បរទេស ៖ មន្ត្រីអាមេរិក និងចិន គ្រោងនឹងចាប់ផ្តើមកិច្ចចរចានៅក្នុងសប្តាហ៍នេះ ដើម្បីព្យាយាមបន្ថយសម្ពាធសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចធំជាងគេបំផុតទាំងពីររបស់ពិភពលោក។ នេះបើយោងតាមប្រភពពី BBC និង Reuters…
បរទេស ៖ មន្ត្រីអាមេរិក និងចិន គ្រោងនឹងចាប់ផ្តើមកិច្ចចរចានៅក្នុងសប្តាហ៍នេះ ដើម្បីព្យាយាមបន្ថយសម្ពាធសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចធំជាងគេបំផុតទាំងពីររបស់ពិភពលោក។ នេះបើយោងតាមប្រភពពី BBC និង Reuters ចេញផ្សាយនៅថ្ងៃទី៧ ខែឧសភា ឆ្នាំ២០២៥។
ក្រសួងការបរទេសចិនបានប្រកាសថា លោកឧបនាយករដ្ឋមន្ត្រី He Lifeng នឹងតំណាងទីក្រុងប៉េកាំងចូលរួមកិច្ចចរចានៅប្រទេសស្វីស ចាប់ពីថ្ងៃទី៩ ដល់ថ្ងៃទី១២ ខែឧសភា ឆាប់ៗខាងមុខនេះ។ ចំណែកឯសហរដ្ឋអាមេរិកក៏បានប្រកាសផងដែរថា លោក Scott Bessent រដ្ឋមន្ត្រីក្រសួងរតនាគារអាមេរិក និងលោក Jamieson Greer អ្នកតំណាងពាណិជ្ជកម្មអាមេរិក (USTR) នឹងតំណាងទីក្រុងវ៉ាស៊ីនតោនក្នុងកិច្ចចរចានេះ។
ចាប់តាំងពីត្រឡប់មកសេតវិមានវិញ លោក ត្រាំ បានអនុវត្តការដាក់ពន្ធនាំចូលថ្មីលើទំនិញរបស់ចិនរហូតដល់ ១៤៥% ដែលនាំឱ្យភាគីចិនវាយបកវិញជាមួយការយកពន្ធលើទំនិញមួយចំនួនពីអាមេរិកចំនួន ១២៥%។ តាមរយៈពន្លឺនៃការចាប់ផ្តើមកិច្ចចរចារវាងមហាយក្សទាំងពីរនេះ បណ្តាអ្នកជំនាញពាណិជ្ជកម្មពិភពលោកបានប្រាប់ BBC ថា ពួកគេមិនរំពឹងថា ការចរចានឹងចំណាយត្រឹមប៉ុន្មានថ្ងៃនោះទេ វាអាចច្រើនខែ។
លោក Scott Bessent បានលើកឡើងថា លោកទន្ទឹងរង់ចាំការធ្វើឱ្យមានតុល្យភាពឡើងវិញនូវប្រព័ន្ធសេដ្ឋកិច្ចអន្តរជាតិ ដើម្បីបម្រើផលប្រយោជន៍របស់សហរដ្ឋអាមេរិកឱ្យកាន់តែប្រសើរឡើង។ ថ្លែងក្នុងបទសម្ភាសន៍ជាមួយ Fox News លោក Bessent បានឱ្យដឹងថា «នេះនឹងក្លាយជាការពិភាក្សាអំពីការបន្ថយការកើនឡើងសម្ពាធ មិនមែនអំពីកិច្ចព្រមព្រៀងពាណិជ្ជកម្មធំដុំនោះទេ ប៉ុន្តែយើងត្រូវតែបែបនេះ មុនពេលដែលយើងអាចឆ្ពោះទៅមុខបន្តទៀត»។
ក្រឡែកទៅអ្នកនាំពាក្យក្រសួងពាណិជ្ជកម្មចិន បានប្រកាសនៅព្រឹកថ្ងៃទី៧ ខែឧសភាថា «ប្រសិនបើអាមេរិកចង់ដោះស្រាយបញ្ហាតាមរយៈការចរចា នោះវាត្រូវតែប្រឈមមុខនឹងផលប៉ះពាល់អវិជ្ជមានយ៉ាងធ្ងន់ធ្ងរ នៃវិធានការពន្ធឯកតោភាគីរបស់ខ្លួន»។
ប្រព័ន្ធផ្សព្វផ្សាយរដ្ឋចិនបានរាយការណ៍ថា ទីក្រុងប៉េកាំងបានសម្រេចចិត្តចូលរួមតុចរចាជាមួយសហរដ្ឋអាមេរិក បន្ទាប់ពីបានពិចារណាយ៉ាងពេញលេញនូវការរំពឹងទុកជាសកលលើផលប្រយោជន៍ប្រទេសជាតិ និងការអំពាវនាវពីធុរកិច្ចអាមេរិក។ របាយការណ៍បានបន្ថែមថា ប្រទេសចិនបើកចំហសម្រាប់កិច្ចពិភាក្សា ប៉ុន្តែក៏បានក្រើនរំលឹកឡើងវិញថា ប្រសិនបើអាមេរិកសម្រេចចិត្តបន្តប្រយុទ្ធនឹងសង្គ្រាមពាណិជ្ជកម្មនេះ ចិននឹងតស៊ូដល់ទីបញ្ចប់។ ដ្បិតសង្គ្រាមពាណិជ្ជកម្មបានបង្កឱ្យមានភាពចលាចលក្នុងទីផ្សារហិរញ្ញវត្ថុ និងបានជះផលប៉ះពាល់យ៉ាងខ្លាំងដល់ពាណិជ្ជកម្មពិភពលោក។
សូមជម្រាបថា នេះគឺជាជំនួបលើកដំបូងរវាងមន្ត្រីជាន់ខ្ពស់ចិន និងសហរដ្ឋអាមេរិក ចាប់តាំងពីសមាជិកព្រឹទ្ធសភាអាមេរិក លោក Steve Daines បានជួបជាមួយនាយករដ្ឋមន្ត្រីចិន លោក Li Qiang នៅទីក្រុងប៉េកាំង កាលពីខែមីនាកន្លងទៅ៕
ចែករំលែកព័តមាននេះ