ប្រទេសចិន ៖ ទីក្រុងសិនជិន (Shenzhen) នៃខេត្តក្វាងតុង (Guangdong) ដែលជាមជ្ឈមណ្ឌលបច្ចេកវិទ្យាដ៏រស់រវើករបស់ប្រទេសចិន កំពុងមានការភ្ញាក់ផ្អើលយ៉ាងខ្លាំងជាមួយវត្តមានរបស់ភ្ញៀវបរទេសនៅក្នុងឆ្នាំនេះ ដោយសារតែគោលនយោបាយគ្មានទិដ្ឋាការរបស់រដ្ឋាភិបាលចិនបានបើកទ្វារដល់ទេសចរណ៍ពិភពលោក។ នេះបើយោងតាមប្រភពពីសារព័ត៌មាន…
ប្រទេសចិន ៖ ទីក្រុងសិនជិន (Shenzhen) នៃខេត្តក្វាងតុង (Guangdong) ដែលជាមជ្ឈមណ្ឌលបច្ចេកវិទ្យាដ៏រស់រវើករបស់ប្រទេសចិន កំពុងមានការភ្ញាក់ផ្អើលយ៉ាងខ្លាំងជាមួយវត្តមានរបស់ភ្ញៀវបរទេសនៅក្នុងឆ្នាំនេះ ដោយសារតែគោលនយោបាយគ្មានទិដ្ឋាការរបស់រដ្ឋាភិបាលចិនបានបើកទ្វារដល់ទេសចរណ៍ពិភពលោក។ នេះបើយោងតាមប្រភពពីសារព័ត៌មាន VnExpress ចេញផ្សាយកាលពីថ្ងៃទី១៧ ខែឧសភា ឆ្នាំ២០២៥។
យោងតាមប្រភពពីទូរទស្សន៍រដ្ឋចិន CCTV បានរាយការណ៍ថា ទីក្រុងសិនជិនបានក្លាយជាដែកឆក់ដ៏សំខាន់ស្រូបទាញភ្ញៀវទេសចរអន្តរជាតិ ជាពិសេសមកពីប្រទេសម៉ាឡេស៊ី កូរ៉េខាងត្បូង ជប៉ុន វៀតណាម និងសិង្ហបុរី។ អាកាសយានដ្ឋានអន្តរជាតិ Shenzhen Bao’an ក៏បានរាយការណ៍ថាច្រកចេញចូលដោយគ្មានទិដ្ឋាការបានស្វាគមន៍ភ្ញៀវជាង ១៥២,០០០នាក់ គិតមកទល់ពេលនេះក្នុងឆ្នាំ២០២៥ ពោលកើនឡើងដល់ ១៦០.៣% ធៀបនឹងរយៈពេលដូចគ្នាកាលពីឆ្នាំមុន។ ដូច្នេះវត្តមានភ្ញៀវទេសចរអន្តរជាតិសរុបបានឈានដល់៥៣១,០០០នាក់ ពោលកើនឡើង ៥៤,៦% ពីមួយឆ្នាំទៅមួយឆ្នាំ។ ដូចដែលត្រូវបានរាយការណ៍ដោយកាសែត South China Morning Post។
ដើម្បីបំពេញតម្រូវការកើនឡើងនេះ អាកាសយានដ្ឋានទីក្រុងសិនជិន គ្រោងនឹងណែនាំជើងហោះហើរត្រង់ទៅកាន់ទីក្រុងឌូបៃ ប្រទេសអារ៉ាប់រួម នៅខែកក្កដាខាងមុខនេះ។ លើសពីនេះទៀត ផ្លូវហោះហើរថ្មីដែលតភ្ជាប់ទីក្រុងសិនជិនទៅកាន់គោលដៅពេញនិយមដូចជា ទីក្រុងអូសាកា ប្រទេសសិង្ហបុរី ទីក្រុងបាងកក និងទីក្រុងហាណូយ គ្រោងនឹងបើកដំណើរនៅចុងឆ្នាំនេះ។
ភាពទាក់ទាញជាពិសេសរបស់ទីក្រុងសិនជិន គឺលើសពីគោលនយោបាយលើកលែងទិដ្ឋាការទៅទៀត ភាពល្បីល្បាញដោយសារតែតួនាទីរបស់ទីក្រុងនេះ គឺជាមជ្ឈមណ្ឌលពាណិជ្ជកម្ម និងផលិតកម្មសកល នៅជិតទីក្រុងហុងកុង និងមានតម្លៃរស់នៅទាប។
លើសពីនេះទៀត ទីក្រុងសិនជិនផ្តល់នូវហេតុផលគួរឱ្យទាក់ទាញ សម្រាប់ភ្ញៀវទេសចរអន្តរជាតិ និងសហគ្រិនផងដែរ។ បន្ថែមពីលើការទាក់ទាញជាសាកលរបស់ខ្លួន ទីក្រុងសិនជិនទទួលបានភាពល្បីល្បាញនាពេលថ្មីៗនេះ នៅពេលតារាយូធូបដ៏ល្បីរបស់សហរដ្ឋអាមេរិក IShowSpeed ដែលមានអ្នកតាមដានជិត៤០លាននាក់ បង្ហាញវត្តមាននៅទីនោះតាមរយៈការផ្សាយផ្ទាល់រយៈពេល៥ម៉ោងពីទីក្រុងសិនជិន នៅក្នុងយូធូបរបស់ខ្លួន ដោយទាក់ទាញអ្នកទស្សនារហូតដល់ ៨,៧លាននាក់ឯណោះ។
ការជំរុញដ៏សំខាន់របស់រដ្ឋាភិបាលចិនក្នុងការសម្រួលនីតិវិធីធ្វើដំណើរ និងលើកលែងតម្រូវការទិដ្ឋាការសម្រាប់ប្រទេសជាច្រើន គឺជាផ្នែកមួយនៃកិច្ចខិតខំប្រឹងប្រែងយ៉ាងទូលំទូលាយរបស់ខ្លួនក្នុងការធ្វើឱ្យវិស័យទេសចរណ៍ស្ទុះងើបឡើងវិញ បន្ទាប់ពីការរឹតបន្តឹងទប់ស្កាត់ការឆ្លងរីករាលដាលនៃជំងឺកូវីដ១៩។
ជាក់ស្តែងនៅឆ្នាំ២០២៤ ការធ្វើដំណើរដោយគ្មានទិដ្ឋាការទៅកាន់ប្រទេសចិនបានកើនឡើងដល់ ២០,១លាននាក់ ពោលកើនឡើង ១១២% បើធៀបនឹងឆ្នាំ២០២៣។ នេះបើយោងតាមរបាយការណ៍ពីរដ្ឋបាលអន្តោប្រវេសន៍ជាតិរបស់ប្រទេសចិនបានចេញផ្សាយ៕
ចែករំលែកព័តមាននេះ