ប្រទេសព័រទុយហ្គាល់ ៖ កូនប្រុសច្បងរបស់កីឡាករ Cristiano Ronaldo ត្រូវបានកោះហៅជាលើកដំបូងសម្រាប់ក្រុមជម្រើសជាតិព័រទុយហ្គាល់យុវជនអាយុក្រោម១៥ឆ្នាំ។ នេះបើតាមការប្រកាសពីក្រុមផ្ទាល់ និងត្រូវចេញផ្សាយដោយសារព័ត៌មាន CNN កាលពីថ្ងៃទី៧…
ប្រទេសព័រទុយហ្គាល់ ៖ កូនប្រុសច្បងរបស់កីឡាករ Cristiano Ronaldo ត្រូវបានកោះហៅជាលើកដំបូងសម្រាប់ក្រុមជម្រើសជាតិព័រទុយហ្គាល់យុវជនអាយុក្រោម១៥ឆ្នាំ។ នេះបើតាមការប្រកាសពីក្រុមផ្ទាល់ និងត្រូវចេញផ្សាយដោយសារព័ត៌មាន CNN កាលពីថ្ងៃទី៧ ខែឧសភា ឆ្នាំ២០២៥។
ប្រភពពី ESPN បានរាយការណ៍ថា យុវជន Cristiano Ronaldo Jr. ដែលមានអាយុ១៤ឆ្នាំ លេងក្នុងតំណែងខ្សែប្រយុទ្ធដូចឪពុក ត្រូវបានកោះហៅចូលក្រុម U15 ព័រទុយហ្គាល់ ត្រៀមសម្រាប់ការប្រកួតព្រឹត្តិការណ៍អន្តរជាតិ Vlatko Marković ដែលជាការប្រកួតពានរង្វាន់បាល់ទាត់យុវជន នឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៨ ខែឧសភា ខាងមុខនេះ។
ខ្សែប្រយុទ្ធ Cristiano Ronaldo ដែលជាឪពុកបានអបអរសាទរកូនប្រុសលើការបង្ហោះ Story Instagram ដោយបង្ហាញឈ្មោះកូនប្រុសក្នុងបញ្ជីក្រុម U15 ព័រទុយហ្គាល់ និងភ្ជាប់ជាមួយសំណេរថា «មោទកភាពកូនប្រុស!»។
ដ្បិត Ronaldo ខ្លួនឯងបានបង្ហាញខ្លួនជាលើកដំបូងសម្រាប់ក្រុម U15 ព័រទុយហ្គាល់ក្នុងឆ្នាំ ២០០១ ដោយស៊ុតបញ្ចូលទីក្នុងការប្រកួតជាមួយអាហ្វ្រិកខាងត្បូង ហើយជាបន្តបន្ទាប់បានបង្ហាញខ្លួនជាមួយក្រុម U17 U20 U21 និង U23 ហើយត្រូវបានកោះហៅចូលក្រុមឈុតធំក្នុងឆ្នាំ ២០០៣ រហូតមកទល់បច្ចុប្បន្ន។ ការបង្ហាញខ្លួនលើកដំបូងជាមួយក្រុម U15 គឺជាពេលវេលាមួយដែលបានកំណត់ការចាប់ផ្តើមនៃអាជីពដ៏អស្ចារ្យរបស់ Ronaldo នៅក្នុងប្រវត្តិសាស្ត្របាល់ទាត់។
Ronaldo Jr. នឹងក្លាយជាផ្នែកមួយដ៏សំខាន់នៃក្រុមយុវជន U15 ព័រទុយហ្គាល់ ដែលនឹងត្រូវជួបជាមួយជប៉ុន ក្រិក និងអង់គ្លេស ព្រមទាំងការប្រកួតផ្សេងទៀត នៅព្រឹត្តិការណ៍ធ្វើឡើងនៅប្រទេសក្រូអាត។ Ronaldo Jr. បច្ចុប្បន្នកំពុងលេងក្នុងឈុតយុវជនរបស់ក្លិប Al-Nassr នៅប្រទេសអារ៉ាប៊ីសាអូឌីត ដែលជាក្លិបឪពុករបស់គេបានផ្លាស់មកចូលរួម កាលពីខែធ្នូ ឆ្នាំ២០២២។
សូមជម្រាបថា Cristiano Ronaldo Jr. បានដើរតាមគន្លងអាជីពបាល់ទាត់របស់ឪពុកគេជាលើកដំបូង ដោយលេងក្នុងឈុតយុវជននៅក្លិប Real Madrid, Juventus និង Manchester United នៅពេលដែលឪពុករបស់គេកំពុងលេងឱ្យក្រុមឈុតធំរបស់ក្លិបទាំងនោះ។
កាលពីដើមឆ្នាំនេះ ប្រធានក្រុមជម្រើសជាតិព័រទុយហ្គាល់ Cristiano Ronaldo ម្ចាស់ពានរង្វាន់ Ballon d’Or ៥សម័យកាល បានលើកឡើងថា ខ្លួនសង្ឃឹមថាថ្ងៃណាមួយនឹងបង្ហាញវត្តមានលើទីលានប្រកួតជាមួយកូនប្រុស។
កាលពីឆ្នាំ ២០២២ Ronaldo ក៏ធ្លាប់លើកឡើងផងដែរថា កូនប្រុសបានប្រាប់ខ្លួនឱ្យរង់ចាំគេពីរទៅបីឆ្នាំទៀត ទើបអាចលេងជាមួយគ្នាបាន។ Ronaldo បានបញ្ជាក់យ៉ាងច្បាស់ហើយថា ខ្លួននឹងមិនដាក់សម្ពាធលើកូនប្រុសឱ្យបន្តអាជីពបាល់ទាត់នោះទេ ប្រសិនបើគេមិនចង់ ហើយនឹងគាំទ្រកូនប្រុសគ្រប់យ៉ាងនូវអ្វីដែលគេធ្វើ៕
ចែករំលែកព័តមាននេះ