ខេត្តកំពង់ស្ពឺ ៖ កម្មការិនីរោងចក្រម្នាក់ បានស្លាប់ក្រោយពេលបញ្ជូនយកទៅសង្គ្រោះនៅមន្ទីរពេទ្យ ឯកម្មករ កម្មការិនីប្រមាណជាង៤០នាក់ទៀតបានរងរបួសធ្ងន់-ស្រាលរដូករណែល ខណៈដែលរថយន្តដឹកកម្មករបានប៉ះគ្នាជាមួយរថយន្តហ្វដដែលកំពុងបត់ឆ្លងផ្លូវ ហើយជ្រុលទៅបុកដើមឈើពេញទំហឹងឱ្យជួយទប់ ។ ហេតុការណ៍គ្រោះថ្នាក់ខាងលើនេះ…
ខេត្តកំពង់ស្ពឺ ៖ កម្មការិនីរោងចក្រម្នាក់ បានស្លាប់ក្រោយពេលបញ្ជូនយកទៅសង្គ្រោះនៅមន្ទីរពេទ្យ ឯកម្មករ កម្មការិនីប្រមាណជាង៤០នាក់ទៀតបានរងរបួសធ្ងន់-ស្រាលរដូករណែល ខណៈដែលរថយន្តដឹកកម្មករបានប៉ះគ្នាជាមួយរថយន្តហ្វដដែលកំពុងបត់ឆ្លងផ្លូវ ហើយជ្រុលទៅបុកដើមឈើពេញទំហឹងឱ្យជួយទប់ ។
ហេតុការណ៍គ្រោះថ្នាក់ខាងលើនេះ បានកើតឡើងកាលពីវេលាម៉ោង៦និង២០នាទីព្រឹក ថ្ងៃទី៧ ខែឧសភា ឆ្នាំ២០២៥ នៅលើកំណាត់ផ្លូវជាតិលេខ៤៤ ចន្លោះបង្គោលគីឡូម៉ែត្រលេខ១២៩-១៣០ ស្ថិតនៅភូមិខ្សាច់ពូន សង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ ។
នគរបាលចរាចរណ៍បានឱ្យដឹងថា នៅមុនពេលកើតហេតុ មានរថយន្ដ១គ្រឿងម៉ាកហ៊ីយ៉ាន់ដាយ(HYUNDAI) ពណ៌បៃតងខ្ចី ពាក់ផ្លាកលេខ ភ្នំពេញ ៣B-៤៦៤៩ ជារថយន្តដឹកកម្មករ៤២នាក់ ។ មានអ្នកបើកបរឈ្មោះ ឈឿង នាង ភេទប្រុស អាយុ៣៥ឆ្នាំ រស់នៅភូមិចំបក់ធំ ឃុំប្រាំបីមុម ស្រុកថ្ពង ខេត្តកំពង់ស្ពឺ ដែលក្រោយកើតហេតុ បានដាក់មេប្រូចបាត់ ។
រថយន្តនេះ បានបើកបរតាមបណ្តោយផ្លូវជាតិលេខ៤៤ ក្នុងទិសដៅពីលិចទៅកើត លុះពេលធ្វើដំណើរមកដល់ត្រង់ចំណុចខាងលើ បានទៅប៉ះជាមួយរថយន្ដ១គ្រឿង ម៉ាកFORD RANGER ពណ៌ស ពាក់ផ្លាកលេខ ២BP-១៨៩១ ។ តាមប្រភពថា រថយន្តហ្វដរ៉េនជ័រនេះ ខណៈកំពុងតែបើកបរស្របទិសគ្នាក៏បត់ឆ្វេងឆ្លងផ្លូវលឿនពេក ធ្វើឱ្យរថយន្ដដឹកកម្មករប្រឹងបួងចង្កួតគេច ក៏រេចង្កូតទៅបុកដើមឈើដែលនៅខាងឆ្វេងដៃឱ្យជួយទប់ដំណើរ បណ្ដាលឲ្យស្លាប់កម្មការិនីម្នាក់ឈ្មោះ ទ្រី មួយស៊ូន អាយុ២១ឆ្នាំ រស់នៅក្នុងភូមិចំបក់ផ្អែម ឃុំមនោរម្យ ស្រុកថ្ពង ខេត្តកំពង់ស្ពឺ (ស្លាប់ពេលបញ្ជូនដល់មន្ទីរពេទ្យ) ។
ចំណែកអ្នករងរបួសធ្ងន់ធ្ងរ៥នាក់(ស្ត្រី) រងរបួសស្រាល៣៦នាក់(ស្រី៣០នាក់) ចំណែករថយន្តទាំង២គ្រឿង រងការខូចខាតធ្ងន់១គ្រឿង ។មន្ត្រីនគរបាលដដែលបានបញ្ជាក់ថា ក្រោយកើតហេតុ នគរបាលជំនាញបានដឹកបញ្ជូនទៅព្យាបាលនៅមន្ទីរពេទ្យ (មិនទាន់ស្គាល់ឈ្មោះគ្រប់គ្នានៅឡើយទេ) ។
ដោយឡែក ចំពោះវត្ថុតាងរថយន្ដទាំង២គ្រឿង ជំនាញកំពុងតែចាត់ចែងយកទៅរក្សាទុក រង់ចាំធ្វើការដោះស្រាយនៅពេលក្រោយ ។ សពកម្មការិនីរងគ្រោះ ត្រូវបានប្រគល់ជូនសាច់ញាតិក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ