សង្គ្រាមអ៊ុយក្រែន ៖ ប្រធានាធិបតីរុស្ស៊ីលោកវ្ល៉ាឌីមៀរពូទីនកាលពីថ្ងៃទី១៩ឧសភា បានជួបនិយាយគ្នាតាមទូរស័ព្ទអស់ពេលជាង២ម៉ោង ជាមួយសមភាគីអាមេរិកលោកដូណាល់ត្រាំពីរឿងជម្លោះនៅអ៊ុយ ក្រែន។ លោកពូទីនក្នុងសេចក្ដីថ្លែងការណ៍ខ្លីមួយទៅកាន់សារព័ត៌មានគូសបញ្ជាក់ថា ការសន្ទនាគ្នានោះប្រព្រឹត្តទៅដោយស្ថាបនានិងដោយត្រង់ៗបំផុត។ ជារួមខ្ញុំគិតថាការសន្ទនាគ្នាពិតជាមានប្រយោជន៍។
ការជួបគ្នាតាមទូរស័ព្ទរវាងប្រមុខវិមានក្រឹមឡាំងនិងប្រមុខសេតវិមាន ធ្វើឡើងបន្ទាប់ពីការជួបគ្នានៅក្រុងរ៉ូមរវាងប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី និងអនុប្រធានាធិបតីអាមេរិកលោកឌីជីវ៉ាន។ មេដឹកនាំទាំង២បានលើកពីការរៀបចំការសន្ទនាគ្នាតាមទូរស័ព្ទរវាងលោកត្រាំនិងលោកពូទីន និងលើកឡើងជាថ្មីពីបទឈប់បាញ់គ្នានៅអ៊ុយក្រែន។ ប្រធានាធិបតីអ៊ុយក្រែនក៏ជួបពិភាក្សាផងដែរតាមទូរស័ព្ទជាមួយលោកត្រាំរយៈពេល ១០ឬ១៥នាទីមុនពេលជួបគ្នាតាមទូរស័ព្ទជាមួយលោកពូទីន។
ខាងសេតវិមានថាទិសដៅនៃការជួបគ្នាតាមទូរស័ព្តនោះគឹបញ្ចប់ការបង្ហូរឈាម។ តាមអ្នកនាំពាក្យសេតវិមានលោកស្រីការ៉ូលីនលីវីតថា លោកត្រាំរិះគន់ចំពោះឥរិយាបថរបស់ក្រុងមូស្គូនិងរបស់ក្រុងគៀវ ដោយចង់ឃើញជម្លោះនោះត្រូវបញ្ចប់។
ក្រោយការជួបគ្នាជាមួយលោកពូទីនលោកត្រាំបានធ្វើអត្ថាធិប្បាយថា ខ្ញុំគិតថាការពិភាក្សាគ្នានេះពិតជាប្រព្រឹត្តទៅដោយល្អបំផុត។ តាមបណ្ដាញសង្គមTRUTH SOCIAL លោកសរសេរថា រស្សុីនិងអ៊ុយក្រែននឹងចាប់ផ្ដើមចរចាគ្នាក្នុងពេលដ៏ឆាប់សំដៅឲ្យសម្រេចបានបទឈប់បាញ់គ្នា និងការបញ្ចប់សង្គ្រាមទៅតាមលក្ខខណ្ឌចរចារវាងភាគីទាំង២។ ក្នុងសាររបស់លោក ប្រមុខសេតវិមានក៏លើកដែរពីបំណងរបស់សម្ដេចប៉ាបថី្ម រៀបចំការចរចា។ លោកក៏លើកដែរពីការជូនដំណឹងនេះដល់មេដឹកនាអឺរ៉ុបជាច្រើន មានប្រធានាធិបតីបារាំង ប្រធានគណៈកម្មាធិការអឺរ៉ុប និងអធិការបតីអាល្លឺម៉ង់ពីការចរចានាពេលខាងមុខរវាងរុស្ស៊ី និងអ៊ុយក្រែន។
ក្រោយកិច្ចសន្ទនាគ្នាតាមទូរស័ព្ទនោះជាមួយលោកត្រាំលោកពូទីនថ្លែងថា រុស្ស៊ីនឹងស្នើព្រមទាំងត្រៀមធ្វើការជាមួយភាគីអ៊ុយក្រែន លើអនុស្សរណៈមួយទាក់ទិននឹងលទ្ធភាពនៃអនាគតសន្ធិសញ្ញាសន្តិភាពមួយរវាងប្រទេសទាំង២។ លោកពូទីនសម្ដែងពីសុទិដ្ឋិនិយមចំពោះការចរចារវាងគណៈប្រតិភូលោកនិងគណៈប្រតិភូអ៊ុយក្រែន កាលពីថ្ងៃទី១៦ឧសភានៅក្រុងអ៊ីស្តង់ប៊ុល។ ក្នុងបទសម្ភាសន៍មួយនាពេលមុននេះជាមួយទូរទស្សន៍រដ្ឋ លោកពូទីនថ្លែងថា ទិសដៅរបស់ក្រុងមូស្គូគឺលុបបំបាត់មូលហេតុដែលនាំឲ្យកើតមានវិបត្តិនេះ បង្កើតលក្ខខណ្ឌនានាសម្រាប់សនិ្តភាពដ៏ស្ថិតស្ថេរមួយនិងធានាសនិ្តសុខរបស់សហព័ន្ធរុស្ស៊ី។
អំពីអនុស្សរណៈលើកឡើងដោយលោកពូទីនប្រធានាធិបតីអ៊ុយក្រែនថា មកដល់ដំណាក់កាលនេះលោកនៅមិនទាន់ដឹងពីភាពលម្អិតរបស់វានៅឡើយ។ ពេលនិយាយគ្នាតាមទូរស័ព្ទលោកត្រាំក៏បានលើកពីបំណងរបស់រុស្ស៊ី ធ្វើពាណិជ្ជកម្មទ្រង់ទ្រាយធំជាមួយសហរដ្ឋអាមេរិក ក្រោយបញ្ចប់់សង្គ្រាម ហើយលោកយល់ស្របចំំពោះគំនិតនេះ។
លោកថា រុស្ស៊ីមានលទ្ធភាពបង្កើតការងារ និងទទួលផលប្រយោជន៍យ៉ាងច្រើន ហើយអ៊ុយក្រែនវិញអាចជាអ្នកទទួលបានផលប្រយោជន៍ច្រើនដែរ ក្នុងការផ្លាស់ប្ដូរពាណិជ្ជកម្មក្នុងក្របខណ្ឌនៃដំណើរការកសាងប្រទេសឡើងវិញ។ ប្រមុខវិមានក្រឹមឡាំងនិងប្រមុខសេតវិមានក្នុងការពិភាក្សាគ្នា ក៏លើកពីបំណងធ្វើឲ្យមានប្រក្រតីភាពឡើងវិញនៃទំនាក់ទំនងរវាងប្រទេសទាំង២ផងដែរ៕
ចែករំលែកព័តមាននេះ