ប្រទេសម៉ាឡេស៊ី ៖ ការនាំចេញផ្លែទុរេនរបស់ប្រទេសម៉ាឡេស៊ីទៅកាន់ប្រទេសចិនត្រូវបានព្យាករណ៍ថានឹងកើនឡើងពី ១៥% ទៅ ២០% នៅឆ្នាំនេះ ដែលជំរុញដោយតម្រូវការពីអ្នកទិញចិនកាន់តែខ្លាំងឡើង បើទោះបីជាមានបញ្ហាប្រឈមទាក់ទងនឹងអាកាសធាតុយ៉ាងណាក៏ដោយ។ នេះបើយោងតាមប្រភពពីសារព័ត៌មាន…
ប្រទេសម៉ាឡេស៊ី ៖ ការនាំចេញផ្លែទុរេនរបស់ប្រទេសម៉ាឡេស៊ីទៅកាន់ប្រទេសចិនត្រូវបានព្យាករណ៍ថានឹងកើនឡើងពី ១៥% ទៅ ២០% នៅឆ្នាំនេះ ដែលជំរុញដោយតម្រូវការពីអ្នកទិញចិនកាន់តែខ្លាំងឡើង បើទោះបីជាមានបញ្ហាប្រឈមទាក់ទងនឹងអាកាសធាតុយ៉ាងណាក៏ដោយ។ នេះបើយោងតាមប្រភពពីសារព័ត៌មាន VnExpress បានចេញផ្សាយ។
យោងតាមការបញ្ជាក់ពីលោក Loh Wee Keng ប្រធានសភាពាណិជ្ជកម្ម និងឧស្សាហកម្មម៉ាឡេស៊ីប្រចាំប្រទេសចិនបានឱ្យដឹងថា តម្រូវការរបស់ចិនសម្រាប់ពូជទុរេន ដូចជា Musang King និង D24 បន្តកើនលើសពីការផ្គត់ផ្គង់។ លោកបានប្រាប់សារព័ត៌មានរដ្ឋម៉ាឡេស៊ី Bernama ថា «ទោះជាភ្លៀងធ្លាក់ខ្លាំងនៅក្នុងប្រទេសម៉ាឡេស៊ីបានធ្វើឱ្យទុរេនមួយចំនួនជ្រុះមុនកាលកំណត់ក៏ដោយ ក៏ខ្ញុំព្យាករណ៍ថា បរិមាណនាំចេញសរុបនៅឆ្នាំនេះ នឹងកើនឡើងពី ១៥% ទៅ ២០% បើប្រៀបធៀបនឹងឆ្នាំមុន»។
លោកបានចង្អុលបង្ហាញថា ទុរេនពូជ Musang King ប្រភេទលេខ១ ឬ Grade A ដែលជាពូជពិសេស ដែលភាគច្រើនដាំដុះនៅប្រទេសម៉ាឡេស៊ី ឥឡូវនេះមានតម្លៃ ៧,១២ ដុល្លារក្នុងមួយគីឡូក្រាម តម្លៃអាចលោតខ្ពស់ជាងនេះ ២ដងអំឡុងពេលក្រៅរដូវ។
កាលពីឆ្នាំមុន ចិនបាននាំចូលទុរេនពីម៉ាឡេស៊ីក្នុងតម្លៃ ២១២លានដុល្លារ។ បើទោះបីជាម៉ាឡេស៊ីបាននាំចេញទុរេនទៅប្រទេសចិនតាំងពីឆ្នាំ ២០១០ ក៏ដោយ ប៉ុន្តែប្រទេសទាំងពីរទើបតែបានចុះហត្ថលេខាលើពិធីសារពិសេសមួយស្តីពីការនាំចូលទុរេន កាលពីឆ្នាំមុន ដែលត្រួសត្រាយផ្លូវសម្រាប់អ្នកនាំចេញរបស់ម៉ាឡេស៊ីចូលទៅក្នុងទីផ្សារចិន ដែលមានតម្លៃរាប់ពានលានដុល្លារ និងធំជាងគេបំផុតរបស់ពិភពលោក។
ថៃដែលជាប្រទេសផ្គត់ផ្គង់ទុរេនដ៏ធំបំផុតទៅកាន់ប្រទេសចិន ប៉ុន្តែទោះយ៉ាងណាក៏ដោយ ម៉ាឡេស៊ីហាក់បីដូចជាមិនទាន់គិតដល់ការប្រួតប្រជែងតំណែងកំពូលរបស់ថៃនៅឡើយទេ។ ដោយលោក Loh Wee Keng បានលើកឡើងថា «យើងមិនប្រកួតប្រជែងជាមួយទុរេនថៃទេ ពីព្រោះតម្លៃ និងគុណភាព គឺជាបញ្ហាដាច់ដោយឡែកពីគ្នា ដោយសំដៅទៅលើការពិតដែលថា ទុរេនម៉ានថង (Monthong) របស់ថៃ ជារឿយៗមានតម្លៃទាបជាងបើប្រៀបធៀបទៅនឹងពូជពិសេស Musang King របស់ម៉ាឡេស៊ី»។
អាទិភាពមួយក្នុងចំណោមអាទិភាពកំពូលនៅក្នុងយុទ្ធសាស្ត្រនាំចេញរបស់ម៉ាឡេស៊ី គឺរក្សាភាពពិតប្រាកដ និងម៉ាកយីហោទុរេនពូជ Musang King របស់ខ្លួន។ ត្រង់ចំណុចនេះ លោក Loh Wee Keng បានបញ្ជាក់ថា «ពាណិជ្ជករខ្លះយកទុរេនពូជផ្សេង ហើយបិទស្លាកលក់ជាពូជ Musang King ដើម្បីទទួលបានប្រាក់ចំណេញខ្ពស់ ដែលនេះបានធ្វើឱ្យខូចយីហោពូជ Musang King។ ដូច្នេះការអប់រំអ្នកទទួលទានចិនអំពីភាពខុសគ្នារវាងពូជ Musang King និងពូជដទៃទៀត គួរតែជាការផ្តោតសំខាន់»៕
ចែករំលែកព័តមាននេះ