រាជធានីភ្នំពេញ ៖ រថយន្តម៉ាកTANK ១គ្រឿងបើកបរដោយបុរសជនជាតិចិនម្នាក់ ខណៈកំពុងកំពុងធ្វើដំណើរក្នុងល្បឿនលឿន ក៏ស្រាប់តែបែកកង់ក្រោយ១គ្រាប់ខាងស្ដាំ រួចក៏រេចង្កូតជ្រុលទៅកៀរម៉ូតូ១គ្រឿង ដែលនិស្សិតស្រីម្នាក់ក្នុងទិសដៅស្របគ្នាបណ្ដាលឲ្យដួលបោកផ្ទប់ថ្នល់ពេញទំហឹងរងរបួសធ្ងន់សន្លប់ស្ដូកស្ដឹង ។ ឧប្បត្តិហេតុនោះបានកើតឡើងនៅវេលាម៉ោង១២និង១០នាទីថ្ងៃត្រង់ថ្ងៃទី២០…
រាជធានីភ្នំពេញ ៖ រថយន្តម៉ាកTANK ១គ្រឿងបើកបរដោយបុរសជនជាតិចិនម្នាក់ ខណៈកំពុងកំពុងធ្វើដំណើរក្នុងល្បឿនលឿន ក៏ស្រាប់តែបែកកង់ក្រោយ១គ្រាប់ខាងស្ដាំ រួចក៏រេចង្កូតជ្រុលទៅកៀរម៉ូតូ១គ្រឿង ដែលនិស្សិតស្រីម្នាក់ក្នុងទិសដៅស្របគ្នាបណ្ដាលឲ្យដួលបោកផ្ទប់ថ្នល់ពេញទំហឹងរងរបួសធ្ងន់សន្លប់ស្ដូកស្ដឹង ។
ឧប្បត្តិហេតុនោះបានកើតឡើងនៅវេលាម៉ោង១២និង១០នាទីថ្ងៃត្រង់ថ្ងៃទី២០ ខែឧសភា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចខាងត្បូងស្ពានអាកាសចោមចៅ ស្ថិតនៅក្នុងភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នារីរងគ្រោះរូបនោះឈ្មោះ វន កញ្ញារ៉ុង អាយុ២១ឆ្នាំ ជានិស្សិតឆ្នាំទី១ មានទីលំនៅជិតបន្ទាយកងទ័ពពិសេសឆ័ត្រយោងលេខ៩១១ សង្កាត់កំបូល ខណ្ឌកំបូល រាជធានីភ្នំពេញ ។ នារីខាងលើជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១១ ពណ៍ខ្មៅ ពាក់ស្លាកលេខភ្នំពេញ1AW-3528 នាងបានរងរបួសប៉ោងមុខប៉ោងមាត់ ហើយសន្លប់ស្ដូកស្ដឹង ។ ចំណែករថយន្តបង្កម៉ាកTANK ពណ៍ប្រផេះគ្មានស្លាកលេខ បើកបរដោយបុរសជនជាតិចិនម្នាក់ ត្រូវនគរបាលឃាត់ខ្លួននាំទៅកាន់ប៉ុស្តិ៍ ។
ប្រជាពលរដ្ឋបាននិយាយថា នៅមុនពេលកើតហេតុ រថយន្ត១គ្រឿងនោះបានបើកបរធ្វើដំណើរក្នុងទិសដៅពីជើងទៅត្បូងក្នុងល្បឿនលឿន លុះពេលទៅដល់ត្រង់ចំណុចកើតហេតុ ស្រាប់តែផ្ទុះកង់ក្រោយខាងស្ដាំ១គ្រាប់ ហើយក៏រេចង្កូតជ្រុលទៅកៀរម៉ូតូនារីជនរងគ្រោះដែលកំពុងធ្វើដំណើរស្របគ្នាទាំងកំរោល ។ បណ្ដាលឲ្យដួលហើយនារីរងគ្រោះបានដួលផ្កាប់មុខបោកផ្ទប់ថ្នល់ពេញទំហឹងរបួសធ្ងន់សន្លប់ស្ដូកស្ដឹង តែម្ដង បន្ទាប់មករថយន្តខាងលើមិនបានឈប់ទទួលខុសត្រូវនោះឡើយ និងបានបន្ថែមល្បឿនកាន់តែលឿនទាំងបែកកង់រត់គេចូលទៅក្នុងដីឡូត៌មួយកន្លែងនៅតាមផ្លូវជាតិលេខ៣នោះដែរ ។
ប្រភពដដែលបានប្រាប់ឲ្យដឹងបន្ថែមទៀតថា ក្រោយពេលកើតហេតុក្រុមសង្គ្រោះអង្គភាព៧១១ បានដឹកយកនិស្សិតស្រីរងគ្រោះទៅកាន់មន្ទីរពេទ្យព្រះកុសុមៈដើម្បីសង្គ្រោះបន្ទាន់ ។ ចំណែកជនបង្កគ្រាន់តែបើករថយន្តចូលទៅដល់ក្នុងដីឡូត៌ខាងលើភ្លាម ក៏ត្រូវបានម្ចាស់ដីឡូត៌នោះដេញឲ្យចេញក្រៅវិញភ្លាមៗដែរ មិនអនុញ្ញាតឲ្យចូលទៅសម្ងំលាក់ខ្លួននៅទីនោះឡើយ ។ បន្ទាប់មកនគរបាលប៉ុស្តិ៍ចោមចៅទី៣ក៏បានទៅដល់ហើយធ្វើការឃាត់ខ្លួនបុរសជនជាតិចិននោះ រួចនាំយកទៅកាន់ប៉ុស្តិ៍ ធ្វើការសាកសួរនិងចាត់ការតាមច្បាប់ ៕
ចែករំលែកព័តមាននេះ