រាជធានីភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល បានក្រើនរំលឹកដល់ប្រជាពលរដ្ឋចាក់វ៉ាក់សាំងកូវីដ-១៩ ដើម្បីការពារជាមុននូវភាពឈឺធ្ងន់ធ្ងរ បណ្តាលមកពីវីរុសកូវីដ-១៩…
រាជធានីភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល បានក្រើនរំលឹកដល់ប្រជាពលរដ្ឋចាក់វ៉ាក់សាំងកូវីដ-១៩ ដើម្បីការពារជាមុននូវភាពឈឺធ្ងន់ធ្ងរ បណ្តាលមកពីវីរុសកូវីដ-១៩ បំប្លែងថ្មី ហើយការចាក់វ៉ាក់សាំងមាននៅតាមមណ្ឌលសុខភាព ឬមន្ទីរពេទ្យរដ្ឋ តាមបណ្តារាជធានី-ខេត្តទាំង២៥។
យោងតាមរយៈបណ្តាញទំនាក់ទំនងសង្គមផ្លូវការរបស់លោកជំទាវ ឱ វណ្ណឌីន នាថ្ងៃទី១៧ ខែឧសភា ឆ្នាំ២០២៤ លោកស្រី រដ្ឋលេខាធិការ បានឱ្យដឹងថា ដោយសារស្ថានភាពកើតមានការឆ្លងឡើងវិញនូវវីរុសកូវីដ-១៩ បំប្លែងថ្មី ពិសេសពួកជេអ៊ិន.១ (JN.1) ដែលកំពុងតែចរាចរនៅតាមបណ្តាប្រទេសជិតខាងកម្ពុជា និងនៅតាមតំបន់នៅលើពិភពលោក ក្រសួងសុខាភិបាលបានចេញសេចក្តីប្រកាសព័ត៌មានរួចហើយ ស្តីពី«ការបង្កើនការការពារខ្លួនពីការឆ្លងវីរុសកូវីដ-១៩» ដូច្នេះ ប្រជាពលរដ្ឋទាំងអស់បង្កើនការយកចិត្តទុកដាក់ និងប្រុងប្រយ័ត្នខ្ពស់ ការពារខ្លួនពីការឆ្លងវីរុសកូវីដ-១៩ ដែលអាចមានផលប៉ះពាល់សុខភាពដោយសារជំងឺកូវីដ-១៩ ជាពិសេសជនដែលងាយរងគ្រោះដូចជា ជនវ័យចាស់ ចាស់ជរា អ្នកដែលមានជំងឺរាំរ៉ៃ និងអ្នកដែលមានកងការពារខ្សោយនៅក្នុងខ្លួនជាដើម ។
លោកជំទាវ រដ្ឋលេខាធិការ បានគូសបញ្ជាក់ថា «ដើម្បីអាចការពារខ្លួនពីការវា.យលុកក្នុងសរីរាង្គរាងកាយបុគ្គល ជាពិសេសក្រុមងាយទទួលរងគ្រោះពីជំងឺកូវីដ-១៩នេះដែលអាចឈានដល់ភាពធ្ងន់ធ្ងរ និងអាចស្លា.ប់បាត់បង់ជីវិតបានដែរនោះ ខ្ញុំសូមក្រើនរំលឹកបងប្អូនប្រជាពលរដ្ឋកម្ពុជាទាំងអស់ ជាពិសេស គឺក្រុមងាយរងគ្រោះដូចបានរៀបរាប់ខាងលើនាំគ្នាទៅចាក់វ៉ាក់សាំងកូវីដ-១៩ ភីហ្វាយហ្សឺ (Pfizer) ដែលមាននៅតាមបណ្តារាជធានី-ខេត្តទាំង២៥ (នៅតាមមណ្ឌលសុខភាព ឬមន្ទីរពេទ្យរដ្ឋ) ចាប់ពីពេលនេះតទៅ» ។
លោកជំទាវ រដ្ឋលេខាធិការ ក៏បានវា.យបញ្ជាក់ថា ៖«សូមកុំភ្លេចវិធានការ ៣ការពារ និង៣កុំ រួមជាមួយនឹងការចាក់វ៉ាក់សាំងកូវីដ-១៩ ទើបអាចជួយកាត់បន្ថយជាអតិប្បរមានូវភាពធ្ងន់ធ្ងរនៃជំងឺ ការចូលសម្រាកពេទ្យ និងការស្លា.ប់ ដូចដែលយើងទាំងអស់គ្នាឆ្លងកាត់បទពិសោធន៍ទទួលបានលទ្ធផលល្អទាំងនេះនៅឆ្នាំ២០២១ ដល់ឆ្នាំ២០២២ ស្រាប់ហើយ» ។
សូមបញ្ជាក់ថា កម្ពុជាបច្ចុប្បន្ន មិនទាន់មានស្ថានភាពឆ្លងឡើងវិញនូវវីរុសកូវីដ-១៩ នៅឡើយទេ ប៉ុន្តែការ «ការពារប្រសើរជាងព្យាបាល» ជាជម្រើសដ៏ល្អប្រសើរបំផុតសម្រាប់ប្រជាពលរដ្ឋទាំងអស់គ្នា ។
រួមគ្នាដើម្បីកម្ពុជា ចៀសផុតពីការលេចចេញឡើងវិញ នូវការឆ្លងបន្តគ្នានូវវីរុសកូវីដ-១៩ ដោយប្រជាពលរដ្ឋទាំងអស់គ្នា ត្រូវតែត្រៀមខ្លួន និងការពារខ្លួនទុកជាមុនឱ្យបានល្អប្រសើរ ៕
ចែករំលែកព័តមាននេះ