ខេត្តកំពង់ស្ពឺ ៖ រដ្ឋមន្ត្រីក្រសួងបរិស្ថានអញ្ជើញបើកការដ្ឋានសាងសង់ផ្លូវចូលទៅភ្នំខ្នងផ្សារ និងសាងសង់ហេដ្ឋារចនាសម្ព័ន្ធបម្រើឱ្យគោលដៅលម្ហែបៃតងតំបន់ភ្នំខ្នងផ្សារ កាលពីព្រឹកថ្ងៃទី១៦ ឧសភា ឆ្នាំ២០២៥ នេះ ដែលមានទីតាំងស្ថិតនៅ ភូមិតាំងបំពង់…
ខេត្តកំពង់ស្ពឺ ៖ រដ្ឋមន្ត្រីក្រសួងបរិស្ថានអញ្ជើញបើកការដ្ឋានសាងសង់ផ្លូវចូលទៅភ្នំខ្នងផ្សារ និងសាងសង់ហេដ្ឋារចនាសម្ព័ន្ធបម្រើឱ្យគោលដៅលម្ហែបៃតងតំបន់ភ្នំខ្នងផ្សារ កាលពីព្រឹកថ្ងៃទី១៦ ឧសភា ឆ្នាំ២០២៥ នេះ ដែលមានទីតាំងស្ថិតនៅ ភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ ។
នៅក្នុងពិធីនេះដែរ មានការអញ្ជើញចូលរួមពីឯកឧត្តម លោកជំទាវព្រមទាំងតំណាងក្រសួងស្ថាប័នរាជរដ្ឋាភិបាល អង្គភាពពាក់ព័ន្ធ រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការមិនមែនរដ្ឋាភិបាល វិស័យឯកជន អាជ្ញាធរមូលដ្ឋាន ប្រជាសហគមន៍ លោកគ្រូ អ្នកគ្រូ និងសិស្សានុសិស្ស អ្នកសារព័ត៌មានជាតិ អន្តរជាតិជាច្រើនកុះករ ។
រដ្ឋមន្ត្រីក្រសួងបរិស្ថាន ឯកឧត្តម អ៊ាង សុផល្លែត បានលើកឡើងថា សមិទ្ធផលទាំងនេះ នឹងក្លាយជាចំណងដៃថ្មី ពិតជាបានចូលរួមចំណែកយ៉ាងសំខាន់ យ៉ាងសំខាន់ក្នុងជួយលើកកម្ពស់ជីវភាពរបស់ប្រជាពលរដ្ឋនៅភូមិតាំងបំពង់ និងប្រជាសហគមន៍តំបន់ការពារធម្មជាតិរលាក់កងជើង ក៏ដូចជាការតភ្ជាប់ ខេត្តកំពង់ស្ពឺ និងខេត្តកោះកុង ដែលជាសមិទ្ធផលដ៏ពិសិដ្ឋរបស់រាជរដ្ឋាភិបាលកម្ពុជាផ្ដល់ជូនផងដែរ។
ឯកឧត្តមរដ្ឋមន្ដ្រីបានបន្ដថា ការសាងសង់ផ្លូវ និងហេដ្ឋារចនាសម្ព័ន្ធបម្រើឱ្យគោលដៅលំហែបៃតងនៅតំបន់ភ្នំខ្នងផ្សារនេះ គឺជាការផ្តួចផ្តើម និងចង្អុលបង្ហាញដោយផ្ទាល់ពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសដែលសម្ដេចបានមកបំពេញទស្សនកិច្ចនៅតំបន់ភ្នំខ្នងផ្សារ កាលពីថ្ងៃទី០៨ ខែមីនា ឆ្នាំ២០២៥កន្លងទៅនេះ ។
សូមជម្រាបផងដែរថា យុទ្ធសាស្ត្របញ្ចកោណ-ដំណាក់កាលទី១ ក្រសួងបរិស្ថាន បានដាក់ចេញនូវ យុទ្ធសាស្ត្រចក្រាវិស័យបរិស្ថាន ២០២៣-២០២៨ ដោយមានយុទ្ធសាស្ត្រស្នូលផ្តោតសំខាន់លើមុំបីគឺ ការពង្រឹងគោលនយោបាយ ការកសាងរដ្ឋបាលឌីជីថលនិងការពង្រីកការផ្សព្វផ្សាយ ដែលជាកម្លាំងចលកររុញបង្វិល យុទ្ធសាស្ត្រចំនួនបី គឺ «ភាពស្អាត ភាពបៃតង និងចីរភាព» មកធ្វើជាមូលដ្ឋានគ្រឹះ សម្រាប់តម្រង់ទិស និង ចង្អុលបង្ហាញអាទិភាពការងារក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការ អភិវឌ្ឍន៍ ប្រកបដោយចីរភាព តាមរយៈការរៀបចំគោលនយោបាយ ផែនការយុទ្ធសាស្ត្រ និងផែនការសកម្មភាពនានា សំដៅធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ដើម្បីឆ្លើយតបនឹងការប្រែប្រួល អាកាសធាតុ និងលើកកម្ពស់ការអភិវឌ្ឍន៍បៃតង៕
ចែករំលែកព័តមាននេះ