បរទេស ៖ តម្លៃប្រេងឆៅអន្តរជាតិបានធ្លាក់ចុះជាង២ដុល្លារក្នុងមួយបារ៉ែលក្នុងការជួញដូរនៅអាស៊ី នៅថ្ងៃទី៥ ខែឧសភា ឆ្នាំ២០២៥ ខណៈដែលអង្គការ OPEC+ បានកំណត់នឹងបង្កើនផលិតកម្មប្រេងរបស់ខ្លួន ដែលជំរុញឱ្យមានការព្រួយបារម្ភអំពីការផ្គត់ផ្គង់កាន់តែច្រើនចូលទៅក្នុងទីផ្សារដែលកំពុងគ្របដណ្តប់ដោយភាពមិនច្បាស់លាស់…
បរទេស ៖ តម្លៃប្រេងឆៅអន្តរជាតិបានធ្លាក់ចុះជាង២ដុល្លារក្នុងមួយបារ៉ែលក្នុងការជួញដូរនៅអាស៊ី នៅថ្ងៃទី៥ ខែឧសភា ឆ្នាំ២០២៥ ខណៈដែលអង្គការ OPEC+ បានកំណត់នឹងបង្កើនផលិតកម្មប្រេងរបស់ខ្លួន ដែលជំរុញឱ្យមានការព្រួយបារម្ភអំពីការផ្គត់ផ្គង់កាន់តែច្រើនចូលទៅក្នុងទីផ្សារដែលកំពុងគ្របដណ្តប់ដោយភាពមិនច្បាស់លាស់ នៃតម្រូវការរបស់អ្នកប្រើប្រាស់។ នេះបើតាមប្រភពពីទីភ្នាក់ងារសារព័ត៌មាន Reuters និង Bloomberg បានចេញផ្សាយ។
តម្លៃប្រេងឆៅ Brent នៅក្នុងកិច្ចសន្យាចែកចាយនាពេលអនាគតបានធ្លាក់ចុះ ២,២១ដុល្លារ ឬ ៣,៦១% មកនៅត្រឹម ៥៩,០៨ដុល្លារក្នុងមួយបារ៉ែល ខណៈប្រេងឆៅ West Texas Intermediate របស់អាមេរិកមានតម្លៃ ៥៦ដុល្លារក្នុងមួយបារ៉ែល ពោលធ្លាក់ចុះ ២,២៩ដុល្លារ ឬ ៣,៩៣%។ កិច្ចសន្យាតម្លៃប្រេងទាំងពីរនេះ បានឈានដល់កម្រិតទាបបំផុត ចាប់តាំងពីថ្ងៃទី៩ ខែមេសា ឆ្នាំ២០២៥
ការធ្លាក់ចុះគួរឱ្យកត់សម្គាល់នេះ កើតឡើងបន្ទាប់ពីអង្គការ OPEC+ នៃប្រទេសផលិតប្រេងសំខាន់ៗរបស់ពិភពលោកបានព្រមព្រៀងគ្នា បង្កើនល្បឿនផលិតកម្មប្រេងសម្រាប់រយៈពេលពីរខែជាប់ៗគ្នា ដោយទិន្នផលសម្រាប់ខែមិថុនាកើនឡើង ៤១១,០០០បារ៉ែលក្នុងមួយថ្ងៃ។ ការបង្កើនទិន្នផលប្រេងសម្រាប់ខែមិថុនា និងធ្វើឱ្យទន្និផលសរុបសម្រាប់ខែមេសា ឧសភា និងមិថុនា កើនឡើងដល់ ៩៦០,០០០បារ៉ែលក្នុងមួយថ្ងៃ តំណាងឱ្យ ៤៤% នៃផែនការកាត់បន្ថយ ២,២លានបារ៉ែលក្នុងមួយថ្ងៃ ដែលបានព្រមព្រៀងគ្នាតាំងពីឆ្នាំ ២០២២ របស់ក្រុមនេះ។
ការសម្រេចចិត្តរបស់អង្គការ OPEC និងសម្ព័ន្ធមិត្តរបស់ខ្លួនបានធ្វើឡើងនៅក្នុងកិច្ចប្រជុំមួយ កាលពីថ្ងៃសៅរ៍សប្តាហ៍មុន ដោយប្រទេសអារ៉ាប៊ីសាអូឌីត ដែលជាមេដឹកនាំក្រុមនេះ កំពុងតែស្វែងរកការដាក់ទណ្ឌកម្មលើប្រទេសអ៊ីរ៉ាក់ និងកាហ្សាក់ស្ថាន ចំពោះការមិនអនុលោមតាមកូតាផលិត ដែលបានធ្វើឱ្យតម្លៃប្រេងធ្លាក់ចុះរួចទៅហើយ។
ប្រេងឆៅបានធ្លាក់ចុះនៅឆ្នាំនេះ ហើយបានត្រឡប់ទៅជិតកម្រិតទាបក្នុងរយៈពេល៤ឆ្នាំ គិតត្រឹមខែមេសាកន្លងទៅ ដោយសារសង្គ្រាមពាណិជ្ជកម្មរបស់ប្រធានាធិបតីអាមេរិក លោក ដូណាល់ ត្រាំ (Donald Trump) បានគំរាមកំហែងដល់ការបង្អាក់កំណើន ក៏ដូចជាបំផ្លាញទំនុកចិត្តវិនិយោគិន និងកាត់បន្ថយតម្រូវការប្រេង។
លោក ត្រាំ ដែលគ្រោងនឹងធ្វើដំណើរទៅកាន់តំបន់មជ្ឈឹមបូព៌ានៅចុងខែនេះ បានអំពាវនាវដល់អង្គការ OPEC+ រួចហើយ ដើម្បីជំរុញផលិតកម្ម និងជួយធ្វើឱ្យតម្លៃប្រេងធ្លាក់ចុះ។ នៅក្នុងពេលជាមួយគ្នានេះ អារ៉ាប៊ីសាអូឌីតកំពុងស្វែងរកការពង្រឹងទំនាក់ទំនងជាមួយសហរដ្ឋអាមេរិក ដែលបាននិងកំពុងពិភាក្សាលើកិច្ចព្រមព្រៀងនុយក្លេអ៊ែរ៕ ប្រភព ៖ Reuters និង Bloomberg
ចែករំលែកព័តមាននេះ