ខេត្តស្ទឹងត្រែង ៖ យ៉ាងហោចណាស់សត្វគោចំនួន ០៩ក្បាលងាប់ និងមនុស្សម្នាក់ បានរងរបួសសន្លប់ ក្នុងគ្រាធ្លាក់ភ្លៀងយ៉ាងខ្លាំង លាយឡំជាមួយនឹងខ្យល់ និងផ្គររន្ទះ កាលពីយប់ថ្ងៃទី៩…
ខេត្តស្ទឹងត្រែង ៖ យ៉ាងហោចណាស់សត្វគោចំនួន ០៩ក្បាលងាប់ និងមនុស្សម្នាក់ បានរងរបួសសន្លប់ ក្នុងគ្រាធ្លាក់ភ្លៀងយ៉ាងខ្លាំង លាយឡំជាមួយនឹងខ្យល់ និងផ្គររន្ទះ កាលពីយប់ថ្ងៃទី៩ ខែឧសភា ឆ្នាំ២០២៥ ស្ថិតនៅស្រុកសៀមប៉ាង ខេត្តស្ទឹងត្រែង ។
អធិការនគរបាលស្រុកសៀមប៉ាង លោក ជីម អេន បានប្រាប់សារព័ត៌មានឱ្យដឹងថា កាលពីយប់ថ្ងៃទី៩ ខែឧសភា កើតមានករណីគ្រោះធម្មជាតិដោយរន្ទះបាញ់ ចំនួន០៣ទីតាំងផ្សេងគ្នា ក្នុងនោះ ៖
ករណីទី១ ៖ ស្ថិតនៅចំណុចភូមិសែងម៉ា ឃុំស្រែសំបូរស្រុកសៀមប៉ាង រន្ទះបាញ់បណ្តាលឲ្យស្ត្រីម្នាក់ឈ្មោះ ថា វ៉ន អាយុ៣២ឆ្នាំ កំពុងដេកចាំចម្ការសន្លប់បាត់ស្មារតី ហើយត្រូវបានក្រុមគ្រួសារ ដឹកយកមកសង្គ្រោះនៅមន្ទីរពេទ្យខេត្តស្ទឹងត្រែង ។
ករណីទី២ ៖ ស្ថិតនៅភូមិចន្ទុ(ក្រៅ) ឃុំសេកុង រន្ទះបាញ់បណ្ដាលឲ្យងាប់សត្វគោ០១ក្បាល ម្ចាស់ឈ្មោះ ក ប៊ុនមា ។
ករណីទី០៣ ៖ ស្ថិតនៅភូមិកញ្ចាញទឹក ឃុំស្រែសំបូរ រន្ទះបាញ់បណ្ដាលឲ្យងាប់សត្វគោ ចំនួន ០៨ក្បាល ម្ចាស់ឈ្មោះ ផន អន ។
ទាក់ទិនករណីគ្រោះធម្មជាតិខាងលើ គឺនៅយប់ថ្ងៃទី៩ ខែឧសភា ឆ្នាំ២០២៥ ក្នុងទីរួមខេត្តស្ទឹងត្រែង មានធ្លាក់ភ្លៀងយ៉ាងខ្លាំង ជាមួយផ្គររន្ទះនិងខ្យល់រហូតដល់ព្រឹកថ្ងៃទី១០ ឧសភា ទើបស្ងប់ និងរាំងភ្លៀង ៕
ចែករំលែកព័តមាននេះ