សម័យនេះសម័យឌីជីថល និងសម័យសង្គមសម្ភារនិយមខ្ពស់ ដូច្នេះការរស់នៅទាមទារនូវស្តង់ដារជីវភាពមួយដ៏ហ៊ឺហារហូតដល់អ្នកខ្លះនៅក្នុងចំណោមគ្រួសារមួយ ដែលមានសមាជិក៤នាក់ គឺមួយផ្ទះមានរថយន្តដល់ទៅ៤គ្រឿង ឬលើសពីនោះក៏មាន ។ ដោយសារតែតម្រូវការ និងលទ្ធភាពរបស់គ្រួសារនីមួយៗចង់មួយគ្រួសារមានរថយន្តប៉ុន្មានគ្រឿងក៏ជារឿងរបស់គ្រួសារនោះ ។…
សម័យនេះសម័យឌីជីថល និងសម័យសង្គមសម្ភារនិយមខ្ពស់ ដូច្នេះការរស់នៅទាមទារនូវស្តង់ដារជីវភាពមួយដ៏ហ៊ឺហារហូតដល់អ្នកខ្លះនៅក្នុងចំណោមគ្រួសារមួយ ដែលមានសមាជិក៤នាក់ គឺមួយផ្ទះមានរថយន្តដល់ទៅ៤គ្រឿង ឬលើសពីនោះក៏មាន ។
ដោយសារតែតម្រូវការ និងលទ្ធភាពរបស់គ្រួសារនីមួយៗចង់មួយគ្រួសារមានរថយន្តប៉ុន្មានគ្រឿងក៏ជារឿងរបស់គ្រួសារនោះ ។ សម័យនេះ ឲ្យតែអ្នកមានលុយ ឬមានធនធានចង់អ្នក និងក្រុមគ្រួសារទិញរថយន្តជិះប៉ុន្មានគ្រឿងក្នុងម្នាក់ ហើយរថយន្តនោះមានតម្លៃប៉ុណ្ណាក៏ជារឿងរបស់អ្នក ប៉ុន្តែកុំអោយតែអ្នកប៉ះពាល់ ដល់អ្នកដទៃ ។
សព្វថ្ងៃនេះ នៅលើបណ្តាញសង្គម គឺឃើញមានការចែករំលែកច្រើនរឿងបញ្ហាពាក់ព័ន្ធនឹងផលប៉ះពាល់ រវាងអ្នកជិតខាង និងអ្នកជិតខាងពាក់ព័ន្ធនឹងចំណតរបស់យានយន្តនេះ ។ បញ្ហានោះ គឺថាអ្នកខ្លះរស់នៅក្នុងលំនៅដ្ឋានបែបជាផ្ទះល្វែង ដែលមានទទឹង៤ទៅ៥ ម៉ែត្រ បណ្តោយ១២ ទៅ១៦ម៉ែត្រ ដូច្នេះនៅពេលដែលសមាជិកគ្រួសារមានរថយន្តច្រើន គឺដើរចតមុខផ្ទះអ្នកជិតខាងផ្តេសផ្តាសរំខានដល់គេចេញចូល ។
ការដើរចតមុខផ្ទះគេ ឬបិទផ្លូវគេចេញចូលម្តងម្កាលវាមិនជាបញ្ហានោះទេ ប៉ុន្តែការដែលខ្លួនរស់នៅនៅក្នុងលំនៅស្ថានដែលមានស្ថានភាពបែបនេះ ហើយមានរថយន្តច្រើនបែបនេះវាមិនមែនរំខានអ្នកជិតខាងម្តងម្កាលនោះទេ គឺវាអាចជាប្រចាំដែលយើងគួរតែរិះគិតចំណុចនេះដែរ ។
អ្នកខ្លះទៀត ក៏ព្រោះតែខ្លួនមានរថយន្តច្រើនបែបនេះ ក៏មានរហូតដល់ទៅចាប់កន្លែងចត នៅតាមសួនសារធារណៈនៅក្នុងបុរី ហើយកាងរហូតដល់រថយន្តអ្នកដទៃមិនមានសិទ្ធិចត ទោះជាកន្លែងនោះទំនេររថយន្តសមាជិកគ្រួសារខ្លួនមិនទាន់មកដល់ថែមទៀតក៏ដោយចុះ ។ រឿងនេះឃើញមាននៅតាមបុរីជាច្រើនហើយ ក៏មានអ្នកដែលបានចែករំលែកនៅលើបណ្តាញសង្គមជាបន្តបន្ទាប់ច្រើនដែរ ។ ដូច្នេះ អ្នកដែលស្ថិតនៅក្នុងស្ថានភាពបែបនេះ សូមរិះគិតឡើងវិញខ្លះៗផង ។
វា គឺជាសិទ្ធិរបស់អ្នក ប៉ុន្តែប្រសិនបើអ្នកទិញហើយទៅរំលោភ ឬបង្កផលប៉ះពាល់ដល់គេវាមិនត្រឹមត្រូវនោះទេ ។ នៅក្នុងករណីនេះ អ្នកគួរតែលៃលករកកន្លែងចំណតត្រឹមត្រូវទៅពីព្រោះនៅពេលនេះក៏មានអ្នក ដែលមានដីធំ ឫទីតាំងទូលំទូលាយ គេបើកកន្លែងទទួលផ្ញើរថយន្តក៏ច្រើនដែរ ។
នៅក្នុងករណីដែលចតនៅក្នុងបុរីកន្លែងសាធារណៈ ប្រសិនបើចតនៅកន្លែងដែលគេអនុញ្ញាតក៏ចតចុះ ប៉ុន្តែមិនអាចមានសិទ្ធិទៅកាងទៅបិទសិទ្ធិគេមិនអោយចតកន្លែង ដែលយើងចតនោះជាប្រចាំឡើយ ។ នៅតាមទីសាធារណៈ នរណាមកមុនអ្នកនោះមានសិទ្ធិមុនហើយ ពីព្រោះកន្លែងនោះ គឺជាកន្លែងសម្រាប់ទាំងអស់គ្នា ។
បើមិនដូច្នេះទេ អ្នកក៏គួរតែពិចារណា លៃលកទីតាំងលំនៅស្ថានណាដែលធំមានទំហំ និងលំហរគ្រប់គ្រាន់ដែលអាចធានាដល់ការផ្តល់ចំណតសម្រាប់រថយន្តនៅក្នុងគ្រួសារអ្នកឲ្យសមសួនទៅ ។ សូមរៀនរស់នៅក្នុងសហគមន៍ដោយចេះគោរពសិទ្ធិ និងយោគយល់អ្នកដទៃខ្លះផងដែរ ។
នៅក្នុងនាមជាអ្នកជិតខាងគ្នា ការលើសលួសបន្តិចបន្តួចគឺគេអាចអត់ឱនបាន។ ប៉ុន្តែប្រសិនបើការលើសលួសនោះវាជ្រុលហើយជាប្រចាំពេកទៅ ទាំងយើងទាំងគេក៏គ្មានពីណាអាចទ្រាំបានដែរ ។ នៅពេលដែលយើងធ្វើអំពើបែបនេះដាក់គេ នៅពេលដែលគេធ្វើដាក់យើងតើយើងនឹងមានអារម្មណ៍យ៉ាងណា? សូមរិះគិត ហើយសង្ឃឹមថា អ្នកដែលនៅក្នុងស្ថានភាពនេះ អាចលៃលកដោះស្រាយបញ្ហាឬទំនាស់ដោយសន្តិវិធី នៅក្នុងនាមជាពលរដ្ឋល្អនៅក្នុងសង្គម ។
សរុបមកវិញ រស់នៅក្នុងបុរី ដែលមានស្ថានភាពលំនៅដ្ឋានជាប់ៗគ្នាលំហរនៃចំណតក៏មានចំនួនកំណត់ យើងសង្ឃឹមថា គ្រប់គ្នានឹងរិះគិតលើបញ្ហានេះ ។ អ្នកដែលកំពុងនៅក្នុងស្ថានភាពនេះ សូមយកចិត្តគេមកដាក់ក្នុងចិត្តខ្លួនខ្លះ ហើយគោរពសិទ្ធិអ្នកជិតខាងនោះបញ្ហានឹងអាចធូរស្រាល ។ យើងរស់នៅជាសហគមន៍ គួរតែគោរព និងអោយតម្លៃនៅលើសហគមន៍ ៕
ចែករំលែកព័តមាននេះ