រាជធានីភ្នំពេញ ៖ អ្នកនាំពាក្យក្រសួងព័ត៌មាន បានឲ្យដឹងថា ក្នុងត្រីមាសទី១ (៣ខែ) នៃឆ្នាំ២០២៥ គណៈកម្មការប្រឆាំងនឹងព័ត៌មានក្លែងក្លាយរបស់ក្រសួងព័ត៌មាន បានរកឃើញព័ត៌មានក្លែងក្លាយចំនួន ៨៨៤ករណី…
រាជធានីភ្នំពេញ ៖ អ្នកនាំពាក្យក្រសួងព័ត៌មាន បានឲ្យដឹងថា ក្នុងត្រីមាសទី១ (៣ខែ) នៃឆ្នាំ២០២៥ គណៈកម្មការប្រឆាំងនឹងព័ត៌មានក្លែងក្លាយរបស់ក្រសួងព័ត៌មាន បានរកឃើញព័ត៌មានក្លែងក្លាយចំនួន ៨៨៤ករណី ។ ដោយសារតែការរកឃើញ នូវករណីព័ត៌មានក្លែងក្លាយនេះ
លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យរូបនេះ បានអំពាវនាវជាថ្មីឲ្យសាធារណជន បន្តយកចិត្តទុកដាក់នៅក្នុងការប្រយុទ្ធប្រឆាំងនឹងព័ត៌មានក្លែងក្លាយ ។
បើតាមខ្លឹមសាររបស់អ្នកនាំពាក្យក្រសួងព័ត៌មាន នាថ្ងៃ១៩ ឧសភា ២០២៥នេះ បានលើកឡើងថា ក្នុងស្ថានភាព ដែលបានរកឃើញព័ត៌មានក្លែងក្លាយជិត៩០០ករណីនេះ អ្នកនាំពាក្យផ្ញើសារដាស់តឿនទៅដល់ យុវជន ប្រជាពលរដ្ឋ អ្នកប្រើប្រាស់ និងអ្នកផលិតមាតិកាបណ្តាញសង្គមនានា គួរតែយកចិត្តទុកដាក់បន្ថែមទៀត ដើម្បីបង្កើនការប្រុងប្រយ័ត្នខ្ពស់ចំពោះឥទ្ធិពលអវិជ្ជមាន ដែលបង្កឡើងដោយការបង្កើត ការចែកចាយព័ត៌មាននៅលើបណ្តាញសង្គម និងឥទ្ធិពលអាក្រក់ ដែលកើតចេញពីការប្រើប្រាស់បណ្តាញសង្គម គ្មានការទទួលខុសត្រូវការផ្សព្វផ្សាយព័ត៌មានដែលគ្មានប្រភពច្បាស់លាស់ គ្មានវិជ្ជាជីវៈ និងគ្មានការផ្ទៀងផ្ទាត់ត្រឹមត្រូវ ។
លោកបានបញ្ជាក់ថា ៖ “ខ្ញុំសូមអំពាវនាវដល់ប្រជាពលរដ្ឋ យុវជនទាំងអស់ សូមធ្វើជាពលរដ្ឋឌីជីថលល្អនៅថ្ងៃនេះ និងនៅថ្ងៃមុខ កុំបង្កើត កុំចែកចាយ ព័ត៌មានក្លែងក្លាយ ព័ត៌មានបំពុលសង្គម រាប់ទាំងព័ត៌មានក្លែងក្លាយដែលបង្កើតឡើងដោយបច្ចេកវិទ្យាសិប្បនិម្មិត (AI )” ។
លោកបានបន្តថា ត្រូវផ្ទៀងផ្ទាត់រាល់ព័ត៌មាន ដែលទទួលបាន ជាពិសេសព័ត៌មានពីបណ្តាញសង្គមនានា ដើម្បីទាំងអស់គ្នាចូលរួមទប់ស្កាត់ ឈានទៅបញ្ចប់នូវព័ត៌មានក្លែងក្លាយ ដើម្បីការពារខ្លួន គ្រួសារ និងសង្គមជាតិ ។
អ្នកនាំពាក្យបន្ថែមថា គ្រប់ប្រភេទ នៃព័ត៌មានក្លែងក្លាយ គឺសុទ្ធតែមានឥទ្ធិពលអវិជ្ជមាន មកលើសន្តិសុខសណ្តាប់ធ្នាប់ និងនយោបាយ ពោលគឺព័ត៌មានក្លែងក្លាយ អាចបង្កអស្ថិរភាព បង្កើតឲ្យមានអំពើហិង្សា ដែលបណ្តាលឲ្យកើតមានអរិយភាពក្នុងសង្គម ប្រជាពលរដ្ឋបាត់ទំនុកចិត្តមកលើថ្នាក់ដឹកនាំ ហើយអាចឲ្យសង្គមបែកបាក់សាមគ្គីភាពព្រមទាំង បង្កព្យសនកម្ម និងមហន្តរាយដែលមិនអាចនឹកស្មានដល់ ។
គួររំលឹកថា កាលពីឆ្នាំ២០២៤ គណៈកម្មការប្រឆាំងនឹងព័ត៌មានក្លែងក្លាយរបស់ក្រសួងបានកត់ត្រា ព័ត៌មានក្លែងក្លាយសរុប ចំនួន ៣,៦៥១ករណី ។ ដើម្បីប្រយុទ្ធប្រឆាំងនឹងព័ត៌មានក្លែងក្លាយទាំងនេះ កាលពីថ្ងៃ១ មេសា ក្រសួងព័ត៌មាន បានបើកយុទ្ធនាការប្រឆាំងព័ត៌មានក្លែងក្លាយ ក្រោមប្រធានបទ «និយាយថាទេ ចំពោះព័ត៌មានក្លែងក្លាយ» ក្នុងគោលបំណងដើម្បីកាត់បន្ថយព័ត៌មានក្លែងក្លាយមកនូវកម្រិតអប្បបរមា និងឈានទៅលុបបំបាត់នូវព័ត៌មានក្លែងក្លាយពីលំហក្នុងសង្គមកម្ពុជា សំដៅធានាឲ្យបាននូវសន្តិសុខព័ត៌មាននៅកម្ពុជា ៕
ចែករំលែកព័តមាននេះ