សមាសធាតុនៃគណៈប្រតិភូជំនាញកម្ពុជា១៩រូបបានចាកចេញពីកម្ពុជាដើម្បីបើកការចរចាបញ្ហាពន្ធបដិការកម្ពុជា-សហរដ្ឋអាមេរិកនៅចុងសប្តាហ៍ទី២នៃខែឧសភានេះ។ ទោះលទ្ធផលយ៉ាងណាក្តី យើងត្រូវ តែត្រៀមចិត្ត និង ត្រៀមកាយដើម្បីទប់ទល់ស្ថានការណ៍នេះឲ្យបាន ដោយសារការចរចារមែងមានជោគជ័យនិងបរាជ័យ ដោយសារតែយើងក៏ចង់ការពារផលប្រយោជន៍របស់យើងគេក៏ចង់ការពារផល ប្រយោជន៍របស់គេ។ លោក…
សមាសធាតុនៃគណៈប្រតិភូជំនាញកម្ពុជា១៩រូបបានចាកចេញពីកម្ពុជាដើម្បីបើកការចរចាបញ្ហាពន្ធបដិការកម្ពុជា-សហរដ្ឋអាមេរិកនៅចុងសប្តាហ៍ទី២នៃខែឧសភានេះ។ ទោះលទ្ធផលយ៉ាងណាក្តី យើងត្រូវ តែត្រៀមចិត្ត និង ត្រៀមកាយដើម្បីទប់ទល់ស្ថានការណ៍នេះឲ្យបាន ដោយសារការចរចារមែងមានជោគជ័យនិងបរាជ័យ ដោយសារតែយើងក៏ចង់ការពារផលប្រយោជន៍របស់យើងគេក៏ចង់ការពារផល ប្រយោជន៍របស់គេ។
លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំក្រុមការងារចំពោះកិច្ចបំពេញបេសកកម្មការងារចរចាលើ កិច្ចព្រមព្រៀងពាណិជ្ជកម្មបដិការ កម្ពុជា-សហរដ្ឋអាមេរិកនេះ ហើយកាលពីវេលាម៉ោង ១២និង៣៥នាទីថ្ងៃត្រង់ ថ្ងៃទី១០ ខែឧសភា ឆ្នាំ២០២៥ដោយសារតែការចរចាមានការកែប្រែខ្លះៗដោយដំបូងគឺគ្រោងនឹងធ្វើពីថ្ងៃទី ១៤ ដល់ ១៥ ឧសភា ប៉ុន្តែមានការកែប្រែ បន្តិចបន្តួចដោយកិច្ចចរចារនេះគឺត្រូវ មកធ្វើនៅថ្ងៃទី១៣ និង ១៤ ពេលរសៀលហើយ ដល់ ថ្ងៃទី ១៥ គឺបានកិច្ចចរចារនេះគឺដំណើរការពេញមួយថ្ងៃ។
នៅមុនពេលចាកចេញលោក ឧបនាយករដ្ឋមន្ត្រី បានប្រាប់ក្រុមអ្នកសារព័ត៌មានថា ការពិភាក្សានៅពេលខាងមុខនេះមួយចំនួនមិនទាក់ទងនឹងអត្រាពន្ធទាំងអស់ទេ។ ដូច្នេះហើយបានជាកម្ពុជា បានត្រៀមសមាសភាពមកពីគ្រប់វិស័យដើម្បីត្រៀមដោយមានតាំងពី គយ សន្តិសុខ ធនាគារ ការបរទេស ប្រៃសណីយ៍ និងទូរគមនាគមន៍ ។ល។
លោកបានបញ្ជាក់ប្រាប់ថា ការចាកចេញរបស់គណប្រតិភូកម្ពុជាទៅចរចានៅសហរដ្ឋអាមេរិកនេះ កម្ពុជាមានសង្ឃឹម មិនមែនអត់សង្ឃឹមនោះឡើយ ។ លោកបាន សង្កតធ្ងន់ថា បើអត់សង្ឃឹមទេ យើងនឹងមិនទៅចរចាឡើយ ។ យើងបានធ្វើកិច្ចការច្រើននៅក្នុងការងារចរចារនេះ ហើយក្រៅពីសមាជិកក្រុមការងារនេះ យើងក៏បានត្រៀមធ្វើការជាមួយនឹងក្រុមហ៊ុន បញ្ចុះបញ្ចូល ដែលគេហៅថា lobbying firm ផងដែរ ។
លោកក៏បានបន្តទៀតថា មកដល់ពេលនេះ កម្ពុជាគឺជាប្រទេសមួយនៅក្នុងចំណោមប្រទេសពី ១៨ ទៅ ២០ ដែលមានឆន្ទះពិតប្រាកដនៅក្នុងការធ្វើការចរចាជាមួយនឹងសហរដ្ឋអាមេរិកហើយសហរដ្ឋ អាមេរិកក៏បានយល់ព្រមទទួលនិងបើកទ្វារទទួលគណប្រតិភូកម្ពុជាទៅចរចាជាមួយគេដោយផ្ទាល់ ។ លោកបានបញ្ជាក់ថា កម្ពុជាមានឆន្ទះនៅក្នុងការចរចាពិតប្រាកដ។ ដូច្នេះហើយបានជាយើងនៅតែ មានសង្ឃឹម ។
លោកក៏បានបង្ហើបផងដែរថា តាមការជួបចរចាកន្លងទៅជាបន្តបន្ទាប់តាមប្រព័ន្ធហ្សូម (Zomm) សហរដ្ឋអាមេរិកក៏បានយល់ពីស្ថានភាពរបស់កម្ពុជាជាពិសេសគឺទៅលើអំណាចនៃការបញ្ជាទិញរបស់កម្ពុជា ។ សហរដ្ឋអាមេរិកក៏បានដឹងយ៉ាងច្បាស់ហើយថា កម្ពុជាពិតជាមិនមានមូលដ្ឋានណាមួយនៅក្នុងការបង្កើនតុល្យភាពពាណិជ្ជកម្ម ដែលសហរដ្ឋអាមេរិកថា យើងនាំចេញទៅគេ ជាងជាង ១២ ពាន់លាន ហើយយើងនាំចូលពីគេតែ ៣០០ លាននោះទេ ពីព្រោះការរីកចម្រើន ប្រទេសនីមួយៗ វាខុសគ្នា។ ភាគីសហរដ្ឋអាមេរិក ដឹងបញ្ហានេះ។ ភាគីសហរដ្ឋអាមេរិកក៏បានលើកឡើងថា គេចង់ឲ្យកម្ពុជាទិញទំនិញ ពីសហរដ្ឋអាមេរិកបន្ថែមទៀត ហើយគេក៏សុំឲ្យកម្ពុជាជួយការពារកម្មសិទ្ធិបញ្ញារបស់សហរដ្ឋអាមេរិក កំណត់បញ្ហាប្រភពនៃទំនិញដែលដឹកចេញពីកម្ពុជា ជាពិសេសគឺ ដើមកំណើតនៃទំនិញ នេះជាដើម ។
មកដល់ពេលនេះ កម្ពុជាគឺជាប្រទេសមួយដែលរងការកំនត់ពន្ធខ្ពស់ជាងគេនៅក្នុងចំណោមប្រទេសនៅអាស៊ីអគ្នេយ៍ដោយសហរដ្ឋអាមេរិក ។ ការកំណត់ពន្ធបដិការដ៏ខ្ពស់ដែលមានកម្រិតដល់ទៅ ៤៩ ភាគរយ គឺពិតជាខ្ពស់ណាស់ ហើយវាអាចធ្វើឲ្យទីផ្សារនាំចេញកម្ពុជា រងផលប៉ះពាល់ ជាពិសេសគឺឧស្សាហកម្មកាត់ដេរ ដែលគេដឹងថា វិស័យនេះបានកំពុងតែផ្តល់ការងារធ្វើជូនកម្មការនី និង កម្មករប្រមាណជា ១ លាននាក់ និង អ្នកដែលទទួលផលដោយប្រយោលជាច្រើនបន្ថែមទៀត ។
នៅក្នុងអំឡុងពេលនេះស្ថានភាពនៃការនាំចេញរបស់កម្ពុជាគឺនៅតែបន្តមានកំណើនដ៏វិជ្ជមាន ដោយសារតែរដ្ឋបាលរបស់សហរដ្ឋអាមេរិកបានពន្យាពេលអនុវត្តនូវការកំណត់ពន្ធនេះរហូតដល់រង្វង់ ប្រហែលជា ចុងសប្តាហ៍ទី១នៃខែកក្កដា ខាងមុខ ដើម្បីទុកពេលចរចារ។
នៅត្រីមាសទី១ដើមឆ្នាំ២០២៥នេះ កម្ពុជាអាចសម្រេចបានការនាំចេញប្រមាណជា ៦,៨ពាន់ លានដុល្លារ ដោយនៅក្នុងនោះកម្ពុជាអាចនាំចេញទៅសហរដ្ឋអាមេរិកប្រមាណជា ២,៤ ពាន់លានដុល្លារ ទៅប្រទេសផ្សេងៗនៅអាស៊ី ក៏ប្រហាក់ប្រហែលគ្នានេះដែរ ហើយអឺរ៉ុប គឺប្រមាណជា ១,២ ពាន់លានដុល្លារ ។
ផ្អែកតាមតែតួរលេខត្រឹមតែដើមឆ្នាំនេះ យើងឃើញថា វានឹងរងផលប៉ះពាល់មិនតិចទេ នៅក្នុងករណីការចរចាររឿងពន្ធបដិការនេះជាមួយនឹងសហរដ្ឋអាមេរិកមិនសមតាមបំណងរបស់យើង។ ដូច្នេះយើងក៏សង្ឃឹម ថា ក្រុមមន្ត្រីជំនាញកម្ពុជានឹងខិតខំប្រឹងប្រែងឲ្យអស់លទ្ធភាពដើម្បីអាចការពារផលប្រយោជន៍របស់ជាតិមាតុភូមិយើង ហើយក៏សង្ឃឹមថា សហរដ្ឋអាមេរិកនឹងយោគយល់កម្ពុជានៅក្នុងនាមជាប្រទេស មួយតូច ដែលមានសមានចិត្តនិងឆន្ទះពិតប្រាកដនៅក្នុងការធ្វើការជាមួយនឹងសហរដ្ឋអាមេរិកដោយឈរនៅលើកត្តាផលប្រយោជន៍ទៅវិញទៅមក តាមរូបមន្តឈ្នឈ្នះ។
យើងដឹងថា នេះគឺមិនមែនជាកិច្ចការ ងាយស្រួលនោះទេ ទោះរងសំពាធយ៉ាងណាសូមអត់ធ្នត់ញញឹម និង ខិតខំប្រឹងប្រែងធ្វើការជាមួយគ្នាដើម្បីកិច្ចការចរចានេះអាចទទួលបានលទ្ធផលមួយ ដែលអាចទទួលបានទាំងសងខាង ។ ដោយឡែកក្រៅពីក្រុមអ្នកជំនាញដែលទៅចរចា យើងដែលជាអ្នកកំពុងតែរង់ចាំលទ្ធផលក៏ត្រូវតែត្រៀមខ្លួនគ្រប់វិធានការទាំងការចរចារជោគជ័យ និង ការចរចារបរាជ័យ ដើម្បី លៃលកសម្រួលស្ថានការណ៍យ៉ាងណា អាចបន្តដំណើរការប្រក្រតីភាពនៃទីផ្សារនាំចេញ និង ដើម្បីឲ្យរោងចក្រឧស្សាហកម្ម ដែលបម្រើឲ្យវិស័យពាណិជ្ជកម្មរបស់យើង អាចនឹងដំណើរការទៅមុខ បន្តទៅទៀត នៅក្នុងជំហានមួយ ទោះបីជាវាមិនស្ទុះលឿនក៏ដោយ តែនៅតែទៅមុខសន្សឹមៗដើម្បីសម្រេចឲ្យបាននូវចក្ខុវិស័យដ៏វែងឆ្ងាយរបស់យើងទាំងអស់គ្នា ៕
ចែករំលែកព័តមាននេះ