ខេត្តមណ្ឌលគិរី ៖ រដ្ឋមន្ត្រីក្រសួងទេសចរណ៍ បានប្តេជ្ញានាំយក និងជម្រុញកំណើនភ្ញៀវទេសចរណ៏ ទៅកាន់ខេត្តមណ្ឌលគិរី ឲ្យកើនចំនួនទ្វេរឡើងដើម្បីជួយអភិវឌ្ឍន៍មូលដ្ឋាន និងបន្តពង្រឹងតាមតំបន់រមណីដែលមានស្រាប់ ជាពិសេស គឺទាក់ទាញអ្នកវិយោគលើវិស័យទេសចរណ៏…
ខេត្តមណ្ឌលគិរី ៖ រដ្ឋមន្ត្រីក្រសួងទេសចរណ៍ បានប្តេជ្ញានាំយក និងជម្រុញកំណើនភ្ញៀវទេសចរណ៏ ទៅកាន់ខេត្តមណ្ឌលគិរី ឲ្យកើនចំនួនទ្វេរឡើងដើម្បីជួយអភិវឌ្ឍន៍មូលដ្ឋាន និងបន្តពង្រឹងតាមតំបន់រមណីដែលមានស្រាប់ ជាពិសេស គឺទាក់ទាញអ្នកវិយោគលើវិស័យទេសចរណ៏ ចូលដាក់ទុនអភិវឌ្ឍន៍បន្ថែម ក្នុងខេត្ត ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍បែបនេះ ក្នុងឱកាសអញ្ជើញជាអធិបតីភាពប្រកាសប្រធានមន្ទីរទេសចរណ៍ខេត្តមណ្ឌលគិរី នារសៀលថ្ងៃទី១៦ ខែឧសភា ឆ្នាំ២០២៥ នៅសាលាខេត្តមណ្ឌលគិរី ។
ឯកឧត្តម ហួត ហាក់ មានប្រសាសន៍បន្តថា វិស័យទេសចរណ៍ គឺជាឆ្អឹងខ្នង នៃសេដ្ឋកិច្ចជាតិ ហើយក៏ជាសេដ្ឋកិច្ចគ្រួសារដ៏សំខាន់ ដោយសារខេត្តមណ្ឌលគិរី មានលក្ខណៈពិសេសខុសពីបណ្តាខេត្តដទៃ ពោលគឺមានអាកាសធាតុត្រជាក់ និងទេសភាពស្រស់ស្អាតស្ទើរគ្រប់រដូវកាល ហើយមានរមណីដ្ឋានធម្មជាតិយ៉ាងច្រើន ដែលជាភាពអំណោយផលល្អ ដល់ដំណើរកម្សាន្តរបស់ភ្ញៀវទេសចរណ៍ជាតិ និងអន្តរជាតិ ។
ឯកឧត្តមរដ្ឋមន្ត្រី ក្រសួងទេសចរណ៍ បន្តថា សម្តេចធិបតី បានគាំទ្រយ៉ាងពេញទំហឹងលើយុទ្ឋនាការ រដូវកាលបៃតង ឬ Green seaon ដែល ក្រសួងទេសចរណ៍ បានដាក់ចេញសម្រាប់ចលនាទូទាំងប្រទេស ក្នុងការជម្រុញភាពទាក់ទាញពីទេសចរណ៏ទូទាំងពិភពលោក។ ជាមួយគ្នានេះឯកឧត្តម បានផ្តាំផ្ញើដល់ប្រធានមន្ទីរ ដែលទើបទទួលបានការតែងតាំងថ្មី ត្រូវបង្កើនកិច្ចសហការជាមួយអាជ្ញាធរមូលដ្ឋាននានា ដែលមានតំបន់ទេសចរណ៍ស្រាប់ ដើម្បីបង្កើនប្រសិទ្ធភាពការងារ និងសម្រេចបាននូចចក្ខុវិស័យរបស់អង្គភាព ។
លោក ថង សាវុន អភិបាលខេត្តមណ្ឌលគិរី មានប្រសាសន៏ថា ការប្រកាសចូលកាន់មុខតំណែងប្រធានមន្ទីរទេចរណ៍ខេត្តមណ្ឌលគិរី នាពេលនេះ គឺជាការតែងតាំងប្រគល់ភារកិច្ច និងជាការផ្តល់នូវការទទួលខុសត្រូវមួយថែមទៀត ដែលតម្រូវឱ្យសាមីខ្លួន ត្រូវតែបញ្ចេញឱ្យអស់សមត្ថភាព លទ្ធភាព និងទេពកោសល្យ ដើម្បីជំនះបានរាល់ភាពលំបាកនានា ដែលចាំបាច់ត្រូវសហការជាមួយថ្នាក់ដឹកនាំ និងមន្ត្រីក្រោមឱវាទ ដើម្បីធ្វើឱ្យអង្គភាព មានការប្រែប្រួលមុខមាត់ថ្មី សំដៅធានារ៉ាប់រងបាននូវភារកិច្ចស្នូលទាំងឡាយ ដែលអង្គភាពត្រូវបំពេញ និងទទួលខុសត្រូវចំពោះមុខស្ថាប័ន និងភារកិច្ចទាំងឡាយផ្សេងៗទៀត ទៅតាមការចាំបាច់ ដែលក្រសួងសាមី និងរដ្ឋបាលខេត្ត ប្រគល់ជូន ។
លោក ថង សាវុន ក៏បានចែករំលែក និងផ្តល់នូវចំណេះដឹងបទពិសោធន៍មួយចំនួនសម្រាប់ លោកប្រធានមន្ទីរទេសចរណ៍ខេត្ត ដែលត្រូវចូលកាន់តំណែង នាពេលនេះ ក្នុងបរិបទនៃកំណែទម្រង់ស៊ីជម្រៅ ការពង្រឹងអភិបាលកិច្ច នៃការផ្តល់សេវា និងគោលការណ៍ ណែនាំថ្មីៗ ត្រូវបន្តពង្រឹងប្រពៃណីសាមគ្គីភាព ឯកភាពផ្ទៃក្នុងឱ្យកាន់តែល្អប្រសើរ និងទូលំទូលាយថែមទៀត ទាំងរវាងថ្នាក់លើ និង ថ្នាក់ក្រោម ក៏ដូចជាមួយនឹងបណ្តាមន្ទីរ-អង្គភាព ក្រុង-ស្រុកនានា ។ ត្រូវបង្កើនប្រសិទ្ធភាពគ្រប់គ្រងមន្ត្រីរាជការ មានការពង្រឹងវិន័យ ចេះសម្របសម្រួល តាមដានការងារ និងលើកទឹកចិត្តមន្ត្រីរាជការក្រោមឱវាទ ដើម្បីឱ្យពួកគេបញ្ចេញអស់លទ្ធភាព សមត្ថភាព មនសិការ ការងារ និងការទទួលខុសត្រូវក្នុងការអនុវត្តភារកិច្ចតាមការប្រគល់ជូនឱ្យមានប្រសិទ្ធភាពត្រូវយកចិត្តទុកដាក់ អនុវត្តការងារប្រកបដោយការឈ្លាសវៃ និងត្រូវមានចក្ខុវិស័យ សមស្របទៅលើ សភាពការណ៍ទូទៅ ស្របតាមស្ថានភាព និងត្រូវដោះស្រាយ ឬស្នើសុំគោលការណ៍ដោះស្រាយឱ្យបានទាន់ពេលវេលា។ ត្រូវមានគំនិតផ្តួចផ្តើម និងភាពច្នៃប្រឌិតខ្ពស់ ធ្វើឱ្យការដឹកនាំបានប្រព្រឹត្តទៅប្រកបដោយតម្លាភាព គណនេយ្យភាព និង អភិបាលកិច្ចល្អផងដែរ ។ក្នុងកិច្ចប្រតិបត្តិការដឹកនាំ ចាំបាច់ត្រូវមានការប្រជុំបូកសរុបដកបទពិសោធន៍រកឱ្យឃើញចំណុចខ្លាំង ខ្សោយ ហើយពង្រឹងចំណុចល្អ លុបបំបាត់ចោលនូវចំណុចអសកម្មទាំងឡាយ ដែលនាំឱ្យប៉ះពាល់ដល់ ឥទ្ធិពល និងប្រសិទ្ធិភាពដឹកនាំអនុវត្តរបស់អង្គភាព ។
លោក ស៊ាង សឿន ដែលទើបទទួលបានការតែងតាំងជាប្រធានមន្ទីរទេសចរណ៍ខេត្តមណ្ឌលគិរី បានប្តេជ្ញាដឹកនាំការងារក្នុងវិស័យទេសចរណ៍ ដោយអនុវត្តនូវតួនាទី និងភារកិច្ចឱ្យបានគ្រប់ជ្រុងជ្រោយ តាមគោលនយោបាយយុទ្ធសាស្ត្របញ្ចកោណរបស់រាជរដ្ឋាភិបាល ក៏ដូចជាផែនការសកម្មភាពរបស់ក្រសួងទេសចរណ៍ សំដៅពង្រឹងនិងពង្រីកវិស័យទេសចរណ៍ ឱ្យមានភាពទាក់ទាញ និងមានកំណើនភ្ញៀវទេសចរ តាមការណែនាំផ្ទាល់ពីថ្នាក់ដឹកនាំខេត្ត និងសហការណ៍ជាមួយមន្ទីរ អង្គភាពពាក់ព័ន្ធនានាឱ្យបានល្អប្រសើរ ដើម្បីការរីកចំរើននិងអភិវឌ្ឍន៍ខេត្តរបស់យើង ៕
ចែករំលែកព័តមាននេះ