាប់ភាពជាអ្នកដឹកនាំសកលក្នុងភាពធន់នឹងគ្រោះមហន្តរាយ នឹងក្លាយជាព្រឹត្តិការណ៍សំខាន់មួយ។ យើងក៏កំពុងរៀបចំកសាងកម្មវិធីការងារអាត់ប៊ែរ ឆ្នាំ២០២៦-២០៣០ ស្របតាមផែនការយុទ្ធសាស្ត្រ សហគមន៍សង្គម-វប្បធម៌អាស៊ាន និងចក្ខុវិស័យសហគមន៍អាស៊ាន ឆ្នាំ២០៤៥ ដើម្បីនាំយើងឆ្ពោះ ទៅកាន់អាស៊ាន ប្រកបដោយភាពធន់ជាងមុន នវានុវត្តន៍ និងប្រជាជន ជាចំណុចស្នូល ។
ថ្លែងបើកឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រីក្នុងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធាន គណៈកម្មាធិការជាតិគ្រប់គ្រងគ្រោះមហន្តរាយ បានស្វាគមន៍ យ៉ាងកក់ក្តៅចំពោះ ឯកឧត្តម លោកជំទាវ អស់លោក លោកស្រី ដែលមានវត្តមាននៅក្នុងកិច្ចប្រជុំ គណៈកម្មាធិការគ្រប់គ្រងគ្រោះមហន្តរាយអាស៊ាន លើកទី៤៦។ ជាកិត្តិយសដ៏ធំធេងណាស់ សម្រាប់ ព្រះរាជាណាចក្រកម្ពុជា ក្នុងនាមជាប្រធាន នៃគណៈកម្មាធិការគ្រប់គ្រងគ្រោះមហន្តរាយអាស៊ាន នៅឆ្នាំនេះ ដែលទទួលរៀបចំកិច្ចជុំដ៏សំខាន់នេះ ។
ក្រោមប្រធានបទ “២០ឆ្នាំ នៃអាត់ម៉ែល ចក្ខុវិស័យរបស់អាស៊ាន សម្រាប់ភាពជាអ្នកដឹកនាំសកល ក្នុងភាពធន់នឹងគ្រោះមហន្តរាយ” យើងឆ្លុះបញ្ចាំងអំពីវឌ្ឍនភាពរួម និងបញ្ជាក់ឡើងវិញ នូវការប្តេជ្ញាចិត្តរបស់យើងចំពោះតំបន់ ប្រកបដោយភាពរឹងមាំ និងធន់ជាងមុន។ ជាពិសេស មកចូលរួមកិច្ចប្រជុំ ACDM ជាលើកដំបូងក្នុង ឆ្នាំ២០២៥។ ការបន្តការចូលរួម និងការគាំទ្ររបស់ សមាជិកអាស៊ានមានសារៈសំខាន់ នៅពេលយើងធ្វើការរួមគ្នា ដើម្បីលើកកម្ពស់កិច្ចសហប្រតិបត្តិការនៅក្នុងតំបន់ ក្នុងការគ្រប់គ្រងគ្រោះមហន្តរាយ ។
ឯកឧត្តមទេសរដ្ឋមន្ត្រី ឆ្លៀតក្នុងឱកាសនោះតាំងនាមអោយរាជរដ្ឋាភិបាល និងប្រជាជនកម្ពុជា សូមចូលរួមរំលែកទុក្ខដ៏ក្រៀមក្រំបំផុត និងការអាណិតអាសូរយ៉ាងជ្រាលជ្រៅបំផុត ចំពោះរដ្ឋាភិបាល និងប្រជាជន មីយ៉ាន់ម៉ា និងថៃ បន្ទាប់ពីគ្រោះគ្រោះរញ្ជួយដីកម្រិត ៧.៧ រិចទ័រ កាលពី ថ្ងៃទី២៨ ខែមីនា ឆ្នាំ២០២៥។ ការចូលរួមរំលែកទុក្ខ និងការយកចិត្តទុកដាក់របស់យើង គឺស្ថិតនៅជាមួយគ្រួសារ និងសហគមន៍ ដែលរងផលប៉ះពាល់ ។ សោកនាដកម្មនេះ រួមទាំងការ រអិលបាក់ដីនាពេលថ្មីៗនេះ នៅក្នុងខេត្តចាវ៉ា ភាគកណ្តាល នៃប្រទេសឥណ្ឌូនេស៊ី គឺជាការរំលឹក យ៉ាងច្បាស់អំពីការគំរាមកំហែងនៅបន្ត ដែលបង្កឡើងដោយគ្រោះមហន្តរាយធម្មជាតិនៅក្នុងតំបន់ ។
ទេសរដ្ឋមន្ត្រីបានកោតសរសើរ ចំពោះការឆ្លើយតបយ៉ាងរហ័ស និងកិច្ចសហការដ៏រឹងមាំ ក្នុងចំណោមប្រទេសជាសមាជិកអាស៊ាន លេខាធិការដ្ឋានអាស៊ាន និងមជ្ឈមណ្ឌល-អាហា ក្នុងការ ផ្តល់ជំនួយសង្គ្រោះគ្រោះមហន្តរាយ ក្រោមប្រព័ន្ធភស្តុភារសង្គ្រោះគ្រោះមហន្តរាយសម្រាប់អាស៊ាន (DELSA) ដល់អ្នកដែលត្រូវការជំនួយ ។
គណៈកម្មាធិការគ្រប់គ្រងគ្រោះមហន្តរាយអាស៊ាន (ACDM) ជាវេទិកាថ្នាក់តំបន់ដ៏សំខាន់សម្រាប់ ជំរុញការសម្របសម្រួល និងកិច្ចសហប្រតិបត្តិការ ក្នុងការគ្រប់គ្រងគ្រោះមហន្តរាយ និងការឆ្លើយ តបគ្រោះអាសន្ន ដែលមានកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និងការឆ្លើយ តបសង្គ្រោះបន្ទាន់ (អាត់ម៉ែរ) ជាមគ្គុទ្ទេសក៍។ គណៈកម្មាធិការគ្រប់គ្រងគ្រោះមហន្តរាយអាស៊ាន មានកាតព្វកិច្ចពង្រឹងកិច្ចសហប្រតិបត្តិការ នៅគ្រប់ដំណាក់កាល នៃការគ្រប់គ្រងគ្រោះមហន្តរាយ ពោលគឺ ការត្រៀមបង្ការ ការកាត់បន្ថយ ការត្រៀមរៀបចំ ការឆ្លើយតប និងការស្តារឡើងវិញ ក្នុងគោលបំណងកាត់បន្ថយផលប៉ះពាល់អវិជ្ជមាន នៃគ្រោះមហន្តរាយ មកលើសហគមន៍ និង សេដ្ឋកិច្ចរបស់យើង ៕
ចែករំលែកព័តមាននេះ