រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌ៧មករា ចុះអប់រំណែនាំ និងធ្វើកិច្ចសន្យា ដល់អាជីវកលក់ធូរេន នៅកំណាត់វិថីព្រះសីហនុ ដោយទុកឱសានវាទ រយៈពេល០៣ថ្ងៃ ឲ្យបញ្ឈប់ការធ្វើអាជីវកម្មយ៉ាងអាណាធិបតេយ្យ…
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌ៧មករា ចុះអប់រំណែនាំ និងធ្វើកិច្ចសន្យា ដល់អាជីវកលក់ធូរេន នៅកំណាត់វិថីព្រះសីហនុ ដោយទុកឱសានវាទ រយៈពេល០៣ថ្ងៃ ឲ្យបញ្ឈប់ការធ្វើអាជីវកម្មយ៉ាងអាណាធិបតេយ្យ បង្កភាពរញ៉េរញ៉ៃ ធ្វើឱ្យខូចសណ្តាប់ធ្នាប់សាធារណៈ និងប៉ះពាល់ដល់សោភ័ណភាព ទីតាំងអគារទូរគមនាគមន៍កម្ពុជា ។
ទីតាំង ដែលក្រុមអាជីវកលក់ធូរេននោះ ស្ថិតនៅមុខអគារទូរគមនាគមន៍កម្ពុជា ជាសហគ្រាសសាធារណៈរបស់រដ្ឋមានអាសយដ្ឋានលេខ៩៥-៩៧ វិថីព្រះសីហនុ កែងផ្លូវ១០៥ ភូមិ០១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។
ការចុះអប់រំ និងធ្វើកិច្ច សន្យានេះ បានធ្វើឡើងនៅវេលាម៉ោង៦និង៣០នាទីល្ងាចថ្ងៃទី០៧ ខែឧសភា ឆ្នាំ២០២៥ ដោយមានការណែនាំពីលោក ថេង សុថុល អភិបាលខណ្ឌ៧មករា អនុញ្ញាតឲ្យលោក គ្រួច សុធន នាយករងរដ្ឋបាល ដឹកនាំកម្លាំងគណៈបញ្ជាការឯកភាពខណ្ឌ ចុះអប់រំណែនាំ និងធ្វើកិច្ចសន្យា ទុកឪសានុវាទរយៈពេល០៣ថ្ងៃ ឲ្យបញ្ឈប់ការធ្វើអាជីវកម្ម លក់នៅកំណាត់វិថីព្រះសីហនុនេះ ។
លោក គ្រួច សុធន នាយករងរដ្ឋបាល បានបញ្ជាក់ថា ក្រោយមានការអនុញ្ញាតពីលោកអភិបាលខណ្ឌ៧មករា និងមានការសំណូមពរពីអគ្គាធិការដ្ឋាន នៃទូរគមនាគមន៍កម្ពុជា ដល់អាជ្ញាធរមូលដ្ឋាន ពីបញ្ហាក្រុមអាជីវកលក់ធូរេន ធ្វើអាជីវកម្មការចតរថយន្ត ឬរទេះ និងតាំងលក់ដូរយ៉ាងអាណាធិបតេយ្យ បង្កភាពរញ៉េរញ៉ៃ ធ្វើឱ្យខូចសណ្តាប់ធ្នាប់សាធារណៈ និងប៉ះពាល់ដល់សោភ័ណភាពទីតាំងអគារ សុំឲ្យបញ្ឈប់ការលក់ដូរបែបនេះ និងសំណូមពរឲ្យទៅរកទីតាំងផ្សេង ។
លោកនាយករងរដ្ឋបាល បានធ្វើកិច្ចសន្យាណែនាំ ដល់ក្រុមអាជីវក តែមានក្រុមអាជីវកមួយចំនួន មិនបានចូលរួមសហការជាមួយអាជ្ញាធរនោះ ប៉ុន្តែនោះជាយ៉ាងណារដ្ឋបាលខណ្ឌ បានជូនដំណឹងដោយទុកឱសានវាទរយៈពេល០៣ សម្រាប់រកទីតាំងថ្មី ដោយគិតចាប់ពីថ្ងៃទី០៧ដល់ ថ្ងៃទី០៩ ខែឧសភា ឆ្នាំ២០២៥ ជាកំណត់ ។
ក្នុងករណីម្ចាស់ទីតាំងអាជីវក មិនគោរពតាមការណែនាំរបស់អាជ្ញាធរ រដ្ឋបាលខណ្ឌនឹងចាត់វិធានរុះរើ ដកហូត យកមករក្សាទុកនៅសាលាខណ្ឌ៧មករា ដោយមិនទទួលខុសត្រូវលើការខូចខាត ឬបាត់បង់ឡើយ ៕
ចែករំលែកព័តមាននេះ