ខេត្តកំពង់ស្ពឺ ៖ មួយរយៈពេលថ្មីៗនេះគេសង្កេតឃើញមានអ្នកសារព័ត៌មានជាច្រើនអង្គភាពបានធ្វើការផ្សព្វផ្សាយរិះគន់ចំៗ ទៅលើមន្ត្រីជំនាញពាក់ព័ន្ធក្នុងស្រុកឱរ៉ាល់និងស្រុកថ្ពង ខេត្តកំពង់ស្ពឺ ជាពិសេនោះបានរាយការណ៍ពីសកម្មភាពរបស់ក្រុមឈ្មួញរកស៊ីបទល្មើសព្រៃឈើ ឈ្មោះថៅ រុន ថៅកែ អុល…
ខេត្តកំពង់ស្ពឺ ៖ មួយរយៈពេលថ្មីៗនេះគេសង្កេតឃើញមានអ្នកសារព័ត៌មានជាច្រើនអង្គភាពបានធ្វើការផ្សព្វផ្សាយរិះគន់ចំៗ ទៅលើមន្ត្រីជំនាញពាក់ព័ន្ធក្នុងស្រុកឱរ៉ាល់និងស្រុកថ្ពង ខេត្តកំពង់ស្ពឺ ជាពិសេនោះបានរាយការណ៍ពីសកម្មភាពរបស់ក្រុមឈ្មួញរកស៊ីបទល្មើសព្រៃឈើ ឈ្មោះថៅ រុន ថៅកែ អុល និង ថៅកែ រ៉ា ដែលគេស្គាល់ច្បាស់ថាជាមេឈ្មួញចាស់វស្សាខាងបំផ្លិចបំផ្លាញព្រៃឈើ ជូនទៅអស់លោក មន្ត្រីជំនាញនិងសមត្ថកិច្ចដែលមានស្នាក់ការតាមដងផ្លូវនិងនៅតាមគោលដៅជាច្រើនផងដែរ។ ប៉ុន្តែមន្ត្រីជំនាញក្នុងមូលដ្ឋាន និងសមត្ថកិច្ចជំនាញទាំងអស់នោះ ហាក់មិនសូវអើពើ និងមិនហ៊ានបង្ក្រាបគោយន្តកន្ត្រៃ ដឹកជញ្ជូនបទល្មើសព្រៃឈើនោះឡើយ ។ សង្ស័យមេឈ្មួញចេះរកផលចែកគ្នារស់ទេដឹង?
ប្រភពព័ត៌មានបានឱ្យដឹងថា÷ មេក្រុមឈ្មួញទាំងបីនាក់ខាងលើនេះ តែងតែ ចូលដឹកជញ្ជូនឈើគ្រឿងផ្ទះ បានដោយយ៉ាងរលូន ស្ទើរតែ ជារៀងរាល់យប់ ដោយប្រើមធ្យោយបាយ តាមគោយន្តកន្ត្រៃជាច្រើនម៉ែត្រគូប។ ការដឹកជញ្ជូនបទល្មើសព្រៃឈើរបស់មេឈ្មួញល្បីឈ្មោះបីនាក់ខាងលើនេះ ចេញពីចំណុចជើងឱរ៉ាល់ បើកឆ្លងកាត់មុខប៉ុស្តិ៍ ស្នាក់ការរងរបស់បរិស្ថានស្រែកិន ដែលមានលោក ចាន់ ប្រចាំការ និងឆ្លងកាត់ ស្នាក់ការមេព្រៃ ដែលមានឈ្មោះ លោក ចន ទើបចូលតាមខ្លោងទ្វារក្រុមហ៊ុន ចំការអំពៅ ទើបចេញវិញតាមខាងជើងផ្សារអមលាំង ទើបឆ្លងកាត់តាមផ្លូវជាតិលេខ៤៤ ចន្លោះបង្គោល គីឡូម៉ែត្រ៨៨~៨៩។ ជួនកាលក្រុមឈ្មួញទាំងបីនាក់ខាងលើ ដឹកជញ្ជូនតាមមុខប៉ុស្តិនិងសាលា ឃុំត្រពាំងជោ ឆ្ពោះទៅស្រុកថ្ពង នៃខេត្តកំពង់ស្ពឺ។ ពួកគេសង្ស័យចេះចែកគ្នារស់យូរហើយ ។
ប្រភពព័ត៌មានបានបន្តថា ការដឹកជញ្ជូនបទល្មើសព្រៃឈើរបស់មេឈ្មួញឈ្មោះថៅកែ រុន ថៅកែ អុល និងឈ្មោះថៅកែ រ៉ា នេះ ពួកគេបានរៀបចំរត់ការ បង់លុយជូនសមត្ថកិច្ច និងមន្ត្រី ជំនាញនានានៅតាមដងផ្លូវរួចរាល់អស់ហើយ។ មានដូចជាមន្ត្រីបរិស្ថានស្រែកិន មេព្រៃស្រែកិន នគរបាលសេដ្ឋកិច្ចខេត្តកំពង់ស្ពឺ ព្រមទាំងមន្ត្រីច្រើនក្រុមទៀត ដែលប្រចាំការតំបន់នោះ ។ ដោយសារតែលុយបាំងមុខអស់លោកសមត្ថកិច្ច និងជំនាញពាក់ព័ន្ធនានានេះហើយ ទើបបទល្មើសព្រៃឈើនៅតែកើតមានឡើងដដែល ហើយថែមទាំងមិនហ៊ានចាប់បង្ក្រាបទៀតពីព្រោះតែអស់លោក ខ្លាចអំណាចរបស់លោកថៅកែ រុន ថៅកែ អុល និងថៅកែ រ៉ា ដែលមានខ្នងបង្អែកធំ និងមានអំណាចនៅពីក្រោយខ្នង នោះហើយ។
ជាក់ស្តែងកាលពីរំលងអាធ្រាត្រឈានចូលថ្ងៃទី១៣ ខែឧសភា ឆ្នាំ២០២៥កន្លងទៅថ្មីៗនេះ គោយន្តកន្ត្រៃ ដឹកបទល្មើសព្រៃឈើរបស់លោកថៅកែ រុន លោកថៅកែ អុល និងលោកថៅកែ រ៉ា បានដឹកជញ្ជូន ឈើគ្រឿងផ្ទះ ចេញពីតំបន់ជើងភ្នំឱរ៉ាល់ ឆ្លងកាត់ចំការអំពៅ ដូចរៀបរាប់ខាងលើមែន។ ប៉ុន្តែប្រជាពលរដ្ឋឆ្ងល់ថាតើលោកថៅកែ រុន លោកថៅកែ អុល និងលោកថៅកែ រ៉ា មានអំណាច និងលុយច្រើនប៉ុណ្ណា បានជាហ៊ានដឹកជញ្ជូនបទល្មើសព្រៃឈើបានដោយរលូន ហើយបើកបរឆ្លងកាត់ក្នុងចំការអំពៅ ខណៈដែលមានមន្ត្រីយោធា កម្លាំងសមត្ថកិច្ចយាមកាមយ៉ាងតឹងតែងនោះ?
ប្រភពព័ត៌មានពីប្រជាពលរដ្ឋលើកឡើងថា បើសិនជាអស់លោកមានឆន្ទៈក្នុងការទប់ស្កាត់ បង្ក្រាបបទល្មើស និងស្រាវជ្រាវស្វែងរកចាប់ខ្លួន បុគ្គល ឈ្មោះថៅកែ រុន ថៅកែ អុល និងថៅកែ រ៉ា ប្រាកដស្រួលដូចបកចេក ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ